É ma nyí mɛxe otò, akɔ̀, aca kavǐ ogbè yětɔn gbɔnvo lɛ kɛ́ɖɛ́ sín nú wɛ nɔ vɛna mɛlɛ gba, amɔ́ mɛxe sinsɛ̀n yětɔn gbɔnvo kavǐ ma to oxá ɖokpólɔ́ jí kpó yé kpó lɛ lɔsu sín nú nɔ vɛna yé, é gán sɔ́ nyí ná mɛlɔ nyí sunnu kavǐ nyɔnu wutu. Yè ma nɔ yí nukún-jɔ-nukún dó kpɔ́n mɛɖélɛ ná oxwe, wemase, oblɔ kavǐ nukúnmɛ yětɔn wutu. Mɛlɛ nɔ to nuyiwa ɖomɔ bo ma nɔ nywɛ ɖɔ emi o ɖó nuvɛun.

Be vlavo a ɖó nuvɛun wɛ ya? Mǐ nɔ saba mɔɖɔ mɛɖévo lɛ wɛ ɖó nuvɛun bɔ mílɛ ma ɖó. Amɔ́, enyí mǐ ná ɖɔ xójɔxó, mímɛkpó wɛ nɔ ɖó nuvɛun. Wenywɛtɔ David Williams xe nɔ kplɔ́nnumɛ gandó walɔ gbɛtɔvi lɛ tɔn go dóxya ɖɔ enyí gbɛtɔ́ wunmɛ ɖélɛ tíin bɔ yè ma nɔ xya yé gɔnu bɔ yè wá ɖukosɔna omɛ mɔnkɔtɔn lɛ, “alixo xe mɛ yè nɔ yinuwa xɛ́ yé te nɔ gbɔnvo bɔ mɛlɔsu ma tlɛ nɔ nywɛ.”

Ði akpajlɛ̌, to otò xe mɛ Jovica nɔ nɔ̀ to xùwaji Europe tɔn, akɔ̀ kpɛvi ɖé tíin xe mɛlɛ ma nɔ xya gɔnu. Nue Jovica ɖɔ ɖie: “N’nɔ lɛnɖɔ gbɛtɔ́-jọ-gbɛtɔ́ ɖé ma to mɛ enɛlɛ mɛ. Etomɔco, n’nɔ lɛnɖɔ n’ma ɖó nuvɛun, ná nukún é mɛlɛkpó nɔ yí dó kpɔ́n yé ninyɛ.”

Toxɔluɖuta lɛ nɔ ɖé sɛ́n voovo lɛ tɔ́n nadó ɖoalɔtena akɔ̀-cincinnya kpó nuvɛun kpó. Amɔ́, é ma o kpà yé. Etɛ́wutu? Ná osɛ́n lɔ lɛ ma nɔ yì aɖɔ̀ nuxahun lɔ tɔn jí. Osɛ́n lɔ lɛ ma nɔ hɔ̀naɖɔna nue to gbɛtɔ́ xomɛ, ahun mɛ wɛ nuvɛun ka nɔ bɛ́sɔn. Din, be enɛ dóxya ɖɔ yè ma gán sukúndóna nuvɛun wɛ ya? Be nuvɛun ná wá vɔ̀ gbèɖokpó ya?