Che anase vaʼekue Bakúpe (Azerbaiyán), ha areko peteĩ ermána majór. Che túva haʼe vaʼekue musulmán ha che sy hudía, ha idiferénteramo jepe irrelihionkuéra, upéva ndahaʼéi vaʼekue peteĩ provléma. Haʼekuéra ningo ojoayhueterei vaʼekue. Upévare che túva oajuna jave pe mes de ramadánpe, che sy oapoja chupe; ha che sy oselevra jave pe Páskua, che túva oapojánte avei chupe. Ógape roguereko vaʼekue pe Corán, Torá ha la Biblia.

Che añekonsidera vaʼekue musulmána. Aguerovia Ñandejára oexistiha, péro oĩ vaʼekue avei heta mbaʼe nantendeporãiva. Ha añeporandúmi: “¿Maʼerãpa Ñandejára okrea yvyporakuérape? ¿Mbaʼére piko peteĩ persóna osufri oikove aja pukukue ha omano rire oho jey vaʼerã osufri infiérnope?”. La hénte ningo heʼi opa mbaʼe oikóva, tahaʼe iporãva térã ivaíva, oikoha Ñandejára oipotágui, ha upéva chemopensa: “¿Oime piko Ñandejára ñandeguereko peteĩ títereicha ipópe? ¿Sera ke ovyʼa ohechávo jasufriha?”.

Arekórõ guare 12 áño añepyrũ ajapo pe namaz, haʼéva hína umi cinco orasión ojapóva káda día umi musulmán. Upe tiémpope ore túva oremoinge che ermána ha chéve peteĩ eskuéla hudíape. Ha upépe roaprende vaʼekue idióma evréo, umi tradisión hudía oĩva pe Torápe ha káda día roñemboʼe vaʼekue ojapoháicha jepi umi hudío. Che rógape ajapo pe namaz ha eskuélape katu ajapo umi orasión hudía.

Heta mbaʼe ningo che añeporandúmi ha aipotaiterei vaʼekue oñembohovái porã chéve umíva. Upévare aporandu jey jey vaʼekue umi rravíno omboʼévape che eskuélape: “¿Maʼerã piko Ñandejára ñandekrea? ¿Mbaʼépa opensa che túvare, haʼéva musulmán? Haʼe ningo peteĩ kuimbaʼe ipyʼaporãva, ¿mbaʼére piko upéicharõ peje Ñandejára orrechasaha chupe? Ha oiméramo añete orrechasa che túvape, ¿maʼerã okrea chupe?”. Haʼekuéra oñehaʼãramo jepe ombohovái chéve umi porandu, naisentídoi chéve la heʼíva.

Áño 2002-pe oiko peteĩ mbaʼe omokangy vaʼekue che jerovia. Rova Alemániape, ha una semána rova haguépe, che túva ou iderráme ha opyta en kóma. Heta áñore ajerure vaʼekue Ñandejárape okuidami hag̃ua che famíliare. Che aikuaa porã Ñandejára añoite ikatuha ñandesalva, upévare káda día ajerure asy chupe osalvami hag̃ua che túvape. Che ajeroviaiterei Ñandejára ipoderosoha ha ndahasymoʼãiha chupe ojapo hag̃ua pe ajeruréva. Aime vaʼekue segúra haʼe cherendutaha, péro ipahápe che túva omano.

Apensa nañaneimportanteiha Ñandejárape g̃uarã, ha upéva chemoñeñandu vaieterei. Apyta vaʼekue yvýre, ha apensa voi: “O nañemboʼekuaái, o Ñandejára ndoexistíri voi”. Ndaikuaavéima mbaʼépa la oikóva, ha ni nañemboʼevéi. Ha ótra rrelihión nachekonvenséinte avei, upévare haʼe Ñandejára ndoexistiriha.

