“Mam dekɛ la suma’asum basɛ ya; Mam dekɛ la n suma’asum bo ya. Mam ka bo’ori suma’asum wuu tingɔŋɔ la n iti se’em la. Da basɛ ya ti ya suure sa’am bii ya basɛ ti dabeem kɛ̃ ya.”​—Yon 14:27, New World Translation.

 “Mam basɛ ya la suma’asum; mam bo’ori ya la n suma’asum la: mam ka bo’ori wuu tingɔŋɔ la n bo’ori de se’em la. Da basɛ ya ti ya suure sa’am bii ya basɛ ti dabeem kɛ̃ ya.”​—Yon 14:27, American Standard Version.

 Yetɔɣebuna wa ti Yezu Krista yuun dekɛ kpemese a tuuntuneba la giila ti, ba da basɛ ti yele ba’ɛ daana ba bii ba giila kɔ’ɔsɛ. Naayinɛ ta’an soŋɛ ba ti ba tara suma’asum ba suuren wuu Yezu la.

 Suma’asum kani taaba ti Yezu yuun dekɛ bo a podɔleba la? Yezu yuun dekɛ la suma’asum sebo ti amea yuun tara la bo ba. Suma’asum buna yeen daɣɛ la zaberɛ bii wuŋerɛ n ka boi. (Yon 15:20; 16:33) La boi bim ti ba yuun mɛlesɛ Yezu mɛ ge yeti ba ku en ge a puti’irɛ la a suure yuun kɔ’ɔn ana la mama. (Luke 23:27, 28, 32-34; 1 Peter 2:23) La yuun ani en la buɣa buɣa se’ere n sɔi la a mi ti a Sɔ Yehowa nɔŋɛ en mɛ ge ti a puurɛ pee la en. a​—Matu 3:16, 17.

 Yezu yuun tɔɣɛ buɣelɛ a tuuntuneba la suure ti eŋa la a Sɔ la nɔŋɛ ba mɛ ge ti ba puurɛ me pee la ba. (Yon 14:23; 15:9, 10; Arom 5:1) A yetɔɣum wa yuun basɛ ti ba tara la suma’asum. Ban yuun tari sakerɛ Yezu poan ti a dela Naayinɛ Dayɔa la yuun basɛ ti ba tara la suma’asum, ti la ana ba buɣa buɣa. (Yon 14:1) La boi bim ti Yezu yuun ka le naɛ la ba bɔna ge a yuun pu’ulum biŋe ti Naayinɛ zilam vo’osum la wan soŋɛ ba ti ba tara sukpe’ene la suma’asum. (Yon 14:25-27) Yeledaaŋɔ san paɛ Yezu podɔleba la, ba wan dekɛ sukpe’ene ŋmibe de poan se’ere n sɔi la, ba mi ti Yehowa puurɛ pee mɛ la ba ge me wan soŋɛ ba.​—Hebru 13:6.

 Yezu n yuun boi tingɔŋɔ wa zuo la, nɛreba ni pu’usera taaba mɛ ti, tari ya suma’asum. (Matu 10:12, 13) Ge Yezu yuun ka yeen yele a podɔleba la ti ba tara suma’asum; a yuun kɔ’ɔn bo ba la suma’asum. Leyɛ’ɛsa, suma’asum sebo ti Yezu yuun bo ba la boi la de to’ore la tingɔŋɔ wa b n wan ta’an bo ba sɛla la. Suma’asum sebo ti tingɔŋɔ wa wan ta’an bo dela, ho wan ta’an tara bɔnsoŋa, taresum bii kpe’eŋo. Ge Yezu suma’asum la daɣɛ inganɛ poan yɛla ge la dela yelemɛŋɛrɛ suma’asum.

 Yu’unseko ti Yezu yeti a ki la, ti a yuun tɔɣɛ yele wa bo a tuuntuneba la. Yu’unkuŋɔ la a yuun yele ba yeti, eŋa yeti a basɛ ba mɛ. (Yon 13:33, 36) Yele wa yuun basɛ ti a tuuntuneba la suure sa’am mɛ. (Yon 16:6) Bala la, Yezu yuun basɛ ti ba baŋɛ sɛla n sɔi ti la ka nara ti ba fabela sɛla n wan paɛ ba pooren la.

 Yezu yetɔɣum la me ta’an kpemese Kristakɔma giila zina wa. Tomam me ta’an tara suma’asum. (2 Tesalonika 3:16) To san dɛna Yezu podɔleba, to ni zamesɛ baŋɛ ti Yezu la a Sɔ Yehowa nɔŋɛ to mɛ ge ti ba puurɛ me pee la tɔ. (Kolose 3:15; 1 Yon 4:16) Bala la, la ni ka nara ti to ba’ɛ fabela. Beni n sɔi? Se’ere n sɔi la Naayinɛ boi mɛ la tɔ.​—Yooma 118:6; Filipi 4:6, 7; 2 Peter 1:2.

 Bisɛ vidiyo gi’a wa nyɛ Yon gɔŋɔ la yelekpina.