1. Maleka la tɔɣeri la bem ge la vuurɛ dela bem bɔ’ɔra tɔ?

 LA SAN dɛna ti maleka n tɔɣeri bɔ’ɔra hɔ, ho wan kelese? Aatɔ zina beere wa, maleka n tɔɣeri bɔ’ɔra ‘tiŋa woo, yetɔɣum woo la nɛreba woo.’ A tɔɣeri la bem yɛla? “Zoti ya Naayinɛ ge bo ya en gilema. . . Pu’usɛ ya Se’emdaana n naam saazuo la tinparɛ wa la.’ (Lil. 14:​6, 7) Yehowa ma’a n de yelemɛŋɛrɛ Naayinɛ ti la nara ti nɛra woo pu’usa en. Bisɛ to puurɛ n pee se’em la eŋa n bo to yɔ’ɔ ti to pu’usa en a vo’osum pu’usegɔ yire la poan!

2. Bem n de Yehowa vo’osum pu’usegɔ yire la? (Bisɛ daka la zuo n de, “ Lan Daɣɛ Sɛla.”)

² Beni n de vo’osum pu’usegɔ yire la ge bɛsa ti to wan nyaŋɛ baŋɛ ku yɛla nima nima? Vo’osum pu’usegɔ yire la daɣɛ yimɛnka. La dela Yehowa n eŋɛ maaseŋɔ ti to ta’an pu’usa en soŋa soŋa doose Yezu lua bunɔ la poan. Tuuntuna Paul yuun tɔɣɛ la maaseŋɔ wa yele yuun kɔbesɛka n deŋɛ nɛŋa la poan, se’em ma’a ti a yuun gulesɛ gɔŋɔ ta bo Hebru Kristakɔma n yuun boi Yudea la. b

3-4. Bem yɛla n yuun pakɛ ti Paul tɔɣɛ bo Hebru Kristakɔma la n yuun kɛ̃’ɛri Yudea la ge la yuun soŋɛ ba la wani?

³ Beni n sɔi ti Paul yuun gulesɛ gɔŋɔ ta bo Kristakɔma n yuun kɛ̃’ɛri Yudea la? La ta’an dɛna yɛla ayi zuo. Yia la, la kpemese la ba giila. Ba yuun uge ba zo’e zo’e la Yudadoma pu’usegɔ poan. Ba pu’usegɔ nɛŋadoma yuun ta’an  ɛ̃regera ba la ban nyaa de Kristakɔma la. Beni n sɔi? Se’ere n sɔi la, Kristakɔma la yuun ka tari pu’usegɔ deo kãra ti ba wan pu’usa bim, ba yuun ka tari kãabegɔ bimbina ti ba wan ita kaabegɔ bɔ’ɔra Naayinɛ, ba me yuun ka tari malemadoma n wan pa’ala ba. Bala yuun ta’an kɔ’ɔsɛ Krista podɔleba la giila ti ba sakerɛ ma’ɛ. (Heb. 2:1; 3:​12, 14) Basɛba yuun ta’an bɔta ti ba le lebe Yuda pu’usegɔ la poan.

⁴ N yi’i, Paul yuun yele Hebru Kristakɔma la ti, ba ka tiregeri ti ba bɔkɛ vo’osum poan yelekãra n de ‘dikpe’eŋo’ n boi Naayinɛ Yelesum la poan la. (Heb. 5:​11-14) La niɛ peelumi ti basɛba yuun kelum dɔla la yelese’a n boi Moses Lɔɔ la poan la. Bala zuo, Paul yuun pa’alɛ ti lɔɔ la n pa’alɛ ti ba ita se’em la kan ta’an yese be’em basɛ. Bala zuo ti ba yuun ‘ka le dɔla’ lɔɔ la. Paul yuun nyaa pa’alɛ ba la yelekãra wa ase’a. A yuun tiɛ a mabiisi la ti ba tari la ‘beere sa’am putɛsonɛ’ doose Yezu lua bunɔ la poan n wan ta’an basɛ ti ba ‘vurege lɛm Naayinɛ.’—Heb. 7:​18, 19.