Seis mése haguépe, umi testígo de Jehová og̃uahẽ che rógape. Che ermána ha chéve ndaoregustái vaʼekue umi rrelihión kristiána, upévare rohechaukase chupekuéra ojavyha hikuái. Ha roporandu chupekuéra: “¿Mbaʼére piko umi kristiáno oadora umi taʼanga, pe kurusu, Jesús ha Maríape, siéndo ke umi Diez Mandamiénto oproivi koʼã mbaʼe?”. Haʼekuéra oavri la Biblia ha ohechauka porã oréve umi kristiáno verdadéro ndoadorái vaʼerãha umi taʼanga ha ñañemboʼe vaʼerãha Ñandejárape añoite. Orejurujái ropytávo, ombohovái porãitereígui oréve la roporandúva guive.

Upéi roporanduve chupekuéra: “¿Ha mbaʼe pepensa pe trinidáre? Oiméramo Jesús haʼe Ñandejára, ¿mbaʼéicha upéicharõ ou ko yvy ape ári ha ojejuka chupe?”. Haʼekuéra oavri jey la Biblia ha oexplika oréve Jesús ndahaʼeiha Ñandejára, ha upévare haʼekuéra ndogueroviaiha pe trinida. Añesorprende apytávo, ha apensa voi: “Koʼãva ndojoguaiete umi ótro kristiánope”.

Che aikuaase avei kuri mbaʼére yvyporakuéra omano ha mbaʼére Ñandejára opermiti pe sufrimiénto. Upémarõ ohechauka chéve hikuái peteĩ lívro hérava El conocimiento que lleva a vida eterna; * upe lívrope oĩ voi kapítulo ombohováiva peteĩteĩ umi mbaʼe añeporandu vaʼekue. Upévare pyaʼe porã voi añepyrũ astudia la Biblia hendivekuéra.

Káda estúdiope oñembohovái chéve la Biblia rupive umi mbaʼe aikuaaséva. Aaprende Ñandejára heraha Jehová ha ñanderayhuetereiha (Salmo 83:18; 1 Juan 4:8). Haʼe ningo ñandekrea vaʼekue javyʼa hag̃ua haʼe ovyʼaháicha ha ndoipotái jasufri. Haʼe ndochaʼéi pe inhustísiare, upévare koʼẽrõitéma oipeʼáta upéva. Avei aaprende Adán ha Eva opeka rupi, yvyporakuéra ohupytyha hetaiterei mbaʼe vai (Romanos 5:12). Ha upéicha rupi avei omano umi hénte jahayhúva, che túva por ehémplo. Péro Ñandejára opromete imúndo pyahúpe ndaiporiveitamaha mbaʼeve ñanembosufríva, ha umi omano vaʼekue jepe oikove jeytaha (Hechos 24:15).

Añeporandúva guive la Biblia ombohovái chéve. Añepyrũ jey ajerovia Ñandejárare, ha mbeguekatúpe aikuaa porãve umi testígo de Jehovápe. Ahechakuaa hesekuéra oikoha peteĩ famíliaicha ndahaʼéiramo jepe el mísmo paisgua. Ahecharamoiterei mbaʼeichaitépa ojoayhu hikuái ha oiko peteĩ ñeʼẽme (Juan 13:34, 35). Opa mbaʼe aaprendéva Ñandejáragui chemokyreʼỹ aservi hag̃ua chupe, upévare adesidi oikotaha chehegui testígo de Jehová ha ajevautisa pe 8 de enero de 2005.

Umi mbaʼe omboʼéva la Biblia ningo oreko sentído chéve g̃uarã, koʼág̃a akambia apensa lája ha tuicha chepyʼaguapyve. Ñandejára ningo omoingove jeýta che túvape, ha upéva chekonsola ha chembovyʼa (Juan 5:28, 29).

Ojapóma seis áño amenda hague Jonathan rehe, peteĩ kristiáno ohayhúva Ñandejárape. Oñondive rohechakuaa la Biblia omboʼéva orekoha sentído, ifasilha oñentende hag̃ua ha ndaiporiha ótra kósa iñimportantevéva upévagui. Upévare rovyʼaiterei ikatu haguére roñeʼẽ la héntepe la Bíbliare ha umi esperánsa porãite oĩvare upépe. Koʼág̃a aikuaáma umi testígo de Jehová haʼeha kristiáno verdadéro.