Umi ikorrúptova ningo oipuru pe puésto orekóva térã ipodér oguenohẽ hag̃ua chugui provécho. Ha umichagua persóna koʼýte ojehechave umi goviérnope. Péro ko provléma ndaipyahúi, la Bíbliape jatopa peteĩ léi oproivíva ojeasepta sovórno umi huísiope, ha ojapóma mas de 3.500 áño oñemeʼẽ hague ko léi (Éxodo 23:8). Oĩ hetave fórma de korrupsión, ndahaʼéi pe sovórno añónte. Por ehémplo, oĩ funsionário oipurúva ivenefisiorã umi servísio ha hetave mbaʼe omeʼẽva pe estádo, ojevale ipuéstore ovenefisia hag̃ua ifamília ha iñamigokuérape, ha ni notĩri omonda hag̃ua pe pláta orekóva pe estádo.

Pe korrupsión ningo oĩ hetaiterei organisasiónpe, péro umi goviérnope henyhẽte. Pe Transparencia Internacional opuvlikárõ guare pe Barómetro Global de la Corrupción 2013, omombeʼu umi hénte heʼi hague máva mávapa ikorruptove. Primeroite voi oĩ umi polítiko, segundo umi polisía, tercero umi funsionário púvliko, cuarto umi oguenohẽva umi léi ha quinto umi oaplikáva umi léi. Jahechamína unos kuánto ehémplo:

• ÁFRICA: Áño 2013-pe, Sudáfricape ojeakusa 22.000 funsionário púvlikope ikorrúpto rupi.

• AMÉRICA: Áño 2012-pe, Brasílpe oñekondena 25 persónape oipuru haguére pe pláta estadopegua politikarã. Umíva apytépe oĩ heta kuimbaʼe ipuésto porãiterei vaʼekue, por ehémplo, peteĩva, unos kuánto áño upe mboyve, haʼe vaʼekue pe segunda persóna iñimportantevéva upe paíspe.

• ASIA: Áño 1995-pe, Seúlpe (Corea del Sur) hoʼa peteĩ edifísio tuicháva ha omano 502 persóna. Umi investigadór opilla umi konstruktór osovorna hague umi ombaʼapóvape munisipalidápe, ikatu hag̃uáicha oipuru umi materiál ndoikoguasúiva. Ha péicha nokumplíri hikuái umi mbaʼe ojeruréva pe léi de segurida.

• EUROPA: Cecilia Malmström, ombaʼapóva umi Asuntos de Interior de la Comisión Européape, heʼi: “Európape hetaiterei oĩ ikorrúptova, avave ningo ni noimoʼãi peichataha”. Ha upéi heʼive: “Oñesolusionaite hag̃ua ko provléma, umi polítiko oñekompromete vaʼerã okambiataha, péro amalisia ijetuʼu oiko hag̃ua upéva”.

Añetehápe ijetuʼueterei opaite hag̃ua pe korrupsión. Peteĩ profesóra oñemoĩ mbaretéva pe korrupsiónre, hérava Susan Rose-Ackerman, heʼi: “Umi goviérno ombaʼapo lája omokyreʼỹ voi umi oĩvape upépe ikorrúpto hag̃ua, upévare tekotevẽ okambiaite ombaʼapo lája umi goviérno”. Jahechávo koʼã mbaʼe ikatu voi ñapensa ndaiporiveimaha esperánsa, péro la Biblia oasegura ñandéve oĩtaha katuete peteĩ kámbio.