Howhinwhẹn lẹ 22:1-29
22 E pọnte nado de oyín dagbe* hú adọkun susugege;+E pọnte nado tindo sisi* hú fataka po sika po.
2 Adọkunnọ po wamọnọ po tindo ehe to kọndopọ mẹ:*
Jehovah wẹ dá yé omẹ awe lẹ.+
3 Zinzintọ nọ mọ owù hlan bo nọ whlá ede,Ṣigba, wunvinọ nọ dlí biọ e mẹ bo nọ jiya kọdetọn* etọn lẹ tọn.
4 Kọdetọn whiwhẹ po budisi Jehovah po tọnWẹ adọkun, gigo po ogbẹ̀ po.+
5 Owùn po omọ̀ lẹ po wẹ tin to ali mẹhe tindo jijọ gbíngbán tọn ji,Ṣigba, mẹdepope he mọdọ ogbẹ̀* emitọn họakuẹ nọ nọla na yé.+
6 Plọn yọpọvu* do aliho he ewọ dona gbọn ji;+Eyin ewọ tlẹ whẹ́n mẹho, e ma na tọ́n sọn e ji.+
7 Adọkunnọ nọ dugán do wamọnọ ji,Bọ ahọ́tọnọ nọ yin afanumẹ na mẹhe e duahọdo.+
8 Mẹdepope he nọ do mawadodo na gbẹ̀n nugbajẹmẹji,+Podọ opò homẹgble etọn tọn na wá opodo.+
9 Mẹhe yin alọtlútọ* na nọ yin didona,Na ewọ nọ má núdùdù etọn hẹ wamọnọ.+
10 Yàn mẹṣankotọ sẹ̀,Wiwọ́ nasọ busẹ;Nudindọn* po mẹzunzun po na doalọte.
11 Mẹhe yiwanna ahun he wé-ṣeke bọ hogbe etọn lẹ gọ́ na ojọmiọnWẹ na jihọntọn hẹ ahọlu.+
12 Nukun Jehovah tọn lẹ nọ basi hihọ́na oyọnẹn,Ṣigba, Ewọ nọ dedòna ohó mẹklọtọ lẹ tọn.+
13 Adidọnọ nọ dọmọ: “Kinnikinni to gbonu!
Yẹn na yin hùhù to tòplitẹn!”+
14 Odò he siso de wẹ onù yọnnu gblewanọ* lẹ tọn yin.+
Mẹhe Jehovah gblewhẹdo wẹ na jai jẹ e mẹ.
15 Nulú doadọ̀do to ahun yọpọvu* tọn mẹ,+Ṣigba, obá mẹplọnlọ tọn wẹ na họ̀n ẹn sẹ̀ pete.+
16 Mẹhe to wamọnọ hòdu nado jẹ adọkun dogọ+Po mẹhe nọ nanú adọkunnọ poNa wá tlọ biọ ohẹ́n mẹ to godo mẹ.
17 Lẹ́ otó towe hlan ohó nuyọnẹntọ tọn lẹ bo dotoaina yé,+Na hiẹ nido yí ahun towe lẹpo do kẹalọyi oyọnẹn ṣie,+
18 Na e yọ́n nado nọ hẹn yé do ohò towe mẹ dọ́n,+Na yemẹpo nido gbọṣi nùflo towe lẹ ji to whepoponu.+
19 Hiẹ nido dejido Jehovah go wutuWẹ yẹn do to oyọnẹn na we to egbé.
20 Be yẹn ma ko basi kandai na we,Nado na we ayinamẹ po oyọnẹn po,
21 Nado nọ plọn we ohó nugbo dejidego lẹ,Na hiẹ nido lẹkọyi mẹhe do we hlan dè po linlin he sọgbe po ya?
22 A jẹajo do wamọnọ, na ewọ yin wamọnọ wutu blo,+A sọ gbidikọna agbátọnọ to họngbo tòdaho lọ tọn ji blo,+
23 Na Jehovah lọsu wẹ na yí owhẹ̀ yetọn dọ+Bo nasọ yí ogbẹ̀* mẹhe nọ hò yé dù lẹ tọn.
24 Ma nọ dogbẹ́ hẹ mẹhe nọ yawu gblehomẹ bloKavi kọ̀n dewe dopọ hẹ mẹhe nọ yawu duadi blo,
25 Hiẹ nikaa wá plọn aliho etọn lẹBo domọwle dewe.*+
26 A tin to mẹhe nọ na alọmẹ nado yin alọyitọ lẹ ṣẹnṣẹn blo,Yèdọ mẹhe nọ yí yede do basi alọyitọ nado yàn lẹ.+
27 Eyin hiẹ ma tindo nude he a na yí do suahọ,Adọzan towe na yin yíyí sọn oglọ na we!
28 A sẹtẹnna ohia dogbó he ko dẹn-to-aimẹ de tọn blo,Ehe tọgbo towe lẹ ko tùn.+
29 Be a ko mọ dawe azọ́nyọnẹntọ de to azọ́n etọn kọ̀n pọ́n ya?
Ahọlu lẹ nukọn wẹ e na nọ nọte te;+E ma na nọ nọte to omẹ paa lẹ nukọn.
Nudọnamẹ Odò Tọn
^ To paa mẹ, “nukundagbe.”
^ To paa mẹ, “oyín.”
^ To paa mẹ, “ko pli dopọ.”
^ Kavi “yasanamẹ.”
^ Kavi “alindọn.”
^ Kavi “ovi; jọja.”
^ To paa mẹ, “Ewọ he tindo nukundagbe.”
^ Kavi “Whẹ̀ylọmẹ.”
^ Kavi “ovi; jọja.”
^ Kavi “fìn alindọn.”
^ Kavi “alindọn towe.”
