Johanu 15:1-27
15 “Yẹn wẹ vẹntin nugbo lọ, podọ Otọ́ ṣie wẹ glesi lọ.
2 Alà depope he to go e bo ma to sinsẹ́n detọ́n wẹ ewọ nọ desẹ, podọ dehe to sinsẹ́n detọ́n lẹpo wẹ ewọ nọ hẹn zun wiwe, na e nido de sinsẹ́n tọ́n dogọ.+
3 Mìwlẹ ko wé, na ohó he yẹn ko dọna mì wutu.+
4 Mì gbọṣi kọndopọ mẹ hẹ mi, yẹn nasọ gbọṣi kọndopọ mẹ hẹ mì. Kẹdẹdile alà ma sọgan de sinsẹ́n tọ́n na ede adavo e gbọṣi vẹntin lọ go do, mọjanwẹ mìlọsu ma sọgan do, adavo mì gbọṣi kọndopọ mẹ hẹ mi.+
5 Yẹn wẹ vẹntin lọ; mìwlẹ wẹ alà lẹ. Mẹdepope he gbọṣi kọndopọ mẹ hẹ mi, bọ yẹn to kọndopọ mẹ hẹ ẹ, ewọ wẹ nọ de sinsẹ́n susu tọ́n;+ na mìwlẹ ma sọgan wà nudepope matin yẹn.
6 Eyin mẹdepope ma gbọṣi kọndopọ mẹ hẹ mi, ewọ nọ yin didesẹ taidi alà de bo nọ hú. Gbẹtọ lẹ sọ nọ bẹ alà enẹlẹ pli bo nọ dọ̀n yé dlan miyọ́n mẹ bọ yé nọ fiọ.
7 Eyin mì gbọṣi kọndopọ mẹ hẹ mi bọ ohó ṣie lẹ gbọṣi mì mẹ, mì biọ nudepope he jlo mì, e nasọ yinmọ na mì.+
8 Ehe mẹ wẹ Otọ́ ṣie yin gigopana te, dọ mì ni nọ to sinsẹ́n susu detọ́n bo do mìde hia di devi ṣie lẹ.+
9 Kẹdẹdile Otọ́ yiwanna mi do,+ mọ wẹ yẹn ko yiwanna mì do; mì gbọṣi owanyi ṣie mẹ.
10 Eyin mì nọ yìn gbedide ṣie lẹ, mì na gbọṣi owanyi ṣie mẹ, kẹdẹdile yẹn ko yìn gbedide Otọ́ ṣie tọn lẹ bo gbọṣi owanyi etọn mẹ do.
11 “Yẹn ko dọ onú ehelẹ na mì, na ayajẹ ṣie nido tin to mì mẹ bọ ayajẹ mìtọn nido yin hinhẹn gọ́.+
12 Ehe wẹ gbedide ṣie, dọ mì ni yiwanna ode awetọ kẹdẹdile yẹn ko yiwanna mì do.+
13 Mẹdepope ma tindo owanyi he klohu ehe, dọ mẹde ni ze ogbẹ̀* etọn jo do ota họntọn etọn lẹ tọn mẹ.+
14 Họntọn ṣie wẹ mì, eyin mì wà nuhe yẹn degbe etọn na mì.+
15 Yẹn ma nọ ylọ mì dọ afanumẹ lẹ ba, na afanumẹ de ma nọ yọ́n nuhe wà klunọ etọn te. Ṣigba, yẹn ko ylọ mì dọ họntọn, na nuhe yẹn sè sọn Otọ́ ṣie dè lẹpo wẹ yẹn ko hẹn zun yinyọnẹn na mì.
16 E ma yin mìwlẹ wẹ de mi gba, ṣigba yẹn wẹ de mì, na mì nido zindonukọn bo to sinsẹ́n detọ́n podọ na sinsẹ́n mìtọn nido gbọṣi aimẹ, na nudepope he mì biọ Otọ́ to oyín ṣie mẹ, ewọ nido na mì.+
17 “Onú ehelẹ wẹ yẹn degbe etọn na mì, dọ mì ni yiwanna ode awetọ.+
18 Eyin aihọn gbẹwanna mì, mì yọnẹn dọ e ko gbẹwanna mi whẹpo e do gbẹwanna mì.+
19 Eyin mì ko yin apadewhe aihọn tọn wẹ, aihọn na yiwanna etọn titi lẹ. Todin, na mì ma yin apadewhe aihọn tọn wutu,+ ṣigba bọ yẹn ko de mì sọn aihọn lọ mẹ, ehe wutu wẹ aihọn do gbẹwanna mì.+
20 Mì hẹn ohó he yẹn dọna mì lọ do ayiha mẹ dọ: Afanumẹ de ma nọ klohu klunọ etọn. Eyin yé ko dohomẹkẹn mi, yé na dohomẹkẹn mì ga;+ eyin yé ko payi ohó ṣie go, yé na payi mìlọsu tọn go ga.
21 Ṣigba, yé na wà onú ehe lẹpo sọta mì, na oyín ṣie tọn wutu, na yé ma yọ́n Mẹhe do mi hlan lọ wutu.+
22 Eyin yẹn ma ko wá bo dọhona yé wẹ, yé ma na ko tindo ylando de.+ Ṣigba todin, yé ma tindo whẹjijọ de na ylando yetọn.+
23 Mẹdepope he gbẹwanna mi gbẹwanna Otọ́ ṣie ga.+
24 Eyin yẹn ma ko wà azọ́n he mẹdevo depope ma ko wà lẹ to ṣẹnṣẹn yetọn wẹ, yé ma na ko tindo ylando de;+ ṣigba todin, yé ko mọ mi bosọ gbẹwanna yẹn po Otọ́ ṣie po ga.
25 Ṣigba, ehe jọ na ohó he yin kinkandai to Osẹ́n yetọn mẹ nido sọgan yin hinhẹndi dọmọ: ‘Yé gbẹwanna mi matin whẹwhinwhẹ́n de.’+
26 To whenue alọgọtọ lọ he yẹn na dohlan mì sọn Otọ́ dè na wá, enẹ wẹ gbigbọ nugbo tọn lọ,+ he na wá sọn Otọ́ dè, enẹlọ na dekunnu gando go e;+
27 podọ na mìwlẹ tọn, mì nasọ dekunnu,+ na mì ko tin po yẹn po sọn bẹjẹeji.
Nudọnamẹ Odò Tọn
^ Kavi “alindọn.”