5. Bem yɛla n boi Hebru gɔŋɔ la poan ti la nara ti to bɔkɛ ge beni n sɔi?

⁵ Paul yuun tɔɣɛ pa’alɛ ti Hebru Kristakɔma la n yuun tee pu’usa Yehowa se’em la, nyani ban yuun pu’useri en se’em yia la. Yudadoma n yuun pu’useri en se’em la yuun dela ‘yilinyiliŋɔ ge yelese’a n wan ta wa’an pooren na la dela yelemɛŋɛrɛ la n de Krista la.’ (Kol. 2:17) Yilinyiliŋɔ pa’alɛ la lɔkɔ la n ani se’em ge daɣɛ lɔkɔ la mea. Bala mea nɔɔ ti Yudadoma n yuun pu’useri Naayinɛ se’em diimi sa la yuun pa’ala ban wan ta pu’usa en soŋa se’em beere sa’am. La nari ti to bɔkɛ maaseŋɔ seko ti Yehowa eŋɛ ti a di sugeri bo to, ti to ta’an pu’usa en wuu eŋa n boti se’em la. Basɛ ya ti to dekɛ yilinyiliŋɔ la n de Yudadoma pu’usegɔ la makɛ la yelemɛŋɛrɛ la za’a n de Kristakɔma pu’usegɔ ti Hebru gɔŋɔ la tɔɣɛ de yele la. Bala wan basɛ ti to bɔkɛ vo’osum pu’usegɔ yire la soŋa soŋa ge bisɛ de yele n pakɛ to se’em.

6. Ba yuun tari suɣerɛ la tuna tuuma la wani?

⁶ Israeldoma pu’usegɔ. Paul yuun tɔɣeri la suɣerɛ la ti Moses yuun tĩ yuun 1512 G.Y.B. poan la yele. (Bisɛ daka  la zuo n de, “Yudadoma Pu’usegɔ la Kristakɔma Pu’usegɔ.”) Suɣerɛ la yuun ani wuu tɛnti deo ti Israeldoma la yuun ni tara kena zɛ’an woo ti ba ye’a. Ba yuun dekɛ suɣerɛ la tum tuuma ta paɛ la yuun 500 ge ti ba nyaa ta mɛ pu’usegɔ deo la Yerusalem. (Yɛh. 25:​8, 9; Kan. 9:22) ‘Suɣerɛ la poan’ ti ba yuun ni laɣesa pu’usa Naayinɛ ge ita kaabegɔ bɔ’ɔra en. (Yɛh. 29:​43-46) Ge suɣerɛ yuun ze’ele bo la sɛla n wan ta gaŋɛ bala bɔ’ɔra Kristakɔma.

7. Sankani ti vo’osum pu’usegɔ yire la pɔsɛ tuna tuuma?

⁷ Kristakɔma pu’usegɔ. Suɣerɛ la yuun dela ‘saazuo lɔɣɔrɔ la yilinyiliŋɔ’ ge me ze’ele bo Yehowa vo’osum pu’usegɔ yire la. Paul yuun yeti, ‘suɣerɛ la bii tɛnti deo la dela sɛla n pa’ali tɔ nananawa.’ (Heb. 8:5; 9:9) Bala, sansɛka ti a yuun gulesɛ gɔŋɔ bo Hebrudoma la ti vo’osum pu’usegɔ yire la puɣum bɔna Kristakɔma poan mɛ. La yuun pɔsɛ tuna la yuun 29 Y.B. poan. Yuun denɛ ti Yezu yuun muse ko’om ti vo’osum la sige a zuo ti a yuun pɔsɛ dɛna Yehowa ‘malema kãtɛ nɛŋadaana’ vo’osum pu’usegɔ yire c la poan.—Heb. 4:14; Tm. 10:​37, 38.

8-9. Wuu Hebru 7:​23-27 n pa’alɛ se’em la, Israel malema nɛŋadoma la Malema kãtɛ nɛŋadaana Yezu Krista boi to’ore to’ore la wani?

