Owalọ lẹ 8:1-40
8 Saulu lọsu kẹalọyi hùhù etọn.+
To azán enẹ gbè, homẹkẹn sinsinyẹn fọ́n sọta agun he tin to Jelusalẹm; gbọnvona apọsteli lẹ, mẹlẹpo wẹ gbàpe gbọn agbegbe Jude po Samalia tọn lẹ po ji.+
2 Ṣigba, sunnu he dibusi Jiwheyẹwhe lẹ ze Stefani bo yì dì i, yé sọ nọ aluẹmẹ na ẹn taun.
3 Nalete, Saulu jẹ agun lọ gbàdo ji. E nọ to whédegbè jẹ devo gbè biọ gánnugánnu bo nọ to sunnu lẹ po yọnnu lẹ po dọ̀n tọ́n bosọ nọ bẹ yé do gànpamẹ.+
4 Ṣigba, mẹhe ko gbàpe lọ lẹ gbọn aigba lọ lẹpo ji bo to wẹndagbe ohó lọ tọn lá.+
5 Filipi sọ yì tòdaho Samalia tọn* mẹ+ bo jẹ yẹwheho Klisti tọn dọna yé ji.
6 To kọndopọ mẹ, gbẹtọgun lọ na ayidonugo nuhe dọ Filipi te dile yé to todoai bo to pinpọn ohia he ewọ to bibasi lẹ.
7 Na mẹsusu wẹ tindo gbigbọ mawé lẹ, ehelẹ sọ nọ dawhá po ogbè lélé po bo nọ tọ́njẹgbonu.+ Humọ, susu mẹhe hò plibọ lẹ po sẹkunọ lẹ po tọn yin azọ̀nhẹngbọna.
8 Enẹ hẹn ayajẹ daho wá tòdaho enẹ mẹ.
9 Todin, dawe de tin to tòdaho lọ mẹ he nọ yin Simọni, mẹhe, jẹnukọnna ojlẹ ehe, ko nọ to nujlẹ bo nọ hẹn awuji akọta Samalia tọn bosọ nọ sọalọakọ́n dọ emi yin mẹjọmẹ daho de.
10 Podọ yemẹpo, sọn omẹ pẹvi ji jẹ daho ji wẹ nọ na ẹn ayidonugo bo nọ dọmọ: “Huhlọn Jiwheyẹwhe tọn wẹ dawe ehe, yèdọ Huhlọn Daho.”
11 Enẹwutu, yé nọ na ẹn ayidonugo, na e ko hẹn awuji yé na ojlẹ de gbọn nujijlẹ etọn lẹ dali.
12 Ṣigba, to whenue yé yí Filipi he to wẹndagbe Ahọluduta Jiwheyẹwhe tọn+ po oyín Jesu Klisti tọn po lá na yé lọ sè, sunnu lẹ po yọnnu lẹ po jẹ yinyin bibaptizi ji.+
13 Simọni lọsu lẹzun yisenọ de ga, podọ to whenue e ko yin bibaptizi, e nọ zọnhẹ Filipi;+ podọ eyin e mọ ohia po azọ́n huhlọnnọ he to yinyin wiwà lẹ po, e nọ jiawu na ẹn.
14 To whenue apọsteli he to Jelusalẹm lẹ sè dọ Samalianu lẹ ko kẹalọyi ohó Jiwheyẹwhe tọn,+ yé do Pita po Johanu po hlan yé;
15 podọ omẹ ehelẹ yì bo hodẹ̀ na yé, na yé nido mọ gbigbọ wiwe yí.+
16 Na e ma ko jẹ do depope to yé mẹ ji dai, ṣigba baptẹm kẹdẹ wẹ yé ko yí to oyín Oklunọ Jesu tọn mẹ.+
17 To whenẹnu, yé nọ ze alọ yetọn lẹ do yé ji,+ bọ yé nọ mọ gbigbọ wiwe yí.
18 Todin, to whenue Simọni mọdọ gbọn alọ zizedomẹji apọsteli lẹ tọn gblamẹ wẹ gbigbọ nọ yin ninamẹ, e ze akuẹ donukọnna yé
19 bo dọmọ: “Mì na aṣẹ ehe yẹnlọsu ga, na mẹdepope he ji yẹn ze alọ ṣie lẹ do nido sọgan mọ gbigbọ wiwe yí.”
