Si ikatu. Ñandejára ojepyʼapy umi isiérvo hasykatúvare. La Biblia heʼi voi: “Oúramo hasyete ha opyta tupápe, Jehová ndohejamoʼãi chupe” (Salmo 41:3). Oiméramo nde aréma nderasykatu koʼã mbohapy mbaʼe jahechátava tuichaiterei nepytyvõta:

1.   Ejerure Ñandejárape tanepytyvõ reaguanta hag̃ua. Ñandejára ningo ikatu nepytyvõ netrankílo hag̃ua upéva pe situasiónpe ha ani hag̃ua rejepyʼapyeterei (Filipenses 4:6, 7).

2.   Eñehaʼã ndepositívo. La Biblia heʼi: “Peteĩ korasõ ovyʼáva, peteĩ pohã ñanemongueráva hína” (Proverbios 17:22). Eñehaʼãramo evyʼakuaa ha ejediverti mimi, upéva nepytyvõta ani hag̃ua remboguapyeterei ndejehe la situasión ha nderetiaʼe hag̃ua.

3.   Ekonfia Ñandejára promesakuérare. Jarekóramo esperánsa ningo ifasilve ñaaguanta hag̃ua umi mbaʼasy (Romanos 12:12). La Biblia opromete: “Ni peteĩ oikóva ko yvy ape ári ndeʼimoʼãvéima: ‘Cherasy hína’” (Isaías 33:24). Oĩ ningo mbaʼasy umi doktorkuéra ndaikatúiva gueteri omonguera, péro Ñandejára oipeʼáta opaichagua mbaʼasy. Ha ndahaʼéi voi upévante, la Biblia opromete avei koʼẽrõite umi ijedáva imitã jeytaha. Upévare Job 33:25-pe heʼi voi: “Ikuérpo tahesãive pe imitãrõ guarégui, taimbarete jey imitãrõ guaréicha”.

 Nóta: Ore testígo de Jehová rojerovia Ñandejára siémpre ikatuha ñanepytyvõ, upéicharamo jepe orerasykatúramo roho doktórpe ha rosegi umi tratamiénto tekotevẽramo (Marcos 2:17). Péro nororrekomendái avavépe mbaʼe tratamiéntopa osegi vaʼerã pórke káda uno odesidi vaʼerã upéva.