⁸ Israeldoma pu’usegɔ. Malema nɛŋadaana la n yuun nari ti a ze’ele nɛreba la za’a na’arɛ Naayinɛ nɛŋa. Sansɛka ti ba yuun kã suɣerɛ la bo Yehowa la, ti Yehowa yuun loe Aaron ti a dɛna Israel malema nɛŋadaana n deŋɛ nɛŋa. Ge Paul yuun yeti, ‘malemadoma kekeko boi wunse’ere sa mɛ. Ban daa kiiri ti basɛba sɔɔsena tuna la n yuun sɔi ti ba zo’e bala la.’ d (Kaalɛ Hebru 7:​23-27.) Malema nɛŋadoma n yuun ka ani ma’a la zuo, ba yuun nari ti ba tara dusi kaabera duusa ba be’em. Wana wa basɛ ti to baŋɛ la Israel malema nɛŋadoma la Malema kãtɛ Nɛŋadaana Yezu Krista n boi to’ore to’ore se’em.

⁹ Kristakɔma pu’usegɔ. Yezu Krista, to Malema Nɛŋadaana la n de se’em n ‘tuni . . . yelemɛŋɛrɛ suɣerɛ la poan ti Naayinɛ tĩ ge daɣɛ nɛresaala.’ (Heb. 8:​1, 2) Paul yuun tɔɣɛ pa’alɛ ti, ‘Yezu n kɔ’ɔn vɔna wuusa ge me tuna a malema tuuma la n sɔi ti nɛra kan ta’an soe en la.’ Paul le tɔɣɛ pa’asɛ ti ‘a daa yese amea tuunse’a ti be’emdoma tuna tinparɛ wa zuo la mɛ.’ Ge a ka ani wuu Israel malema nɛŋadoma n yuun ani se’em la. ‘A ka nari ti a kuura dusi daarewoo’ duusa amea be’em. Nananawa basɛ ya ti to bisɛ ya Israeldoma kaabegɔ bimbina, la ban yuun iti ba kaabegɔ se’em la n boi de to’ore la Kristakɔma pu’usegɔ.

10. Ban yuun ni kaabɛ dusi nyɔɣum kaabegɔ bimbine la zuo la, ba yuun iti bala gura la bem?

¹⁰ Israeldoma pu’usegɔ. Suɣerɛ la nɔɔren, nyɔɣum kaabegɔ bimbine n yuun boi ti ba yuun kaabera dusi bini bɔ’ɔra Yehowa. (Yɛh. 27:​1, 2; 40:29) Ge ban yuun tari dusi kaabera la yuun kan ta’an duuse nɛreba la be’em basɛ. (Heb. 10:​1-4) Ban yuun kelum tara dusi kaabera  la, yuun dela sɛla ti ba ita gura kaabegɔ seko n wan ta duuse nɛresaaleba be’em za’a za’a basɛ.

11. Kaabegɔ bimbine kani ti Yezu yuun ki ka zuo? (Hebru 10:​5-7, 10)

¹¹ Kristakɔma pu’usegɔ. Yezu yuun mi ti, Yehowa tum en tiŋa wa zuo na ti a dekɛ a vom ti la dɛna la lua bunɔ bɔ’ɔra nɛresaaleba. (Mt. 20:28) Bala la, Yezu ko’om musega poan, a yuun dekɛ amea bo ti a tum la Yehowa n boti sɛla. (Yon 6:38; Ga. 1:4). Yezu yuun ka ki kaabegɔ bimbine sɛka ti nɛresaala mɛ la zuo. Ge a kum la yuun ze’ele bo la Naayinɛ n ‘boti sɛla’. Yezu yuun ki la ‘buyina’ duuse sɛba woo n tari sakerɛ la be’em. (Kaalɛ Hebru 10:​5-7, 10.) To wan le zamesɛ suɣerɛ la poan lɔɣɔrɔ la yele.