20 Ṣigba, Pita dọna ẹn dọmọ: “Na fataka towe ni dọ̀n po hiẹ po, na a lẹndọ emi sọgan mọ nunina vọnu Jiwheyẹwhe tọn yí po akuẹ po.+
21 Hiẹ ma tindo adà kavi mimá de to whẹho ehe mẹ, na ahun towe ma jlọ to nukun Jiwheyẹwhe tọn mẹ.
22 Enẹwutu, lẹnvọjọ sọn oylan towe ehe mẹ bo vẹ̀ Jehovah* dọ, eyin e yọnbasi, linlẹn ylankan ahun towe mẹ tọn nido sọgan yin jijona we;
23 na yẹn mọdọ adí vivẹ́ de podọ afanumẹ mawadodo tọn de wẹ hiẹ.”
24 Simọni gblọnna yé dọmọ: “Mì vẹ̀ Jehovah* na mi, na depope to nuhe mì dọ ehelẹ mẹ nikaa wá ji e.”
25 Enẹwutu, to whenue yé ko dekunnu mlẹnmlẹn bo ko dọ ohó Jehovah* tọn, yé lẹkọ dedo Jelusalẹm bo to wẹndagbe lọ lá na susu gbétatò Samalianu lẹ tọn.+
26 Ṣigba, angẹli Jehovah* tọn+ dọhona Filipi dọmọ: “Fọ́n bo yì hùwaji, yèdọ yì aliho he tọ́n sọn Jelusalẹm yì Gaza lọ ji.” (Ehe yin aliho danfafa tọn de.)
27 Enẹwutu, e fọ́n bo yì, podọ pọ́n! ojọ̀* Etiopianu de, yèdọ dawe he tindo aṣẹpipa daho to ahọsi Kandasi Etiopianu lọ glọ, he sọ tin to adọkun etọn lẹpo ji. Ewọ ko yì Jelusalẹm nado basi sinsẹ̀n,+
28 ṣigba ewọ lẹkọ jei whé bo to aisinsin to osọ́-kẹkẹ etọn mẹ bosọ to owe yẹwhegán Isaia tọn hia daga.
29 Enẹwutu, gbigbọ dọna Filipi dọmọ: “Dọnsẹpọ bo kọnawudopọ hẹ osọ́-kẹkẹ ehe.”
30 Filipi họ̀nwezun plá ẹ bo sè bọ e to owe yẹwhegán Isaia tọn hia daga, ewọ sọ dọmọ: “Na nugbo tọn, be hiẹ mọnukunnujẹ nuhe hia a te mẹ ya?”
31 E dọmọ: “Na taun tọn, nawẹ yẹn sọgan wàmọ do, adavo mẹde deanana mi?” E sọ vẹ̀ Filipi nado biọ e mẹ bo sinai hẹ ẹ.
32 Podọ adà Owe-wiwe tọn he e to hihia daga lọ die: “Ewọ yin hinhẹnwa hùhùtẹn taidi lẹngbọ de, podọ kẹdẹdi lẹngbọvu de he to whii to fúnpatọ etọn nukọn, ewọ lọsu ma kẹnù.+
33 To ojlẹ winyandomẹ tọn etọn whenu, e ma mọ whẹdida dodo yí.+ Mẹnu wẹ na basi zẹẹmẹ gigọ́ whẹndo etọn tọn? Na ogbẹ̀ etọn yin yíyí sọn aigba ji wutu.”+
34 Ojọ̀ lọ gblọnna Filipi dọmọ: “Yẹn vẹ̀ we, Mẹnu go wẹ yẹwhegán lọ dọ ehe gando? Gando ede go wẹ, kavi gando mẹdevo go?”
35 Filipi kẹ̀ onù etọn bo lá wẹndagbe he gando Jesu go na ẹn, yèdọ bẹsọn adà Owe-wiwe tọn ehe ji.
36 Todin, dile yé to yìyì to aliho lọ ji, yé jẹ osindò de kọ̀n, bọ ojọ̀ lọ dọmọ: “Pọ́n! Osin die; etẹwẹ glọnalina mi nado yin bibaptizi?”
37 *——
38 Enẹwutu, e degbe dọ osọ́-kẹkẹ lọ ni yin didote, Filipi po ojọ̀ lọ po sọ biọ osin lọ mẹ, ewọ sọ baptizi i.
39 To whenue yé tọ́n sọn osin lọ mẹ, gbigbọ Jehovah* tọn plan Filipi yì po awuyiya po, bọ ojọ̀ lọ ma mọ ẹn ba, ewọ sọ wleali etọn dedo bo to ayajẹ.
40 Ṣigba, Filipi mọ ede to Aṣidọdi, ewọ sọ jugbọn aigba lọ ji bo to wẹndagbe lọ lá na tòdaho lọ lẹpo kakajẹ whenue e wá Sesalea.+
Nudọnamẹ Odò Tọn
^ Kavi vlavo, “tòdaho Samalia tọn de.”
^ Kavi “ahọluzọnwatọ họ̀nmẹ tọn.”
^ Pọ́n Nud. A3.
