Káda áño ko múndo tuichakuére hetaiterei hénte ofesteha pe Navidad. Oĩ ojapóva upéva okomparti hag̃ua ifamília ha iñamigokuérandi. Ótro katu oaprovecha ojepyʼamongeta hag̃ua Ñandejárare térã oipytyvõ hag̃ua umi imboriahúvape. Koʼã mbaʼe ningo añete ndaivaíri jajapo, péro, ¿mbaʼéichapa oñepyrũ rakaʼe pe Navidad?

Umi ofesteháva pe Navidad heʼi ojapoha upéva ogueromanduʼa hag̃ua Jesús kumpleáño. Péro heta istoriadór orrekonose avave ndoikuaaiha mbaʼe fechaitépa onase Jesús. Pe lívro The Christian Book of Why (Los porqués del cristianismo) heʼi: “Umi kristiáno ypykue nomoĩséi voi peteĩ fécha ofesteha hag̃ua Jesús kumpleáño [ndojeheʼaséi rupi] umi kostúmbre pagánare”. Avei ni peteĩ párte la Bíbliape nomombeʼúi Jesús ofesteha hague ikumpleáño ni ótro kumpleáño. Péro si jatopa omanda hague idisipulokuérape ogueromanduʼa hag̃ua haʼe omano hague ára (Lucas 22:19).

Avei umi investigadór orrekonose umi tradisión ha personáhe navidéño ouha umi kostúmbre pagánagui. Por ehémplo, Papá Noel, pe árbol de Navidad, umi rregálo, umi véla, umi dekorasión ha umi tembiʼu ojejapóva jepi upéicha jave. Peteĩ lívro oñeʼẽva rrelihión katólikare heʼi: “Heta hénte omeʼẽ ha orresivi rregálo de Navidad ha omoĩ hokẽre térã pe iglésiare umi koróna navidéña, péro ni ndoikuaái hikuái umíva ouha umi pagánogui” (The Externals of the Catholic Church).

Péro ikatu nde repensa: “Afesteháramo pe Navidad ningo ndaperhudikái avavépe”. Ha ikatu upéva siérto. Upéicharõ jepe, ¿mbaʼépa opensa Ñandejára umichagua fiéstare? La Biblia ohechauka porã Ñandejárape ombojeguaruha pe rrelihión añetegua ojeheʼáramo umi kostúmbre pagánare. Por ehémplo, pe proféta Amós rupive, Ñandejára heʼi vaʼekue umi isrraelítape: ‘Chembojeguaru ha ndachaʼeiete pende aretekuérare. [...] Anive pepurahéi chéve g̃uarã’ (Amós 5:21, 23).

¿Mbaʼérepa Ñandejára heʼi upeichaite voi umi isrraelítape? Jahechamína mbaʼépa oiko raʼe. Upérõ rréi Jeroboán ojapouka vaʼekue vakaraʼy raʼanga órogui, ha omoĩka umi taʼanga siuda de Dan ha Betélpe. Upéi heʼi umi héntepe toipuru koʼã taʼanga omombaʼeguasu hag̃ua Jehovápe, oho rangue hikuái pe témplope, oĩva Jerusalénpe. Hiʼarive haʼéntema onombra umi saserdótepe ha ojapouka chupekuéra umi fiésta Ñandejára nomandái vaʼekue (1 Reyes 12:26-33).

Ikatu ningo jaʼe umi isrraelíta ojapose hague peteĩ mbaʼe iporãva, pórke haʼekuéra ojapo kuri koʼã mbaʼe oadora hag̃ua Jehovápe. Péro Ñandejára heʼi chupekuéra, Amós ha umi ótro proféta rupive, ombojeguaruha chupe umi mbaʼe ojapo vaʼekue hikuái. Heta tiémpo rire, Ñandejára omomanduʼa chupekuéra: “Che hína Jehová ha arakaʼeve nakambiái” (Malaquías 3:6, NM). Jahecha rire mbaʼépa opensa Ñandejára umi fiésta pagánare, ¿mbaʼéichapa oiméne oñeñandu ojefesteha jave pe Navidad?

Heta hénte ohecha rire mbaʼépa opensa Ñandejára, odesidi ndofestehamoʼãiha pe Navidad. Upéva rangue, oimeraẽ día al áño oipytyvõ hapichápe, ha ovyʼa okompartívo tiémpo ifamília ha iñamigokuérandi.