12. Bani n yuun wan ta’an kɛ̃ Zilam Bɔ’ɔ la, la Zilam Saraa la poan?

¹² Israeldoma pu’usegɔ. Suɣerɛ la, la pu’usegɔ deto la ti ba yuun ta mɛ Yerusalem la yuun wɔni la taaba. Ba yuun dekɛ la tanɛ beŋe deto bayi n yuun boi poan la, n de ‘Zilam Bɔ’ɔ’, la ‘Zilam Saraa’ la tiŋasuka. (Heb. 9:​2-5; Yɛh. 26:​31-33) Zilam Bɔ’ɔ la yuun tari la butolela zɛ’ɛlega, ko’ɛnka nyɔ̃’a bimbine la Naayinɛ boroboro teebule. ‘Malemadoma’ la ma’a n yuun ta’an ni kɛ̃ Zilam Bɔ’ɔ la poan ta tum tuuma. (Kan. 3:​3, 7, 10) Zilam Saraa la me tari la nɔbiŋere daka la, n ze’ele bo Yehowa bɔŋa. (Yɛh. 25:​21, 22) Malema nɛŋadaana’ la ma’a n yuun nari ti a kɛ̃ Zilam Saraa la poan yuunɛ woo, ta eŋɛ  Be’em Duusego kaabegɔ la. (Mal. 16:​2, 17) Yuunɛ woo, a ni dekɛ la dusi ziim kɛ̃ ta duuse amea be’em la Israel nɛreba la za’a be’em. Pooren, Yehowa yuun doose la a zilam vo’osum la poan pa’alɛ yelese’a n boi suɣerɛ la poan la vuurɛ.—Heb. 9:​6-8. e

13. Kristakɔma pu’usegɔ poan, Zilam Bɔ’ɔ la, la Zilam Saraa la n boi Suɣerɛ la poan la ze’ele bo la bem?

¹³ Kristakɔma pu’usegɔ. Krista podɔleba fii wa ti zilam vo’osum la loe ba ti ba tara bɔnsoŋa la Yehowa. Nɛreba 144,000 wa wan ta naɛ la Yezu saazuo sa dɛna malemadoma. (Lil. 1:6; 14:1) Suɣerɛ la poan Zilam Bɔ’ɔ la ze’ele bo la Naayinɛ n dekɛ a vo’osum loe sɛba ti ba dɛna a kɔma ban kelum bɔna tiŋa wa zuo la. (Arom 8:​15-17) Suɣerɛ la poan Zilam Saraa la ze’ele bo la saazuo, zɛ’an ti Yehowa kɛ̃’ɛra la. ‘Tanɛ’ la n beŋe Zilam Bɔ’ɔ, la Zilam Saraa la ze’ele bo la Yezu mea inya ti a kan ta’an dekɛ dɛ keŋɛ saazuo ta dɛna vo’osum poan pu’usegɔ yire la Malema kãtɛ Nɛŋadaana la. Yezu n yuun dekɛ amea kaabɛ bo asaaleba la, a yuun yu’ɛ la sore bo Kristakɔma n de looredoma la ti ba keŋɛ saazuo. Ba me yuun nari ti ba ki mɛ ta’an keŋɛ saazuo. (Heb. 10:​19, 20; 1 Ko. 15:50) Yezu n yuun ta isige a kum la poan la, a yuun kɛ̃ la vo’osum poan pu’usegɔ deo la n de Zilam Saraa la poan. Bilam ti looredoma la wan ta naɛ la en bɔna.

14. Wuu Hebru 9:​12, 24-26 n pa’alɛ se’em la, beni n basɛ ti Yehowa n maasum vo’osum pu’usegɔ yire la se’em la bɔna de to’ore?

¹⁴ Bala basɛ ti to baŋɛ Yehowa n eŋɛ maaseŋɔ se’em ti la di mi’a ti yelemɛŋɛrɛ pu’usegɔ bɔna doose la Yezu Krista lua bunɔ la, la eŋa n de malema nɛŋadaana la. Israel malema nɛŋadaana la ni dekɛ la dusi ziim kɛ̃ Zilam Saraa la n boi Suɣerɛ la poan la. Ge Yezu yuun kɛ̃ la saazuo mɛŋa sa, zɛsɛka n ani zilam gana za’a ta bɔna Yehowa zɛ’an. Bilam ti a dekɛ amea vom la n ani kasi la ti la dɛna lua bunɔ bo Yehowa ‘ti a yese be’em basɛ.’ (Kaalɛ Hebru 9:​12, 24-26.) Yezu kaabegɔ la ma’a n wan ta’an yese be’em za’a za’a basɛ. Wuu ton wan zamesɛ sɛla zaseŋɔ sɛka n taɣelɛ la, la ka pakɛ la ton wan keŋɛ saazuo bii to bɔna tingɔŋɔ wa zuo, to za’a wan laɣum pu’usa Yehowa a vo’osum pu’usegɔ yire la poan.

