BUNBILIPAALESI SOKE YETI
Mam Ni Maalɛ N Mea Ana La Wani?
Beni n sɔi ti la yele pakɛ ti ho bisa hon yɛɛri ho lɔɣɔrɔ se’em? Se’ere n sɔi la lɔɣeyɛɛtɔ woo pa’alɛ la sɛla. Hon yɛɛri sɛla la pa’ali la bem?
Tuure yɛla atã ti nɛreba ita, se’em ma’a ti ba maala bamesi la ho wan eŋɛ se’em kan tue bala
Tuure #1: Nɛreba ni basɛ ti sɛla ti ba nyɛta intanɛt poan bii T.V. poan n pa’ala ba nari ti ba maala bamesi se’em.
Theresa n de bunbilipaalega yeti: “Saŋa ase’a, la ni ana mam mɛ woo n da lɔɣeseto ti ba mɔɔla ba yɛla zo’e zo’e la laɣum yɛ. Ho san kɔ’ɔn nyɛta nɛreba n yɛɛri lɔkɔ kuyima se’em saŋa woo, la ni kɔ’ɔn ana la naana ti ho tɔɣesa ba.”
Daɣɛ pugeto ma’a n nɔŋɛ ba dɔla sitai paala. The Everything Guide to Raising Adolescent Boys gɔŋɔ la yeti, “Budibeto me nɔŋɛ sitai paala mɛ. Ba ni puɣum ka paɛ zi’an zi’an ti sɛba n koose lɔɣɔrɔ la tari ba lɔɣɔrɔ la pã’asa ba.”
Sɛla n wan soŋɛ hɔ: Baabule la yeti: “Yɛmpɔ’ɔredaana sakeri yele woo mɛ ge yɛmdaana ni ma’ɛ la amea ti’isa sɛla woo ti a ita.” (Magaha 14:15) Wuu Baabule la n pa’alɛ se’em la, tiregɛ bɔka sitai paala la vuurɛ. Makerɛ, ho san nyɛ lɔɣɔrɔ ti nɛreba tɔɣera pɛɣera ti, lɔɣebamam wan basɛ ti “ho nini yu’ɛ”, “weele ho inya” bii “basɛ ti nɛreba kunkoma’asum bɔna ho poan,” soke homea yeti:
‘N san da lɔkɔ wa, bani n wan nyɛ nyuurɔ?’
‘La wan pa’alɛ ti n tari la halɛ deni?’
‘Mam n sirum tari halisɛka n bala? Ge mam n sirum de nɛresɛka n bala?’
Sɛla n nari ti ho mina ta’an maalɛ homea soŋa: Dekɛ bakwai la ho bisɛ lɔɣɔrɔ sitai seto n boi intanɛt zɛse’esi n pa’alɛ nɛreba n nari ti ba maalɛ bamesi se’em. Bem halɛ ti ba bɔta ti nɛreba tara? Yɛla ase’a boi ti ba tɔɣera ti ba pã’asɛ hɔ, ti ho ti’isɛ ti la nari ti ho maala homea wuu bamam n pa’alɛ se’em la? Karen n de bunbilipaalega yeti: “La dela pɛregerɛ paa bɔ’ɔra nɛreba ti ba ba’ɛ maalɛ bamesi zɔ’ɔra, yɛ lɔɣɔrɔ n som ge wɛɛla ba inya la n som se’em la pa’alɛ nɛreba. Sɛba n koose lɔɣɔrɔ la mi ti, la ni ka kpe’em ti ba pã’asɛ bunbilipaalesi.”
Tuure #2: Nɛreba ni bɔta ti ba maala bamesi wuu nɛra woo n maali bamesi se’em la.
Manuel n de bunbilipaalega yeti: “Lɔɣɔrɔ san yese na dɛna sitai paala, nɛra wuu yeti a yɛ la lɔɣekaŋa, ho san ka yɛ lɔɣekaŋa ba wan yeti ho nini ka yu’ɛ.” Bunbilipaalega ayima yu’urɛ n de Anna me tɔɣɛ yeti: “La daɣɛ sitai paalega la ma’a n de yele la ge nɛreba boti ba maala bamesi wuu nɛra woo n iti se’em la.
Sɛla n wan soŋɛ hɔ: Baabule la yeti: “Da basɛ ya ti tiŋa wa yaɣum ya.” (Arom 12:2) Wuu gulesegɔ wa n pa’alɛ se’em la, ti’isɛ kaaŋɔ wa yele soŋa, bisɛ ho lɔɣeyɛɛtɔ la ge soke homea yeti:
‘Bem n basɛ ti mam da lɔkɔ wa?’
‘Mam nɔŋɛ n yɛɛra lɔɣese’a n tari yu’urɛ?’
