To Naaŋɔ Daana tari yɛm gana to. A dela Sɔ n nɔŋɛ to yele la n sɔi ti a bisa to. Leyɛ’ɛsa, a ka naam to ti to sɔna tomea bisa. (Yeremia 10:23) Maɣesɛ wuu bia n nari ti a dekɛ a mea delum a dɔɣereba se’em la, bala mea nɔɔ ti to za’a waabi me nara ti to dekɛ tomea delum Naayinɛ. (Isaiah 48:17, 18) Baabule naresum yɛla dela Naayinɛ bo’olum n gu’ure to.​—Kaalɛ 2 Timoti 3:16.

Yehowa kisa la a naresum yɛla n pa’alɛ to bɔnsɛka n ani soŋa nananawa, la to wan nyɛ daarewoo nyɔvore se’em beere. Dene zuo, Naayinɛ n de to naaŋɔ daana la n sɔi ti la nara to nini tiɣɛ la en bisɛ to se’em la.​—Kaalɛ Yooma 19:7, 11; Liligere 4:11.

Baabule naresum yɛla dela yelemɛŋɛrɛ n ka tari bu’urɛ. Ge kisa mɛ ni pa’alɛ la sɛla wana mɔpi n nari. (Tɛɛnhegɔ 22:8) La dela to ti’isa zaara ge bɔkera to wan eŋɛ se’em tara naresum to zi’irego poan. (Magaha 2:10-12) Makerɛ n wana, Baabule la pa’alɛ ti vom dela Naayinɛ bo’olum. Naresum yele wa wan ta’an basɛ ti to mina to wan ana se’em to tuuma ze’an, to yɛa poan la to ye sore. La basɛ ti to ta’an lɔɣesa la tomea.​—Kaalɛ Tooma 17:28.

Yezu yun tɔɣɛ la naresum yɛla toyi n de ninmɔ’ɔrɛ. Naresum yele n deŋɛ nɛŋa la tɔɣere la asaala vom yele—n de to mina Naayinɛ, to nɔŋɛ en ge tara sakerɛ pu’usa en. Naresum yele dena wa dela to tɛra de to  san ita sɛla woo. (Magaha 3:6) Sɛba n dekɛ naresum yele wa tuna tuuma la n wan dɛna Naayinɛ zɔdoma, tara pupeelum ge wan nyɛ daarewoo nyɔvore.​—Kaalɛ Matu 22:36-38.

Naresum yele n pa’asɛ buyi la wan ta’an soŋɛ to ti suma’asum bɔna tomam la nɛreba teŋasuka. (1 Korint 13:4-7) To san dekɛ naresum yele n pa’asɛ buyi wa tum tuuma, to tɔɣesere la Naayinɛ n tari nɛreba puti’irɛ se’em la.​—Kaalɛ Matu 7:12; 22:39, 40.

Baabule naresum yɛla basɛ ti deodoma tara la nɔŋerɛ bɔna la taaba. (Kolose 3:12-14) Naayinɛ Yetɔɣum la le te’ela deodoma doose la naresum yele kuyima mɛ—ti sireba la pɔɣeba ka tari ba basɛ taaba.​—Kaalɛ Pin’ileŋɔ 2:24.

To san dɔla Baabule pa’alegɔ, la wan soŋɛ to ti to ta’an tara tomea soŋa la to lɔɣɔrɔ. Makerɛ n wana, sɛba n dekɛ nɛreba ti ba tuna bɔ’ɔra ba ni bɔta la sɛba n doli Baabule naresum yɛla n pa’alɛ ti to mɔ’ɛ nini ge dɛna birikindoma la. (Magaha 10:4, 26; Hebru 13:18) Naayinɛ Yetɔɣum la le pa’ala to ti to basɛ ti lɔɣɔse’a ti to tara la seke to ge basɛ ti tomam la Naayinɛ bɔŋa la gana sɛla woo.​—Kaalɛ Matu 6:24, 25, 33; 1 Timoti 6:8-10.

To san dekɛ Baabule naresum yɛla tuna tuuma, la wan basɛ ti to tara imma’asum. (Magaha 14:30; 22:24, 25) Makerɛ n wana, to san dɔla Naayinɛ n pa’alɛ to ti to da bugera daam la te’ele to mɛ yɛsa ba’asi la pɔɣeleŋɔ poan. (Magaha 23:20) Yehowa bo to yɔ’ɔ ti to nyuura daam ge a boti to nyuura makera mɛ. (Yooma 104:15; 1 Korint 6:10) Naayinɛ naresum yɛla soŋere to mɛ ti to nyɔkera tomea la yelese’a ti to ita ge ti’isa. (Yooma 119:97-100) Ge yelemɛŋɛrɛ Kristakɔma ka doli Naayinɛ pa’alegɔ la ba wan nyɛ nyuurɔ ma’a la zuo. Ba iti bala na’asa la Yehowa.​—Kaalɛ Matu 5:14-16.