Akakuaa vaʼekue peteĩ várrio mboriahúpe, siuda de Montreálpe. Areko 7 ermáno ha che haʼe la pahague. Che sy oremongakuaa haʼeño, pórke che túva omano che arekórõ guare 6 mése.

Chemitãʼi guive voi che añepyrũ ajedroga, cheviolénto, ajeheʼa umi mafiósore ha chehugadór. Arekópe 10 áño, ambaʼapo umi prostitúta ha usurérope g̃uarã, aiko isekretarioʼíramo. Pyʼỹi chejapu ha ambotavyseterei voi che rapichápe, chevisioite vaʼekue upéva.

Arekópe 14 áño, chevaletereíma voi aporombotavy hag̃ua. Ha kómo aganaseterei la pláta, añeinhenia voi ajapo hag̃ua upéva. Por ehémplo, ajoguámi heta rrelój, pulséra ha kuãirũ vañádo en óro, ha amoĩ hese haʼeha óro de 14 kiláte. Upéi asẽ avende kállere ha umi shopping estasionamiéntope. Peteĩ vuéltape, un díapente agana 10.000 dólar voi.

Che aiko vaʼekue peteĩ rreformatóriope, péro arekópe 15 áño añemosẽ upégui, ha ndaikuaái vaʼekue ni moõpa aháta. Apytámi vaʼerã ake umi kálle ha plasaháre, ha sapyʼánte algún konosído chegueraha hendive hógape.

Umi polisía ningo hetaiterei vése chejagarra, péro ndaikatúi chemoinge hikuái kárselpe pórke, ambotavýramo jepe umi héntepe, navendéi chupekuéra artíkulo rrovádo. Upéicharõ jepe, heta vése tuicha añemulta upéva káusare ha avei ambaʼevende haguére permisoʼỹre. Che ndakyhyjéi vaʼekue voi avavégui, upévare ambaʼapo jepe umi mafiósondi ha avei de kovradór umi usurérope g̃uarã. Upéva ningo ipeligrosoiterei, ha sapyʼánte arahámi voi chejehe peteĩ árma.

Arekópe 17 áño primera ves ahendu la Bíbliagui. Upérõ aiko vaʼekue peteĩ mitãkuñándi ha haʼe oñepyrũ ostudia umi testígo de Jehovándi. Péro che ndaikoséi vaʼekue la Biblia heʼiháicha, upévare aheja chupe. Che ajotopáma voi aikóvo kuri ótro kuñándi, ha upémarõ aha aiko hendive.

 Péro haʼehaitéma oñepyrũ ostudia umi testígo de Jehovándi. Chesorprende mbaʼeichaitépa okambia ostudia rire la Biblia, tuicha ivuenave ha ipasiensiave. Upémarõ aha hendive peteĩ rreunión ojapóvape umi testígo de Jehová peteĩ Salón del Réinope. Umi hénte upepegua ijedukádo, ikalida ha cherresivi porãiterei. ¡Haʼete ótro mundoitépe mbaʼe aikéva! Chemitã aja ni che famíliape ndaipóri vaʼekue chemokunuʼũ ha cheguerohorýva. Upévare, añeñandu porãiterei umi testígo de Jehová apytépe, primera ves peichaite peve avyʼa. Ha oporandúrõ guare chéve hikuái astudiasépa la Biblia, pyaʼe voi aasepta.

Umi mbaʼe aaprende vaʼekue chesalvaite. Che adeve vaʼekue huégo káusare mas de 50.000 dólar. Ha mokõi che sósiondi roplanea hína kuri rojapo peteĩ asálto apaga hag̃ua che kuénta. Péro upéi che aguevi jey. ¡Avyʼaiténgo adesidi haguére upéva! Umi che sósio okontinua péro osẽ vai la plan, peteĩva oho préso ha pe ótrope ojejuka.

Asegívo astudia la Biblia, ahechakuaa tekotevẽha akambia hetaiterei mbaʼépe. Por ehémplo, aaprende mbaʼépa heʼi 1 Corintios 6:10-pe: “[Umi] omondáva, itaryrýiva, ikaʼúva, otakýva hapicháre [ha] ombotavýva hapichápe, [...] ndoikemoʼãi Ñandejára Rréinope”. ¡Cherasẽ aleévo pe versíkulo! Ahechakuaa ivaietereiha la che situasión. Che ningo cheviolénto ha aiko vaisénte vaʼekue voi, ha tóda la vída ambotavy vaʼekue la héntepe. Ahechakuaa tekotevẽha akambiaite aiko lája (Romanos 12:2).

Péro astudiávo la Biblia aaprende avei mbaʼeichaitépa Ñandejára ñandeporiahuvereko ha ñaneperdona (Isaías 1:18). Añemboʼe Jehovápe che pyʼaite guive ha ajerure chupe tachepytyvõ ahejaite hag̃ua umi mbaʼe vai ajapóva. Haʼe ohendu che orasión ha chepytyvõ akambia hag̃ua mbeguekatúpe. Upérõ che rembireko ha che roiko vaʼekue oñondive romendaʼỹre, ha rodesidi romenda ikatu hag̃uáicha rokumpli Ñandejára ojeruréva.

Romendárõ guare areko vaʼekue 24 áño ha roguerekóma mbohapy mitã. Upévare tekotevẽ kuri aheka che travahorã iñonrradomíva. Che ndarekói vaʼekue ni peteĩ título ha ndaipóri avave omeʼẽ vaʼerã rreferénsia porã cherehe. Upémarõ añemboʼe Jehovápe chepytyvõ hag̃ua. Che aikuaa kuri ijetuʼutaha akonsegi hag̃ua che travahorã, upévare añeadelantáma voi ha amombeʼu umi chentrevistávape che astudiaha hína la Biblia ha akambiaseha. Péro lomímonte avave nachemombaʼaposéi. Heta ajeporeka rire, ag̃uahẽ peteĩ karai rendápe ha aexplika porã avei chupe mbaʼeichagua persónapa kuri che. Pe karai heʼi chéve: “Ndaikuaái mbaʼérepa, péro álgo heʼi chéve rokontrata vaʼerãha”. Upépe ahechakuaa Jehová ohendu hague che orasión. Añepyrũ ambaʼapo hendive, ha kon el tiémpo che rembireko ha che rojevautisa ha oiko orehegui testígo de Jehová.

Ndajapóirire la Biblia heʼíva ha ndaikóirire Ñandejára oipotaháicha, amanóma vaʼerãmoʼã. Koʼág̃a aguereko peteĩ família iporãitereíva ha avyʼa hendivekuéra. Avei chekonsiénsia potĩ, aikuaágui Jehová cheperdonamaha.

Umi 30 áño ohasa vaʼekuépe, 22 persónapema aipytyvõ che travahohápe oiko hag̃ua chuguikuéra testígo de Jehová. Ha ojapóma 14 áño añepyrũ hague apredika amo 70 órarupi káda mes. Péicha aipytyvõ umi héntepe oaprende hag̃ua la Biblia omboʼéva. Ndaʼaréi che rembireko oñepyrũ hague avei ojapo upéva. Koʼág̃a peve aha jepi umi shóppingpe, péro ndahaʼevéima aporombotavy hag̃ua, síno ameʼẽ hag̃ua esperánsa umi héntepe. Amombeʼu chupekuéra koʼẽrõitéma og̃uahẽtaha peteĩ tiémpo ndaiporimoʼãveimahápe avave ombotavýva hapichápe (Salmo 37:10, 11).