RAMOITE ojejapo hague peteĩ enkuésta, ha oñeporandu mas de 800 mitãrusu ha mitãkuñáme ogueroviápa Jesús ohenduha chupekuéra iñemboʼe. Mas del 60% heʼi Jesús ohenduha chupekuéra, péro peteĩva otacha Jesús réra ha oskrivi hendaguépe Ñandejára.

Mbaʼépa nde repensa, ¿mávapepa ñañemboʼe vaʼerã? ¿Ñandejárapepa térãpa Jesúspe? * Jaikuaa hag̃ua upéva, jahechamína mbaʼépa omboʼe vaʼekue Jesús idisipulokuérape.

Jesús ndahaʼéi heʼínteva mávapepa ñañemboʼe vaʼerã, síno haʼe voi omoĩ ñandéve la ehémplo.

MBAʼÉPA OMBOʼE: Peteĩ jey, Jesús disípulo ojerure chupe: “Che Ruvicha, oremboʼemína mbaʼéichapa roñemboʼe vaʼerã”. Ha haʼe ombohovái: “Peñemboʼe jave, peje vaʼerã: ‘Ore Ru’” (Lucas 11:1, 2). Tiémpo rire, pe Sermón del Móntepe, Jesús omboʼe avei la héntepe mávapepa oñemboʼe vaʼerã, heʼívo: “Eñemboʼe nde Ru yvagapeguápe”, ha heʼive: “Pende Ru Ñandejára ningo oikuaáma voi mbaʼépa peikotevẽ pejerure mboyve jepe chupe” (Mateo 6:6, 8). Pe pyhare omano mboyve Jesús oasegura vaʼekue idisipulokuérape: “Pe Túva omeʼẽta peẽme oimeraẽ mbaʼe pejeruréva chupe che rérape”(Juan 16:23). Jahecha upéicharõ, Jesús omboʼe hague ñañemboʼe vaʼerãha Itúva Jehovápe, haʼéva avei ñande Túva (Juan 20:17).

MBAʼÉPA OJAPO: Jesús oñemboʼe vaʼekue Ñandejárape kóicha: “Rombotuicha opavave rovake che Ru, yvága ha yvy Ruvicha” (Lucas 10:21). Ótra vuéltape katu omaña “yvága gotyo ha heʼi: ‘Che Ru, aagradese ndéve cherendu haguére’” (Juan 11:41). Ha omano mboyvemi oñemboʼe jey ha heʼi: “Che Ru, nde pópe aheja che rekove” (Lucas 23:46). Upéicha Jesús voi ohechauka ñandéve iñehémplo rupive ñañemboʼe vaʼerãha Jehovápe, haʼéva hína “yvága ha yvy Ruvicha” (Mateo 11:25; 26:41, 42; 1 Juan 2:6). Umi kristiáno síglo primeropegua ojapo vaʼekue avei upéicha.

Unas kuánta semána Jesús oho rire yvágape, umi autorida oñepyrũ opersegi ha omaltrata Jesús disipulokuérape (Hechos 4:18). Upévare haʼekuéra oñemboʼe oñondivepa. Péro, ¿mávapepa oñemboʼe? “Oñemboʼe hikuái Ñandejárape”, ikatu hag̃uáicha ‘oipuru ipodér, [...] Jesús réra rupive’ (Hechos 4:24, 30). Umi disípulo oñemboʼe vaʼekue Ñandejárape, Jesús heʼi haguéicha chupekuéra.

Tiémpo rire, apóstol Pablo oskrivi: “Roñemboʼe jave penderehe akóinte roagradese Ñandejárape, haʼéva hína ñande Ruvicha Jesucristo Túva” (Colosenses 1:3). Umi mbaʼe heʼívare, jahechakuaa Pablo ha iñirũnguéra oñemboʼe hague Ñandejárape. Ótra vuéltape heʼi avei: “Akóinte peagradese opa mbaʼére ñande Ru Ñandejárape,  ñande Ruvicha Jesucristo rérape” (Efesios 5:20). Péicha jahecha Pablo omokyreʼỹ hague ermanokuérape akóinte oñemboʼe hag̃ua Ñandejárape, péro siémpre Jesucristo rérape (Colosenses 3:17).

Ojapo haguéicha umi kristiáno síglo primeropegua, ñande avei ñañemboʼe vaʼerã Jesús heʼi haguéicha, péicha jahechaukáta jahayhuha chupe (Juan 14:15). Ñañemboʼéramo Jehovápe añoite, ñañeñandúta pe salmísta oñeñandu haguéicha, haʼe heʼi: “Che ahayhu Ñandejárape haʼe ohendúgui che ñemboʼe. Aikove aja entéro añemboʼéta chupe” (Salmo 116:1, 2, NM). *