ZASEŊƆ 8
Beni N Sɔi Ti Naayinɛ Basɛ Ti Be’em La Namesegɔ Bɔna?
1. Be’em pɔsɛ la wani?
Naayinɛ n basɛ ti nɛresaaleba dekɛ saŋa zo’e zo’e bisɛ teŋgɔŋɔ wa la, eŋɛ pa’alɛ ti ba kan nyaŋɛ maalɛ asaala yɛla
Sitaana pumpɔrema la n pɔsɛ tari be’em wa’an teŋgɔŋɔ wa zuo na. Sitaana yun dela malaka n ani kasi ge “a ka tare yelemɛŋɛrɛ.” (Yon 8:44) A yun boti la ba tuɣum pu’usa eŋa ge daɣɛ Naayinɛ. Sitaana yun pã’ãsɛ Hawa ti a nam en ge zaɣesɛ Naayinɛ. Adam yun naɛ la Hawa zaɣesɛ Naayinɛ nɔɔrɛ. Adam n yun eŋɛ a puti’irɛ n boti se’em la n basɛ ti namesegɔ la kum kuura to wa.—Kaalɛ Pin’ileŋɔ 3:1-6, 19.
Sitaana n yun yeti Hawa zaɣesɛ Naayinɛ la, a yun pɔsɛ ita la kpenkpasi la Naayinɛ n tari sore ti a bisa to la. Nɛreba zo’e zo’e tuɣum naɛ la Sitaana zaɣesɛ Naayinɛ n de Kpe’eŋɔ Za’a Daana la. Bala, Sitaana nyaa dela “se’em n sɔe teŋa wa zuo behera.”—Kaalɛ Yon 14:30; 1 Yon 5:19.
2. Tuure boi Naayinɛ naaŋɔ poan?
Sɛla woo ti Naayinɛ naam la ka tari tuure. Naayinɛ yun naam nɛreba la malakadoma ti ba ta’an nana en ge ka tuura. (Tɛɛnhegɔ 32:4, 5) Naayinɛ yun naam to mɛ ti to bɔna fai mina sɛla n ani soŋa la sɛla n ka ani soŋa. To boi fai bɔŋa la basɛ ti to ta’an ita pa’ala ti to nɔŋɛ Naayinɛ.—Kaalɛ Yames 1:13-15; 1 Yon 5:3.
3. Beni n sɔi ti Naayinɛ basɛ ti namesegɔ bɔna ta paɛ zina?
Kɔ’ɔn pɔsɛ Eden poan, Yehowa n bo fole ti ba eŋɛ kpenkpasi la a so’olum la. Bem zuo ti a bo fole? Ti a basɛ ti asaala mina ti bisega ka boi n wan tara nyuurɔ bɔ’ɔra nɛreba. (Pa’ala 7:29; 8:9) Asaala dekɛ la yuun 6,000 n wana bisa ge ka nyaŋɛ loe yele. Nɛresaala bisegadoma ka nyaŋɛ yese zaberɛ, be’em, ŋmɛlema tuuma bii bã’ãsi basɛ.—Kaalɛ Yeremia 10:23; Arom 9:17.
Sɛba n sakɛ bo Naayinɛ bisega la wan nyɛ nyuurɔ gana nɛresaala bisega. (Isaiah 48:17, 18) La kan yue Yehowa wan sa’am asaala gɔmɛt woo. Nɛresɛba n sakɛ ti Naayinɛ bisa ba la ma’a n wan soe teŋgɔŋɔ wa bɔna.—Isaiah 11:9; Kaalɛ Daniel 2:44.
Bisɛ Beni N Sɔi Ti Naayinɛ Bo Yɔ’ɔ Ti Namesegɔ Bɔna? vidiyo la
4. Naayinɛ sugurum dia la bo yɔ’ɔ ti to ita la bem?
Sitaana parum ti nɛra ka boi n wan pu’usɛ Yehowa san daɣena la eŋa n bo’ore ba sɛla la zuo. Ho wan bɔta ti ho eŋɛ pa’alɛ ti la daɣɛ yelemɛŋɛrɛ? Ho ta’an eŋɛ bala! Naayinɛ n tari sugurum la boti la yɔ’ɔ ti to eŋɛ pa’alɛ nyaa to boti la eŋa bisega bii asaala. To vɔi to vom se’em la n pa’alɛ mina ti to bɔta.—Kaalɛ Yob 1:8-12; Magaha 27:11.
5. To wan eŋɛ la wani pa’alɛ ti Naayinɛ n de to Bisega Daana?
To loe se’em la n wan pa’alɛ nyaa to boti Naayinɛ ti a dɛna to Bisega Daana
To san zamesa ge pu’usa Naayinɛ yelemɛŋɛrɛ poan wuu a Yetɔɣum, Baabule la n yele se’em la, to pa’alɛ ti Naayinɛ n de to Bisega Daana. (Yon 4:23) To ta’an saɣesɛ Sitaana wuu Yezu n yun eŋɛ se’em la ge yese tomea nalɛɣerɛ la zaberɛ poan.—Kaalɛ Yon 17:14.
Sitaana basɛ ti yalumtuuma la tuunbe’ero ani wuu la dela yelesonɛ la. To zɔdoma la to sɔɔrɔ ta’an ɛregera to mɛ to san zaɣesɛ tum ana wa. (1 Peter 4:3, 4) La dela tomea bisɛ to wan loe sɛla. To wan bɔta ti to dekɛ tomea laɣum la nɛresɛba n nɔŋɛ Naayinɛ? To wan nana a kisa la a yɛm ka’aŋɔ la? To san ita bala, to wan basɛ ti sitaana baŋɛ ti a parum mɛ la eŋa n yeti, la san wuŋɛ to nɛra ka boi n wan pu’usɛ Naayinɛ la.—Kaalɛ 1 Korint 6:9, 10; 15:33.
Naayinɛ n nɔŋɛ asaala se’em la pa’alɛ ti be’em la namesegɔ kanle bɔna. Sɛba n iti pa’ala ti ba tari sakerɛ la wan nyɛ la vom n ani soŋa teŋgɔŋɔ wa zuo daarewoo.—Kaalɛ Yon 3:16.
