Owalọ lẹ 1:1-26
1 Mẹvivẹ ṣie Teofil, yẹn wleawuna kandai tintan lọ gando nulẹpo he Jesu bẹjẹeji nado wà podọ nado plọnmẹ go+
2 kakajẹ azán he gbè ewọ yin zize yì oji aga,+ to whenue e ko gbọn gbigbọ wiwe dali na anademẹ apọsteli he e ko de lẹ godo.+
3 To whenuena e ko jiya godo, e gbọn kunnudenu he dutomẹji susu dali do ede hia yé dọ emi togbẹ̀.+ Yé sọ mọ ẹn na azán 40, bọ e to hodọ gando Ahọluduta Jiwheyẹwhe tọn go.+
4 To whenue e pli hẹ yé, e degbena yé dọmọ: “Mì tọ́nyi sọn Jelusalẹm blo,+ ṣigba mì nọtepọn nuhe Otọ́ ko dopagbe etọn lọ,+ ehe mì sè sọn dè e;
5 na nugbo tọn, Johanu yí osin do baptizi, ṣigba azán vude sọn din, mìwlẹ na yin bibaptizi po gbigbọ wiwe po.”+
6 Enẹwutu, whenue yé ko pli, yé kanse e dọmọ: “Oklunọ, be hiẹ na gọ̀ ahọluduta jo na Islaeli to ojlẹ ehe mẹ lo ya?”+
7 Ewọ dọna yé dọmọ: “E ma yin mìtọn nado yọ́n ojlẹ lẹ kavi osaa lẹ he Otọ́ ko yí do aṣẹpipa ede tọn mẹ gba.+
8 Ṣigba, mì na mọ huhlọn yí to whenue gbigbọ wiwe na wá mì ji,+ podọ mìwlẹ na yin kunnudetọ+ ṣie to Jelusalẹm,+ to Jude po Samalia lẹpo po,+ podọ kaka yì awà he dẹn hugan* aigba tọn lẹ ji.”+
9 To whenue e ko dọ onú ehelẹ godo, dile yé to nupọn, ewọ yin zize yì oji aga bọ aslọ de ṣinyọ́n ẹn bọ yé ma sọgan mọ ẹn ba.+
10 Podọ dile yé zín nukun yetọn do jiwhé to whenue ewọ to yìyì, to ajiji mẹ, dawe awe delẹ he do avọ̀ wewe+ ṣite to apá yetọn
11 bo dọmọ: “Mì omẹ Galili tọn lẹ emi, naegbọn mì do ṣite bo to jiwhé pọ́n? Jesu ehe, mẹhe yin yíyí sọn mì dè sọyi jiwhé na wá to aliho dopolọ mẹ dile mì mọ ẹn bọ e to jiwhé yì do.”
12 To whenẹnu, yé lẹkọyi Jelusalẹm+ sọn osó he nọ yin Osó Olivie tọn lọ ji, ehe ma dẹn do Jelusalẹm hú gbejizọnlin Gbọjẹzan tọn de.*
13 Whenue yé lẹkọ, yé hẹji yì abò aga tọn lọ mẹ, fie yé nọ nọ̀. Yewlẹ wẹ Pita, Johanu, Jakọbu, Andle, Filipi, Tọmasi, Batelemi, Matiu, Jakọbu visunnu Alfe tọn, Simọni zohunhunnọ lọ po Juda visunnu Jakọbu tọn po.+
14 To kọndopọ mẹ, yemẹpo gbọṣi odẹ̀ mẹ, to pọmẹ hẹ yọnnu delẹ+ po Malia onọ̀ Jesu tọn po gọna nọvisunnu Jesu tọn lẹ.+
15 To azán enẹlẹ gbè, Pita fọnṣite to mẹmẹsunnu lẹ ṣẹnṣẹn (sọha yemẹpo tọn* to pọmẹ wẹ nudi gbẹtọ 120) bo dọmọ:
16 “Mì mẹmẹsunnu lẹ emi, dandan wẹ e yin dọ adà Owe-wiwe tọn lọ ni yin hinhẹndi, ehe gbigbọ wiwe ko dọ dọdai etọn gbọn Davidi gblamẹ gando Juda go,+ mẹhe lẹzun alihiamẹtọ de na mẹhe wle Jesu lẹ.+
17 Na e ko yin hihia dogọ mí+ podọ e ko tindo mahẹ to lizọnyizọn ehe mẹ.
18 (Enẹwutu, dawe ehe dopolọ yí akuẹ mawadodo tọn lọ+ do họ̀ aigba de, podọ to whenue e sọahọ̀ndo, adọ̀go etọn là* bọ nuhe to ohò etọn mẹ lẹpo kọnyinai.+
19 Ehe sọ lẹzun yinyọnẹn na mẹhe nọ nọ̀ Jelusalẹm lẹpo, sọmọ bọ aigba lọ yin yiylọ to ogbè yetọn mẹ dọ Akeldama, enẹ wẹ, “Aigba Ohùn tọn.”)
20 Na e yin kinkan to owe Salmu lẹ tọn mẹ dọ, ‘Gbọ fininọ etọn ni gbọgbé, a sọ dike mẹdepope nọ e mẹ blo’+ podọ, ‘Gbọ mẹdevo ni yí azọ́ntẹn nukunpedonugo tọn etọn.’+
21 Enẹwutu, dandannu wẹ e yin dọ to mẹhe zọnhẹ mí to ojlẹ he mẹ Oklunọ Jesu hẹn lizọnyizọn etọn di* to ṣẹnṣẹn mítọn lẹpo gblamẹ,
22 yèdọ bẹsọn baptẹm etọn gbọn Johanu dali+ ji kakajẹ azán he gbè ewọ yin zize yì oji aga sọn mí dè,+ dopo to omẹ ehelẹ mẹ ni lẹzun kunnudetọ fọnsọnku etọn tọn hẹ mí.”+
23 Enẹwutu, yé ze omẹ awe dote, yèdọ Josẹfu he nọ yin Balsaba, mẹhe sọ nọ yin yiylọdọ Justu, gọna Matiasi.
24 Enẹgodo, yé hodẹ̀ bo dọmọ: “Jehovah* E, hiẹ mẹhe yọ́n ahun mẹlẹpo tọn,+ do mẹhe hiẹ de to dawe awe ehelẹ mẹ hia mí
25 nado yí otẹn lizọnyizọn ehe po apọsteli-yinyin po tọn, ehe Juda jodo bo de ali edetiti tọn.”+
26 Enẹwutu, yé de ovò do yé ji,+ bọ ovò de Matiasi, ewọ sọ yin hihia* dogọ apọsteli 11 lẹ.
Nudọnamẹ Odò Tọn
^ Kavi “yì opodo.”
^ Kavi “gbẹtọgun lọ.”
^ Kavi “ewọ là sọn ṣẹnṣẹn.”
^ To paa mẹ, “Jesu to yìyì bo to wiwá.”
^ Kavi “yin yiyidogọ,” enẹ wẹ, yin pinpọnhlan di omẹ 11 he pò lẹ.
