Anase ha akakuaa vaʼekue peteĩ várrio imboriahumívape Roma ypýpe, ha heta asufri. Che aikómi pe kállere, ha núnka ndajoguerahaporãi vaʼekue che túvandi. Ha che sýpe katu ni ndaikuaái vaʼekue.

Arekórõ guare 10 áño añepyrũma vaʼekue amonda, ha aha primera ves ógagui arekópe 12 áño. Che ningo chearhél ha cheviolénto vaʼekue, ha aiko vaiseterei voi oimeraẽvandi. Che túva heta vése oho cheguenohẽ komisaríagui. Upéi, arekópe 14 áño ahaitéma ógagui. Aiko pe kállere, ajedroga ha ake umi áuto ahénope. Ajahu hag̃ua katu, apuʼã de madrugáda rei aheka peteĩ fuénte de água ha ajahu upépe.

Kon el tiémpo amondakuaavéma. Apeska umi héntere pe kállepe ha oguerodipara chuguikuéra ikartéra, pyharekue katu aike amonda umi ogaháre térã umi edifísio orekóvape heta koty. Sapyʼaitérõ g̃uarã peteĩ pandílla ifamósova heʼi chéve aike hag̃ua igrúpope. Ha añepyrũ hag̃ua, amonda hendivekuéra umi vánko ha mbaʼe. Chéngo cheviolénto ha chearheleterei, upévare pyaʼe voi cherrespeta hikuái. Ahahápente aguerahámi che pistóla, ha amoĩ voi che aramboha guýpe akéta jave. Che ajedroga, aporomonda, cheviolénto, cherekokyʼa ha chejurutieʼỹ..., chekompletoite voi. Umi polisía ndacherejái voi trankílo ha hetaiterei vése chegueraha préso. Chéko kársel ha kállerente voi aiko vaʼekue.

Peteĩ vuéltape, asẽrõ guare kárselgui, aha avisita peteĩ che tiápe. Péro che ndaikuaáiva haʼe ha mokõi che prímo haʼeha testígo de Jehová. Haʼekuéra cheinvita aha hag̃ua peteĩ rreuniónpe hendivekuéra, ha che aha chekuriósogui rei. Rog̃uahẽvo pe Salón del Réinope, entradaitépente voi che aguapyse akontrola hag̃ua mávapa oike ha osẽ. Ha che pórtepe, araha jeýma chendive che pistóla.

 Upe rreunión opokoiterei vaʼekue cherehe, haʼete voi aiméva ótro múndope mbaʼe. Amañaha gotyonte ahecha umi hénte horyjoa ha iñamávle. Koʼag̃aite peve chemanduʼa mbaʼéichapa ikalida chendive hikuái, ha ojekuaa hesekuéra isinseroitereiha. ¡Tuichaite ningo idiferénte hikuái umi che amigokuéragui!

Adesidi astudia la Biblia umi testígo de Jehovándi. Ha amáske astudia, ahechakuaa hetaiterei mbaʼe akambia vaʼerãha. Por ehémplo, umi júnta vai arekóva. Opokoiterei voi cherehe pe konsého oĩva Proverbios 13:20-pe: ‘Nearanduséramo eiko iñarandúva ndive, reñehundiséramo eiko itavýva ndive’. Upépe apilla ahejámante vaʼerãha pe pandílla apertenesévape. Legálmente ijetuʼueterei vaʼekue chéve upéva, péro Jehová chepytyvõ rupi ikatu ajei chuguikuéra.

Heta avei añehaʼã aheja hag̃ua pe sigarríllo ha umi dróga. Avei chepínta porãve: ndacheavukuvéima, ndaipuruvéi namichãi ha nachejurutieʼỹvéi. ¡Koʼág̃a ae ikatu haʼe che rete rembipota vai nachedominaveimaha!

Chéve ningo ndachegustáimi la lektúra, upévare ijetuʼu chéve astudia hag̃ua la Biblia ha añekonsentra hag̃ua alee jave. Péro mbeguekatúpe akambia ha añepyrũma ahayhu Jehovápe. Upéinte haʼete ku añeñandu vai léntova ha ndaikuaái mbaʼérepa, avía sído che konsiénsia cheatõima hína umi mbaʼe vai ajapo vaʼekuére. Pyʼỹinte añeñandu vaieterei ha apensa voi Jehová arakaʼeve nacheperdonamoʼãiha. Upéicha jave alee umi téxto ohechaukáva mbaʼéichapa Jehová operdona rréi Davídpe, hiʼarive ivaieterei vaʼekue umi mbaʼe haʼe ojapóva. ¡Tuicha chepyʼaguapy alee rire koʼãichagua rreláto! (2 Samuel 11:1–12:13.)

Ijetuʼu vaʼekue avei chéve apredika hag̃ua umi héntepe (Mateo 28:19, 20). Akyhyjeterei ningo ajotopárõ g̃uarã peteĩ persóna aperhudika vaʼekuéndi. Péro mbeguekatúpe asupera ahávo upéva, ha avyʼáma ikatu haguére añemongeta trankílo porã umi héntendi Ñandejára promesakuérare, ha ahechauka chupekuéra mbaʼéichapa ñande Ru yvagapegua ñaneperdona.

Mbaʼémbo oiko vaʼerãmoʼã chehegui ndaikuaáirire Jehovápe. Enterove lénto umi che amigokue omanóma térã oĩ kárselpe. Che katu káda día avyʼave ha areko peteĩ esperánsa iporãitereíva. Koʼág̃a cheumílde, cheñeʼẽrendu ha ndaikovéima chepochy oimeraẽ mbaʼe reíre, upéicha rupi ajogueraha porãiteve che rapichakuérandi. Upéi aju amenda peteĩ kuñataĩ iporãitereívare, hérava Carmen, ha aiko vyʼápe hendive. Oñondive roipytyvõ hína ore rapichakuérape oikuaa hag̃ua mbaʼépa omboʼe la Biblia.

Koʼág̃a cheonrrádo ha ambaʼapo porã. Ha asegi gueteri aike umi vánkope, péro ndahaʼevéima amonda hag̃ua, síno amopotĩ hag̃ua.