15. Bani n yuun tuni suɣerɛ la zinzaka la poan?

¹⁵ Israeldoma pu’usegɔ. Suɣerɛ la yuun tari la zinzaka ayima, zɛ’an ti malemadoma la yuun tuna ba tuuma. Nyɔɣum lakãtɛ la ti malemadoma la tara pɛɛra bamesi ge nyaa tuna ba tuuma la, la nyɔɣum kaabegɔ bimbine kãtɛ la yuun boi la zinzaka la poan. (Yɛh. 30:​17-20; 40:​6-8) Pu’usegɔ yɛa la me ti ba yuun mɛ pooren la yuun tari la zinzaɣesi ti sɛba n daɣɛ malemadoma la ni kɛ̃’ɛra bini pu’usa Naayinɛ.

16. Bani n yuun boi vo’osum pu’usegɔ yire la zinzaɣesi la poan tuna?

¹⁶ Kristakɔma pu’usegɔ. Ge ti looredoma sɛba n gee la nyaa keŋɛ saazuo ta naɛ la Yezu dɛna malemadoma la, ba tari la sakerɛ pu’usa Naayinɛ vo’osum pu’usegɔ yire la zinzaka la poan. Ko’om lakãtɛ la tiiseri ba la ninmɔ’ɔrɛ yele ti, Kristakɔma woo nari ti ba ana fa’a ba sareŋɔ la ba vo’osum poan. ‘Nɛrekuuŋɔ’ la boi la bɛ  pu’usa Naayinɛ? Tuuntuna Yon nyɛ la sɛba n tari yelemɛŋɛrɛ soŋera Yezu suurɔ la ti ba ‘zɛ’a na’am kuka la nɛŋan’ n de tinparɛ wa zuo, zinzaka la yiŋa. Bilam ti ‘ba pu’usera Naayinɛ wuntɛɛŋa la yu’uŋɔ za’a pu’usegɔ yire la poan.’ (Lil. 7:​9, 13-15) To puurɛ pee mɛ la Yehowa n bo to yɔ’ɔ ti to bɔna a pu’usegɔ yire la poan pu’usa en la!

17. To tari yɔ’ɔ ti to eŋɛ la bem bo Yehowa?

¹⁷ Zina beere wa, Kristakɔma tari yɔ’ɔ mɛ ti ba dekɛ ba saŋa, ba paŋa la ba nutatum soŋɛ Naayinɛ pu’usegɔ. Wuu tuuntuna Paul n yuun yele Hebru Kristakɔma la se’em la, to wan ta’an ‘pɛ̃ɣera Naayinɛ ge dekɛ to nɔɔrɛ wa tɔɣɛ a yɛla bo nɛreba ti ba baŋɛ a yu’urɛ la ti la dɛna kaabegɔ bo en.’ (Heb. 13:15) To san tiregɛ la to paŋa za’a pu’usa Yehowa, la wan pa’alɛ ti to nini tiɣɛ ya la yɔ’ɔ wa ti to tara la.

18. Wuu Hebru 10:​22-25 n pa’alɛ se’em la, bem ti la ka nara ti to tamɛ?

¹⁸ Kaalɛ Hebru 10:​22-25. Paul gɔŋɔ la ti a gulesɛ ta bo Hebru Kristakɔma la ba’asegɔ bɔba la, a tɔɣɛ pa’alɛ la yelese’a n ka nari ti to tamɛ ba to pu’usegɔ poan. Yele ana wa dela ton wan zusa Yehowa, tɔɣera to beere sa’am puti’irɛ la yele bɔ’ɔra nɛreba, laɣum kena tansugere zamesegɔ ge kpɛmesa taaba giila, ‘yele yele wuu Yehowa dabeserɛ la n pɔrɛ la.’ Liligere gɔŋɔ la ba’asegɔ bɔba la Yehowa maleka la taɣesɛ la yele dena wa sugumnɔɔrɛ buyi ti, ‘Pu’usa Naayinɛ!’ (Lil. 19:10; 22:9) Da basɛ ya ti to tamɛ ya vo’osum poan yelekãra la ge me basɛ ti to puurɛ pee la ton tari yɔ’ɔ pu’usa to Naayinɛ Yehowa vo’osum pu’usegɔ yire la poan la!