“Naayinɛ ka dekɛ fihiyoko vo’osum bo to ge a bo to la paŋa la nɔŋerɛ la putɛsonɛ vo’osum.”​—2 Timoti 1:7, New World Translation.

 “Naayinɛ ka dekɛ dabeem vo’osum bo to ge a bo to la paŋa la nɔŋerɛ la putɛsonɛ vo’osum.”​—2 Timoti 1:7, New King James Version.

 Naayinɛ wan ta’an soŋɛ nɛra ti a dekɛ sukpe’ene tum sɛla n de tontɔɔ. Naayinɛ ka boti nɛnɛra basɛ ti “dabeem” saɛ en​—dabeem sɛka n wan basɛ ti ho eŋɛ sɛla n kan pee Naayinɛ puurɛ.

 To geele ya hala atã wa ti Naayinɛ dekɛ bo to, ti kaalegɔ zɛ’an wa tɔɣɛ ba yele n wan soŋɛ tɔ ti to kan tara dabeem bii fihiyoko.

 “Paŋa.” Kristakɔma pu’useri Naayinɛ mɛ la sukpe’ene hali la dindoma zo’e zo’e n daani ba bii bɔnsɛka n ka ani soŋa poan. Ba ka basɛ ti dabeem kɛ̃ ba. (2 Korint 11:23-27) Ba eŋɛ la wani ta’an eŋɛ bala? Tuuntuna Paul tɔɣɛ de yele yeti: “Sɛla woo poan mam tari paŋa mɛ doose la se’emdaana n bo’ori mam paŋa la zuo.” (Filipi 4:13) Naayinɛ wan bo a nɛreba “pansɛka n gaŋɛ asaala paŋa” ti ba ta’an ze’ele daaŋɔ seko woo n paari ba poan.​—2 Korint 4:7.

 “Nɔŋerɛ.” Kristabia san nɔŋɛ Naayinɛ, bala wan soŋɛ en ti a tara sukpe’ene tuna sɛla n de tontɔɔ. Bala mea, Kristabia san nɔŋɛ a tadaandoma, a ni dekɛ la sɛla n pakɛ ba deŋɛ nɛŋa a vom poan, la san puɣum dɛna a pɔ̃sɛ a nyuurɛ bii wuŋerɛ paɛ en.​—Yon 13:34; 15:13.

 “Putɛsonɛ.” Baabule la poan, Kristabia n tari putɛsonɛ pa’alɛ ti a wan ta’an kɔ’ɛ a puti’irɛ ti la dɔla Baabule pa’alegɔ. Nɛra n tari putɛsonɛ ni ta’an nyɔkɛ amea mɛ soŋa soŋa ge me ti’isa yɛla soŋa, a san puɣum bɔna wuŋerɛ poan. A ni kɔ’ɛ a puti’irɛ ti la dɔla la Naayinɛ pa’alegɔ ge me mina ti eŋa la Naayinɛ bɔnsoŋa la n de ninmɔ’ɔrɛ gana nɛreba n ti’iseri sɛla.

 Yi’i Timoti dela gɔŋɔ ti tuuntuna Paul yuun gulesɛ bo a zɔ Timoti n laɣum dɛna a tuuntuna tadaana. Paul yuun kpemese Timoti n de bunbilipaalega la giila ti a mɔ’ɛ nini na’am mɔɔlegɔ tuuma la poan. (2 Timoti 1:1, 2) Timoti yuun ta’an zɔta dabeem. Bala yuun wan ta’an gu en ti a kan ta’an tum Kristakɔma tansugere la poan. (1 Timoti 4:12) Ge Paul yuun tiɛ Timoti yeti a tari la bo’olum n de tuuma n boi de to’ore ti a wan tum tansugere la poan. A yuun yele Timoti ti a da gu’una ti a dekɛ pansɛka ti a tara la tuna tuuma a san tuna a bisega tuuma tansugere la poan, a san mɔɔla na’am yelesoma la, la a san ŋmibera wuŋerɛ poan a sakerɛ zuo.​—2 Timoti 1:​6-8.

 La boi bim ti a yuun gulesɛ yele wa bo la Timoti ge la wan soŋɛ sɛba za’a n pu’useri Naayinɛ zina ti ba baŋɛ ti Naayinɛ wan soŋɛ ba ti ba ze’ele soŋa soŋa, la ka pakɛ la yeledaaŋɔ la.