La boi bim ti zinzɔŋɔ nyɛti mɛ ge sɛla n wan basɛ ti a baŋɛ eŋa n boi zɛ’an lika poan dela dameŋɔ la. La ni damena se’em la n ni basɛ ti ba baŋɛ sɛla n lɛm ba. Makerɛ n wana, zinzɔŋɔ ta’an baŋɛ duŋa n ɛɣeri ti la damena se’em la bintandugele n ɛɣera ti la damena se’em mɛ.

 Ti’isɛ bisɛ: Zinzɔnɔ zo’e zo’e ta’an kaasa ba kunkore poan ti la voole doose ba nɔɔren bii ba nyɔdama poan yese na. Voole la san tu’usɛ sɛla, a ni dekɛ la a tuba la n kãregɛ la wum dameŋɔ la ta’an baŋɛ la de sɛla. Dameŋɔ la n ni basɛ ti zinzɔŋɔ la baŋɛ eŋa n boi zɛ’an la woo n ani se’em. Zinzɔŋɔ la ni dekɛ la dameŋɔ la baŋɛ sɛla n boi zɛ’an, la zom paɛ se’em, la lɛm bii la zaɛ se’em, hali a zinzɔŋɔ tadaandoma san puɣum vɔɔla.

 Zinzɔŋɔ n wuni sɛla n boi zɛ’an dameŋɔ se’em la soŋeri ba mɛ ti ba ta’an nyɔkɛ sɛla ti ba bɔta. Ba itigɔ wa nari ti la kɔ’ɔn tɔ hali ti viisegɔdoma basɛba yeti zinzɔŋɔ kan ta’an eŋɛ bala. Ge ba eŋɛ viisegɔ mɛ baŋɛ ti zinzɔŋɔ ta’an baŋɛ lɔkɔ la n zaɛ bii lɛm en se’em. Bala n wan soŋɛ zinzɔŋɔ la ti a ta’an nyɔkɛ sɛla ti a bɔta la ge kan nyɔsegɛ!

 Viisegɔdoma maalɛ la elektronik doore ti la soŋera fɔɔsi ti ba san lɛna sɛla, doore la ni miim mɛ ti ba mina ba sore ta’an lɔkɛ sɛla n boi ba nɛŋa, maɣesɛ wuu tia yile. Brian Hoyle la Dean Waters n yuun maalɛ elektronik doore la yeti, “Zinzɔŋɔ n mi lɔkɔ n dameni se’em la n soŋɛ tɔ ti to ta’an maalɛ elektronik doore wa.”

 Hon puti’irɛ dela bem? Zinzɔŋɔ n wuni sɛla n boi zɛ’an dameŋɔ se’em la ze’ele la lebege lebege poan? Bii ba naam ku mɛ?