YUUMA ase’a n tole la ho yuun san keŋɛ ni Sangir Besar island n boi Indonesia, ho yuun wan nyɛ to mabipɔɣesi batã n boi ateko nɔɔren tuna. Ba mi to mabipɔɣesi wa mɛ island la poan la ban tuni na’am mɔɔlegɔ tuuma se’em soŋera nɛreba ti ba bɔkera Baabule la. Ge saŋa kasɛka, ba yuun tuni la tuunɛ n boi de to’ore.

Yia, ba ni sige la ateko la poan ta ɔ̃bera kuga dɔɔra biŋera kulega la nɔɔren. Kuga la ase’a kãregɛ zuna la boole. Leyɛ’ɛsa, pɔɣesi la ni zĩ’a la dɔɔrɔ kuɣesi zuo ge tara hama kɛresa kuga la ti ba zuna wuu gɛla. Ba ni dekɛ kuga wa eŋɛ la bɔɣera poan, tari doose kura zuo zom ban kɛ̃’ɛri zɛ’an la. Ba nyaa ni dekɛ kuga wa sũ la bɔra kãra poan dekɛ eŋɛ tipa pika poan ti ba tari ta maala pala.

Hulda pa’asɛ la pɔɣesi wa poan. A yuun tari la yɔ’ɔ tuna zɔ’ɔra gana pɔɣesi bana la. A ni dekɛ ligese’a ti a nyɛta la diisa la a deodoma. Ge a nyaa tari la puti’irɛ ti a eŋɛ sɛla. A boti la a da tablet ti a wan ta’an ve’e JW Library^® eŋɛ bim. Hulda mi ti vidiyodoma la, la yelese’a n boi JW Library^® poan la wan soŋɛ en ti a ta’an bɔkɛ Baabule la soŋa ge me ta’an pa’ala na’am mɔɔlegɔ poan.

Hulda yuun ni dekɛ la awa ayi tuna bulika woo ta paɛ ŋmarega, la girego wɔ̃ta kuga n wan ta’an pirɛ tipa pika. A nyaa nyɛ laɣehɔ n wan ta’an da tablet.

Hulda yeti, “La boi bim ti mam n yuun wɔ̃ti kuga la, mam yuun ni taregɛ mɛ ti mam nu’usi puɣelum. Ge se’em ma’a ti mam yuun nyɛ tablet n wan ta’an soŋɛ mam na’am mɔɔlegɔ poan ge maasum keŋɛ zamesegɔ la, mam yuun tamɛ too sebo woo n yuun paɛ mam la mɛ.” A le yeti, se’em ma’a ti bã’a la yuun wi’ira la, tablet la yuun soŋɛ en mɛ paa se’ere n sɔi la, tansugere la yuun iti sɛla woo la zoom poan. To puurɛ pee mɛ la Hulda n nyɛ eŋa n boti sɛla la.