Yehowa, pupeelum Naayinɛ la n tari yelesoma la, boti la deodoma woo tara pupeelum. (1 Timoti 1:11) Eŋa n basɛ ti pɔɣedire bii sire ele bɔna. Pɔɣedire bii sire ele n doose teŋa la kisa n de se’em la, basɛ ti deodoma bɔna la fai bisa ba kɔma soŋa soŋa. Kristakɔma dela ba doose pɔɣedire bii sire ele kisa n de se’em la eŋɛ ba gɔnɔ.​—Kaalɛ Luke 2:​1, 4, 5.

Naayinɛ puti’irɛ dela bem pɔɣedire bii sire ele poan? Naayinɛ boti la buraa la pɔɣa laɣum naɛ taaba bɔna ka tara basega.Yehowa boti la sireba la pɔɣeba tara yelemɛŋɛrɛ bɔ’ɔra taaba. (Hebru 13:4) A yaɛ pɔɣedire bii sire ele basega mɛ. (Malaki 2:16) Ge a bo fole ti Kristakɔma ta’an basɛ taaba ba se’em san tum yalumtuuma.​—Kaalɛ Matu 19:3-6, 9.

Yehowa naam buraasi la pɔɣesi ti ba soŋera la taaba pɔɣedire bii sire ele poan. (Pin’ileŋɔ 2:18) Sira n de zuodaana la dela a ugura ge pa’ala a deodoma Naayinɛ yɛla. A dela a tara nɔŋerɛ n di mi’a bɔ’ɔra a pɔɣa. Sireba la pɔɣeba dela ba tara nɔŋerɛ la na’asegɔ bɔ’ɔra taaba. Sireba la pɔɣeba n ka ani kasi la, dela ba dita sugurum bɔ’ɔra taaba ti pupeelum bɔna ba pɔɣedire bii sire ele la poan.​—Kaalɛ Epesus 4:31, 32; 5:22-25, 33; 1 Peter 3:7.

Ho san bisɛ ti yeledaaŋɔ boi ho pɔɣedire bii sire ele poan, la dela ya tara nɔŋerɛ bɔ’ɔra taaba. (1 Korint 13:4, 5)  Naayinɛ Yetɔɣum la ka boti nɛra la a pɔɣa yelege taaba pɔɣedire bii sire ele yeledaaŋɔ zuo.​—Kaalɛ 1 Korint 7:10-13.

Yehowa boti ya tara la pupeelum. Eŋa n bɔ’ɔre ka’aŋɔ n wan soŋɛ ti ho vom ana soŋa ho bunbilipaalega poan. A boti la ho nyɛ nyuurɔ yese yelese’a ti ho dɔɣereba mina ge tara yɛm a poan la. (Kolose 3:20) Yehowa le bɔta la ho tara pupeelum tuna bɔ’ɔra eŋa, ho Naaŋɔ Daana la a Dayɔa n boti se’em la.​—Kaalɛ Pa’ala 11:9–12:1; Matu 19:13-15; 21:15, 16.

La dela ho tirege tuna ta’an bɔ’ɔra ba dia, lɔɣɔyɛɛtɔ la ba wan ga’arɛ ze’an. (1 Timoti 5:8) Ge ho kɔma wan tara pupeelum dela, hon pa’alɛ ba Naayinɛ yɛla ti ba tara nɔŋerɛ bɔ’ɔra en. (Epesus 6:4) Ho san tara nɔŋerɛ bɔ’ɔra Naayinɛ la wan kɛ̃ ho kɔma suure. Ho san pa’ala ba Naayinɛ Yetɔɣum, la wan basɛ ti ba tara putɛsonɛ ba itigɔ poan.​—Kaalɛ Tɛɛnhegɔ 6:4-7; Magaha 22:6.

Ho san kpemesa kɔma giila ge pɛɣera ba, ba puurɛ ni pee mɛ. La me dela ho ka’ana ge dɔlegera ba tuba. Ya san kumesɛ ba bala, la wan soŋɛ ba ti ba yese sarumbe’ero poan. (Magaha 22:15) Ge tubedɔlegere daɣɛ ho vɛɣena bii ho ita ba ho boti se’em.​—Kaalɛ Kolose 3:21.

Yehowa Sɛɛradoma gulesɛ la gɔnɔ wana mɔpi n wan ta’an soŋɛ dɔɣereba la ba kɔma. Ba dekɛ la Baabule la gulesɛ gɔntona wa.​—Kaalɛ Yooma 19:7, 11.