Isaia 66:1-24
66 Nuhe Jehovah dọ die:
“Olọn wẹ ofìn ṣie, podọ aigba wẹ tokloafọligbe ṣie.+
To whelọnu lo, ohọ̀ nankọ wẹ mìwlẹ sọgan gbá na mi,+Podọ fie wẹ gbọjẹtẹn ṣie te?”+
2 “Alọ ṣie titi wẹ basi onú ehe lẹpo,Podọ lehe yemẹpo wá aimẹ gbọn niyẹn,” wẹ Jehovah dọ.+
“Enẹwutu, omẹ ehe dè wẹ yẹn na pọ́n,Yèdọ mẹhe yin whiwhẹnọ bo nọ do gbigbọ lẹnvọjọ tọn hia bosọ nọ dibusi* ohó ṣie.+
3 Mẹhe to oyìnsú hù tin taidi mẹhe to gbẹtọ hù.+
Mẹhe to lẹngbọ yí do sanvọ́ tin taidi mẹhe to kọslona avún.+
Mẹhe to nunina basi—taidi mẹhe to ohùn ohàn tọn yí do sanvọ́!+
Mẹhe to nuyọnwan gblingblin yí do basi avọ́nunina oflin tọn+ tin taidi mẹhe yí bogbèsisa do to didona omẹ.*+
Yé ko de aliho yetọn titi lẹ,Bo nọ mọ* awuvivi to nuhe yin osùnú lẹ mẹ.
4 Enẹwutu, yẹn na de aliho he n’na yí do sayana yé lẹ,+Bọ nuhe yé nọ dibuna lẹ wẹ yẹn na hẹnwa yé ji.
Na whenue n’ylọ, mẹde ma siọ;Whenue n’dọho, mẹdepope ma tin he dotoai.+
Yé to nuhe ylan to nukun ṣie mẹ lẹ wà mapote,Bosọ de nado nọ wà nuhe nọ hẹn homẹgble mi lẹ.”+
5 Mì sè ohó Jehovah tọn, mì mẹhe nọ dibusi* ohó etọn lẹ emi:
“Mẹmẹsunnu mìtọn he gbẹwanna mì bo gbẹ́ mì dai na oyín ṣie tọn wutu lẹ dọmọ, ‘Na Jehovah ni yin gigopana!’+
Ṣigba, Ewọ na sọawuhia bo na hẹn ayajẹ wá na mì,Bọ yewlẹ wẹ na duwinyan.”+
6 Nudidọ zingidi tọn de to yinyin sisè sọn tòdaho lọ mẹ, yèdọ nudidọ de sọn tẹmpli lọ mẹ!
Jehovah wẹ to ahọsu kẹntọ etọn lẹ sọgbe hẹ nuhe yé jẹna.
7 Whẹpo yọnnu lọ do jẹ ajipanu, e ko jivi.+
Whẹpo e do mọ awufiẹsa ajipanu tọn, e ko ji visunnu de.
8 Mẹnu wẹ ko sè onú mọnkọtọn de pọ́n?
Mẹnu wẹ ko mọ onú mọnkọtọn de pọ́n?
Be otò de na yin jiji to azán dopo poun gblamẹ wẹ ya?
Kavi be akọta de na yin jiji to zánto dopo poun mẹ wẹ ya?
Ṣogan, tlolo he Ziọni jẹ ajipanu wẹ e ji visunnu etọn lẹ.
9 “Be yẹn na hẹn ẹn kakajẹ vijiji whenu bo ma na hẹn ovi lọ tọ́njẹgbonu wẹ ya?” wẹ Jehovah dọ.
“Kavi be yẹn na hẹn ẹn jẹ ajipanu bo ka na sú vidọ̀ etọn wẹ ya?” wẹ Jiwheyẹwhe dọ.
10 Mì jaya hẹ Jelusalẹm bo hùnhomẹ hẹ ẹ,+ mì mẹhe yiwanna ẹn lẹpo emi.+
Mì jẹaglin hẹ ẹ susugege, mì mẹhe to aluẹmẹ na ewọ tọn wutu lẹpo,
11 Na mì na nọ́ anọ́ etọn bọ anọ́ homẹmiọnnamẹ tọn etọn na hẹn pekọ mlẹnmlẹn wá na mì,Podọ mì na nù gọ́ho bo na mọ awuvivi to gigo susugege etọn mẹ.
12 Na nuhe Jehovah dọ die:
“Todin, yẹn na na ẹn jijọho taidi tọ̀sisa de+Bo nasọ na ẹn gigo akọta lẹ tọn taidi tọ̀sisa he gọfla de.+
Mìwlẹ na nọ́ anọ́ etọn bo na yin zize pàn,Podọ yè na nọ dowèna mì to akọ̀n etọn ji.
