KƆ’ƆN PIGERA!
Beni N Sɔi Ti Nalɛɣerɛ Yɛla Basɛ Ti Yelesego Ba’ɛ Bɔna Bala?—Baabule La Yeti Bem?
Tingɔŋɔ wa zɛ’an woo, nɛreba zo’e zo’e kɔ’ɔn yɛlesa taaba mɛ nalɛɣerɛ yɛla zuo. Yuun 2022 Pew Research Center yuun viisɛ baŋɛ ti, “nɛreba 65% n boi tisi 19 poan yeti nɛreba n pa nalɛɣerɛ tigere to’ore to’ore pooren la zuo, nɔkpɛ’ɛma n kɔ’ɔn bɔna bamam tisi la poan.”
Hon gingilega la poan, hon nyɛ ti nalɛɣerɛ yɛla basɛ ti nɛreba yɛlesa la taaba? Beni n sɔi ti la ana bala? Bem n wan ta’an soŋɛ? Bisɛ Baabule la n yele sɛla.
Halese’a n basɛ ti nɛreba yɛlesa taaba
Baabule la yuun tɔɣɛ biŋe ti, tomam dabesa wa ti ba yi’ira ti ‘ba’asegɔ dabesa la’ poan, nɛreba wan tara halese’a n wan basɛ ti la kpe’em ti nɛreba tara nɔyinɛ.
‘Ba’asegɔ dabesa la poan la wan ta ana biɣi biɣi. Se’ere n sɔi la nɛreba wan nɔŋɛ bamesi, . . . ka tara nɔyinɛ.’—2 Timoti 3:1-3.
La boi bim ti nɛreba zo’e zo’e tiregeri mɛ ti ba soŋɛ gɔmɛtdoma ti ba basɛ ti nɔyinɛ bɔna ge bala ka tuni. Nɛreba n tari puti’ira to’ore to’ore kan ta’an naɛ taaba maalɛ yele. Baabule la n yuun yele sɛla la kɔ’ɔn dɛna la yelemɛŋɛrɛ.
‘Asaala n sɔi a tadaana bisera ge basɛ ti wuŋerɛ paara en.’—Pa’ala 8:9.
Ge Baabule la pa’alɛ sɛla n wan ta’an maalɛ yele la—la dela nɛra ayima gɔmɛt n wan ta’an yese yeledaaŋɔ la woo n paari asaaleba zina beere wa la basɛ.
Bisegadaana n fabeli nɛra woo yele
Baabule la pa’alɛ la bisegadaana ayima n wan ta’an maalɛ asaaleba yeledaaŋɔ: Yezu Krista. Naayinɛ bo Yezu yɔ’ɔ mɛ ge ti a me tara pansɛka n wan basɛ ti asaaleba woo tara nɔyinɛ la suma’asum. Yezu me kɔ’ɔn bɔta ti a eŋɛ la bala.
‘A saŋa la poan, tontɔɔ tuuma la suma’asum wan bɔna zɛ’an woo.’—Yooma 72:7.
‘Tisi woo wan tuna bɔ’ɔra en.’—Yooma 72:11.
Yezu dela bisegadaana n nari, se’ere n sɔi la a fabeli to yele mɛ ge me bɔta ti a soŋɛ nɛreba, yele yele wuu sɛba ti ba tum ba ŋmɛlema la.
‘A wan faaɛ sɛba n naseri ge kaasa ɛɛra soŋerɛ la basɛ, la tarendoma la se’em woo n ka tari soŋera la. A tari tarendoma la nasedoma giile mɛ ge me fãara nasedoma vom basa. A wan faaɛ ba namesegɔ la gbiregere tuuma poan basɛ.’—Yooma 72:12-14.
Zamesɛ pa’asɛ baŋɛ Naayinɛ saazuo Na’am la ti Yezu wan bisera la yele. Viisɛ baŋɛ Na’am la n wan ta’an soŋɛ ho se’em la hon wan eŋɛ sɛla pa’alɛ ti ho pa la bu pooren.
Bisɛ vidiyo la zuo n de Naayinɛ Na’am La Dela Bem?
Kaalɛ zaseŋɔ yele la zuo n de “God’s Kingdom—A Government With No Corruption” (Naayinɛ Na’am La Dela Gɔmɛt Sɛka N Ka Tari Ŋmɛlema Tuuma).
Ho Me Ta'an Bɔta Yele Ana
BAABULE YƐLA PA’ALEGƆ
Naayinɛ Na’am La Pɔsɛ Bisera La Yuun 1914
Yuuma n gaŋɛ 2,500 n tole ti Naayinɛ yuun basɛ ti nakãtɛ ayima zaasum nyɛ yele ti la nyaa tuna tuuma zina beere wa.
TO YƐLA
Mam Boti La Ya Wa’ana
Sɔsɛ ya sɛla n boi Baabule la poan bii ho zamesɛ Yehowa Sɛɛradoma yɛla pa’asɛ.
