Lomunu lẹ 12:1-21
12 Enẹwutu, mẹmẹsunnu lẹ emi, yẹn yí awuvẹmẹ Jiwheyẹwhe tọn do vẹ̀ mì, nado yí agbasa mìtọn+ do basi avọ́sinsan he togbẹ̀, wiwe,+ he yin alọkẹyi na Jiwheyẹwhe, yèdọ sinsẹ̀nzọn wiwe he yin bibasi po huhlọn nulẹnpọn tọn mìtọn po.+
2 Podọ mì hodo titonu* ehe ba blo, ṣigba mì yin adàdiọna gbọn ayiha mìtọn didiọ dali,+ na mì nido sọgan mọdona+ ojlo Jiwheyẹwhe tọn he yọ́n, bo yin alọkẹyi bosọ yin pipé lọ.
3 Na gbọn nukundagbe majẹhẹ he yin nina mi lọ gblamẹ, yẹn dọna mẹhe to mì ṣẹnṣẹn to finẹ lẹpo ma nado nọ lẹn ede tọn glanglan hú lehe e jẹ nado nọ lẹn do,+ ṣigba nado nọ lẹnnupọn to aliho de mẹ he na dohia dọ mì tindo wunza, yèdọ mẹdopodopo jẹ obá he mẹ Jiwheyẹwhe ko na ẹn yise* jẹ.+
4 Na kẹdẹdile mí tindo awutugonu susu to agbasa dopo go,+ ṣigba bọ awutugonu lọ lẹpo ma nọ wà azọ́n dopolọ lẹ do,
5 mọdopolọ dile míwlẹ tlẹ sù, agbasa dopo wẹ mí yin to kọndopọ mẹ hẹ Klisti, ṣigba dopodopo mítọn yin awutugonu lẹ he to kọndopọ mẹ hẹ ode awetọ.+
6 To whenue e yindọ mí tindo nunina voovo lẹ sọgbe hẹ nukundagbe majẹhẹ he yin nina mí,+ eyin dọdai didọ tọn wẹ, mì gbọ mí ni nọ dọ dọdai sọgbe hẹ yise he mí tindo;
7 kavi eyin lizọnyizọn wẹ, mì gbọ mí ni zindonukọn to lizọnyizọn ehe mẹ; kavi mẹhe to mẹplọn, mì gbọ e ni zindonukọn to mẹpinplọn etọn mẹ;+
8 kavi mẹhe to tulinamẹ,* mì gbọ e ni zindonukọn to tulininamẹ* etọn mẹ;+ mẹhe to mimá,* mì gbọ e ni basi i po alọtútlú po;+ mẹhe to nukunpedonugo,* mì gbọ e ni basi i po sọwhiwhe* po;+ mẹhe to lẹblanu dohia, mì gbọ e ni basi i po homẹhunhun po.+
9 Mì gbọ owanyi mìtọn ni tin matin yẹnuwiwa.+ Mì tindo wangbẹna sinsinyẹn na nuhe yin ylankan;+ mì nọ tẹdo nuhe yin dagbe go.
10 Na nuhe dù owanyi mẹmẹsunnu tọn, mì tindo owanyi sisosiso na ode awetọ. Mì yin nukọntọ* to gbégbò didohia ode awetọ mẹ.+
11 Mì nọ yin vivẹnudotọ,* e ma yin adidọnọ.*+ Mì nọ hunzo to gbigbọ-liho.+ Mì nọ wazọ́n di afanumẹ Jehovah* tọn.+
12 Mì nọ jaya to todido mẹ. Mì nọ doakọnnanu to nukunbibia mẹ.+ Mì nọ sinyẹnlin to odẹ̀ mẹ.+
13 Mì nọ má hẹ omẹ wiwe lẹ sọgbe hẹ nuhudo yetọn.+ Mì hodo aliho johẹmẹ tọn.+
14 Mì nọ dona mẹhe to homẹkẹndo mì lẹ;+ mì nọ dona bo ma nọ hodẹ̀domẹ blo.+
15 Mì nọ jaya hẹ mẹhe to ayajẹ lẹ; mì nọ viavi hẹ mẹhe to avivi lẹ.
16 Mì nọ yinuwa hẹ mẹdevo lẹ dile mì nọ yinuwa hẹ mìde titi do; mì wleawuna linlẹn mẹdezedaga tọn lẹ blo, ṣigba mì tindo walọ mẹdezewhè tọn.+ Mì lẹzun nuyọnẹntọ to nukun mìtọn titi mẹ blo.+
17 Mì nọ yí oylan do suahọ oylan tọn na mẹdepope blo.+ Mì nọ hò nuhe yin dagbe to pọndohlan* gbẹtọ lẹpo tọn mẹ pọ́n.
18 Eyin e yọnbasi, dile mì penugo do, mì nọ nọ̀ jijọho mẹ hẹ gbẹtọ lẹpo.+
19 Mẹyiwanna lẹ emi, mì yiahọsu na mìde blo, ṣigba mì natẹn homẹgble;*+ na e ko yin kinkandai dọmọ: “‘Ṣie wẹ ahọsuyi; yẹn na suahọ etọn,’ wẹ Jehovah* dọ.”+
20 Ṣigba, “eyin huvẹ hù kẹntọ towe, na núdùdù i; eyin nugbla hù i, na ẹn nude nado nù; na gbọn ehe wiwà dali, hiẹ na bẹ akán he to jiji do ota na ẹn.”*+
21 A dike oylan gbawhàn towe blo, ṣigba nọ yí dagbe do gbawhàn oylan tọn.+
Nudọnamẹ Odò Tọn
^ Kavi “ko má yise na ẹn.”
^ Kavi “vivẹnu.”
^ Kavi “to anadenanu.”
^ Kavi “to nunina basi.”
^ Kavi “tudohomẹnamẹ.”
^ Kavi “tudohomẹnamẹ.”
^ Kavi “Mì nọ ze afọdide tintan.”
^ Kavi “sọwhiwhenọ; zohunhunnọ.”
^ Kavi “Mì nọ dọngbàn to azọ́n mìtọn kọ̀n blo.”
^ Kavi “nukun.”
^ Enẹ wẹ, “homẹgble Jiwheyẹwhe tọn.”
^ Enẹ wẹ, nado whiwhẹ mẹlọ bo hẹn ẹn yọ́ to yẹhiadonu-liho.