13 Dile onọ̀ de nọ miọnhomẹna visunnu etọn do,Mọ wẹ yẹn na nọ to homẹmiọnna mì do;+Podọ mìwlẹ na yin homẹmiọnna, na Jelusalẹm wutu.+
14 Mìwlẹ na mọ ehe, bọ ahun mìtọn na gọ́ na ayajẹ,Ohú mìtọn lẹ na kọ́ kẹdẹdi ogbé yọyọ lẹ.
Alọ* Jehovah tọn nasọ zun yinyọnẹn na devizọnwatọ etọn lẹ,Ṣigba, ewọ na gblewhẹdo kẹntọ etọn lẹ.”+
15 “Na Jehovah ja taidi miyọ́n de,+Podọ osọ́-kẹkẹ etọn lẹ taidi jẹhọn-ahizi de,+Nado yí homẹgble sinsinyẹn do suahọ yé,Nado yí miyọ́n he to jiji do wọhẹ yé.+
16 Na miyọ́n wẹ Jehovah na yí do hẹn whẹdida ṣẹ,Mọwẹ, ohí etọn wẹ e na yizan sọta agbasalan* lẹpo;Mẹhe yin hùhù gbọn Jehovah dali lẹ nasọ sù.
17 “Mẹhe to yedelẹ klandowiwe bo to yedelẹ klọ́we nado biọ jipa*+ lẹ mẹ hodo mẹhe to ṣẹnṣẹn lọ, yèdọ mẹhe nọ dù hàn-làn+ po osùnú devo lẹ po gọna oṣọ̀n,+ yemẹpo wẹ na yin vivasudo dopọ,” wẹ Jehovah dọ.
18 “Na n’yọ́n azọ́n yetọn lẹ po linlẹn yetọn lẹ po wutu, yẹn na wá nado bẹ gbẹtọ akọta lẹpo po ogbè lẹpo tọn po pli, bọ yé na wá bo na mọ gigo ṣie.”
19 “Yẹn na basi ohia de to ṣẹnṣẹn yetọn, bo nasọ do delẹ to mẹhe họ̀ngán lẹ mẹ hlan nado yì akọta lẹ mẹ—yì Talṣiṣi,+ Puli po Ludi+ po, yèdọ mẹhe nọ de ogá lẹ, yì Tubali po Javani po,+ podọ yì lopo he dẹn taun lẹ ji—ehe ma ko sè linlin gando go e kavi mọ gigo ṣie lẹ; yé nasọ lá gigo ṣie to akọta lẹ mẹ.+
20 Yewlẹ na plan mẹmẹsunnu mìtọn lẹ jẹgbonu wá sọn akọta lẹpo+ mẹ taidi nunina de na Jehovah, to osọ́ lẹ ji, to osọ́-kẹkẹ lẹ mẹ, to agbàn-kẹkẹ lẹ mẹ, to otlò* lẹ ji, podọ to kanklosọ́ awuyatọ lẹ ji, wá osó wiwe ṣie ji, yèdọ Jelusalẹm,” wẹ Jehovah dọ, “kẹdẹdile omẹ Islaeli tọn lẹ nọ hẹn nunina yetọn wá ohọ̀ Jehovah tọn mẹ to núzinzan he wé de mẹ do.”
21 “Yẹn nasọ yí delẹ na yẹwhenọ lẹ podọ na Levinu lẹ,” wẹ Jehovah dọ.
22 “Na kẹdẹdile olọn yọyọ lẹ po aigba yọyọ lọ po+ he yẹn to bibasi na gbọṣi aimẹ to nukọn ṣie do,” wẹ Jehovah dọ, “mọ wẹ kúnkan* mìtọn po oyín mìtọn po na gbọṣi aimẹ do.”+
23 “Podọ sọn osun yọyọ de jẹ devo podọ sọn gbọjẹzangbe de jẹ devo,Agbasalan* lẹpo na nọ wá bo na nọ dẹ́ do odò to nukọn ṣie,”*+ wẹ Jehovah dọ.
24 “Yé nasọ nọ tọ́njẹgbonu bo na nọ pọ́n oṣiọ mẹhe ṣiatẹ sọta mi lẹ tọn;Na owé he to yé dù lẹ ma na kú,Mọ miyọ́n yetọn ma na yin ṣíṣí,+Yé nasọ lẹzun awuhiọnu de na gbẹtọ* lẹpo.”
Nudọnamẹ Odò Tọn
^ Kavi “nọ yin ahunmẹduna gando.”
^ Kavi vlavo, “mẹhe to pipà na boṣiọ de.”
^ Kavi “Bọ alindọn yetọn nọ mọ.”
^ Kavi “nọ yin ahunmẹduna gando.”
^ Kavi “Huhlọn.”
^ Kavi “gbẹtọvi.”
^ Enẹ wẹ, jipa vonọtaun he nọ yin yiyizan na boṣiọ-sinsẹ̀n lẹ.
^ Kanlin de he taidi kẹtẹkẹtẹ bo nọ yin jiji eyin kẹtẹkẹtẹ asu hẹ osọ́ asi.
^ To paa mẹ, “okún.”
^ Kavi “Gbẹtọvi.”
^ Kavi “na nọ sẹ̀n mi.”
^ To paa mẹ, “agbasalan.”