‘Mam boti la n yɛ lɔɣɔrɔ ti nɛreba pɛɣɛ mam?’
Sɛla n nari ti ho mina ta’an maalɛ homea soŋa: Da ti’isera yɛla ayi ma’a yele n de, sitai paala (ti nɛreba bɔta) bii sitai kɛɣesi (ti nɛreba ka bɔta) ge tuɣum ti’isɛ yelese’ere n pa’asɛ butã wa bisɛ: Lɔɣeseto n wan basɛ ti ho nam homea ge ti dabeem kan tara hɔ. Ho san yɛ lɔɣɔrɔ ti homea bɔta ho ni ka le fabela ti, ho ka maalɛ homea wuu nɛreba n maalɛ bamesi se’em la.
Tuure #3: Ho san ti’isɛ ti ‘lɔɣeseto n wan basɛ ti nɛreba kɔresi bɔna ho poan n ani soŋa.’
“Pugela ayima yu’urɛ n de Jennifer yeti: “Yelemɛŋɛrɛ, saŋa ase’a ho ta’an ni bɔta ti ho yɛ sɛla a ka nari wana fii wa maɣesi wuu lɔɣeseto n ba’ɛ ana gi’a gi’a bii lɔɣeseto n ba’ɛ mɔbegɛ hɔ bii lɔɣeseto n ba’ɛ wɛɛla ho inya.”
Sɛla n wan soŋɛ hɔ: Baabule la yeti: “Da basɛ ya ti ya nɔnnɔm la dɛna yiŋa . . . ge basɛ ya ti la dɛna suɣelum poan yamam n ani se’em ya suuren.” (1 Peter 3:3, 4) Wuu Baabule la n pa’ali se’em la, ti’isɛ bisɛ nyaa, lɔɣeseto n tari ninpeelum n ani soŋa bii lɔɣeseto n pa’ali ti ho tari halisoma n ani soŋa.
Sɛla n nari ti ho mina ta’an maalɛ homea soŋa: Sɛla n wan ta’an soŋɛ hɔ ti ho ta’an maalɛ homea soŋa soŋa dela sirege n mea. Yelemɛŋɛrɛ, zina beere wa, nɛreba ka nɔŋɛ sirege n mea. Ge ti’isɛ yele wa bisɛ:
Hon tabelɛ sɔsɛ la nɛra n kɔ’ɔn tɔɣera zɔ’ɔra bii tɔɣera amea ma’a yele? Susa’aŋɔ yele la dela, nɛra la ta’an kan mina ti a yetɔɣum la daani ho mɛ!
Lɔɣɔrɔ yɛa ani wuu sɔsega la, la ta’an basɛ ti nɛreba puti’irɛ kɔ’ɔn bɔna ho poan ti ba kan lɛna hɔ
Ho san yɛ lɔɣɔrɔ n ka nari, ho ani wuu nɛra n pa’alɛ amea la. Ho lɔɣɔrɔ la n yeti nɛreba se’em dela, ‘bisɛ ya mam na’ ge bala ta’an basɛ ti nɛreba bisa ho yoo bii ti’isɛ ti ho ka ti’iseri nɛreba yele. La me ta’an basɛ ti nɛreba ti’isɛ ti ho boti la ba bisa hɔ bii ti’isa ho yele. Hali ba san puɣum tɔɣɛ ho yele sorese’ere n ka nari poan la ka pakɛ hɔ.
Da yɛɛra lɔɣɔrɔ n pa’alɛ ti ho koose la homea ge tuɣum yɛɛra lɔɣeseto n nari. Bunbilipaalega yu’urɛ n de Monica yeti: “La ka pa’alɛ ti, ho yɛɛra lɔɣɔrɔ wuu ho mayaaba la, ti la pa’alɛ ti ho yɛ sɛla n nari. Lɔɣeseto n nari vuurɛ dela, ho yɛɛra lɔɣeseto n bo’ori homea la nɛreba gilema.”
Ho Me Ta'an Bɔta Yele Ana
BUNBILIPAALESI SOKE YETI
Beni N Sɔi Ti La Ka Nara Ti Ho Tɔ’ɔsa TV Poan Yɛla N Tɔɣeri Nɛreba Yele Se’em?—Bɔberɛ 1: Pugeto Denɛ
Nɛreba zo’e zo’e ti’isɛ ti bamam bɔŋa boi la de to’ore ge yelemɛŋɛrɛ la dela, ba tɔɣeseri la sɛla ti to nyɛta TV poan la.
HO TADAANDOMA N TƆƔERI YELESE’A
Bunbilipaalesi N Tɔɣɛ Inaanɛ Yele Se’em
Beni n sɔi ti la kpe’em bo bunbilipaalesi ti ba tara putɛsonɛ la ba inaanɛ n ani se’em? Bem n wan soŋɛ hɔ?
