Ñandejára Jehová * ningo upe Ipuʼakapáva ha ojapóva opa mbaʼe oĩva ko múndope. Upéicha rupi heta hénte okulpa chupe opa mbaʼe oikóvare, umíva apytépe umi mbaʼe vai jepe. Péro la Biblia heʼi:

• “Ñandejára hekojoja [...] opa mbaʼépe.” (Salmo 145:17.)

• ‘[Ñandejára] rembiapokue ndaijojahái, hape hekojoja. Haʼe Ñandejára jeroviapy, naiñañái, ihústo.’ (Deuteronomio 32:4.)

• ‘Jehová ñanderayhueterei ha avei ñandeporiahuvereko.’ (Santiago 5:11.)

Ohechaukaháicha koʼã téxto, Ñandejára ndojapói mbaʼeve ivaíva. Upéicharõ jepe, heta oĩ opensáva haʼe omomyiha ótrope ojapo hag̃ua. ¿Siértopa upéva? Ni mbaʼevéicharõ. La Biblia heʼi: “Ani avave heʼi ohasa asy jave: ‘Ñandejára ombou chéve ko jehasa asy chetantea hag̃ua’, avave ndaikatúigui ojapouka ivaíva Ñandejárape, ha haʼe nomoĩri avei ñane renondépe mbaʼeve ivaíva ñanetantea hag̃ua” (Santiago 1:13). Haʼe nomoĩri a pruéva avavépe ohecha hag̃ua ojapótapa ivaíva. Haʼe voi ndojapói ivaíva ha nomomýiri avei avavépe ojapo hag̃ua upéva. ¿Mbaʼérepa upéicharõ oiko jepi umi mbaʼe vai?

La Biblia ohechauka mbaʼérepa avei yvyporakuéra ikatu osufri. Eclesiastés 9:11 heʼi: “Umi mbaʼe oñehaʼarõʼỹva ikatu ohupyty oimeraẽvape” (NM). Oiko jave peteĩ aksidénte térã peteĩ desgrásia, sapyʼánte oĩ omanóva ha sapyʼánte katu nahániri. ¿Mbaʼérepa odepende? Odependéma mbaʼe moméntopepa oiko upéva ha moõpa. Ojapóma 2.000 áñorupi, Jesús omombeʼu hague hoʼárõ guare peteĩ tórre ojukáva 18 persónape. Umi hénte ndahaʼéi omanóva hembiapo vai haguére, síno kavaleténte oĩ hikuái upe tórre ypýpe hoʼárõ guare (Lucas 13:1-5). Ndaʼaréi avei, agosto de 2004-pe, Paraguáipe oiko peteĩ inséndio tuicháva supermerkádo Ycuá Boláñospe, ha upérõ 400 persónarupi omano ha mas de 500 oĩ okái vaietereíva. Upépe omano opaichagua persóna, tahaʼe iplátava térã imboriahúva, ivuénova térã iñañáva. Upéicharõ jaʼekuaa oimeraẽvante ikatuha osufri peteĩ desgrásia ha oimoʼãʼỹve jave. Ha ñande voi ikatu jahecha ñande resa teérupi mbaʼéichapa pe mbaʼasy avei ojagarrapaite ohóvo ha oity oimeraẽvape.

Péro ikatu oime reñeporandu: “¿Ndaikatúi piko Ñandejára ointerveni raʼe ani hag̃ua oiko umi mbaʼe vai? ¿Mbaʼére piko ndoprotehéi umi hénte ivuénovape?”. Ikatu hag̃uáicha Ñandejára ojapo upéva, tekotevẽ oikuaapaite arakaʼépa oikóta umi mbaʼe. Ha orekóramo jepe podér oikuaa hag̃ua mbaʼépa oikóta tenonderãme, ¿oipurúpa upéva oikuaa hag̃ua opaite mbaʼe? (Isaías 42:9.)

La Biblia heʼi: ‘Ñandejára oĩ yvágape, ha opaite mbaʼe ojaposéva guive ojapóta katuete’ (Salmo  115:3). Jehová ningo ohecháramo tekotevẽha ojapo peteĩ mbaʼe ojapo, péro upéva ndeʼiséi upepevénte omeʼẽha ikapasida. Haʼe ndopredesíri opa mbaʼe oikótava. Por ehémplo, yma umi siuda Sodoma ha Gomorra henyhẽtérõ guare mbaʼe vaígui, Ñandejára heʼi Abrahánpe: “Ivaieterei ndaje hembiapokuéra, aha upépe aikuaa hag̃ua upéichapa añete térãpa nahániri. Ndahaʼéiramo upéicha, aikuaáta hína” (Génesis 18:20, 21). Jehová ningo ikatu kuri oikuaa mbaʼeichaite pevépa iñaña umi hénte Sodoma ha Gomórrape, péro haʼe odesidi ndohechái upéva ha upéicha ohechauka natekotevẽiha opredesi opa mbaʼe oikótava (Génesis 22:12). Péro upéva ndeʼiséi haʼe ikangýgui ndaikatuiha ojapo upéva térã iñimperfektoha. Haʼe hendaitépe ha tekotevẽhaichaiténte opredesi umi mbaʼe oikótava okumpli hag̃ua hembipota. Haʼe ndoovligái avavépe ojapo hag̃ua haʼe heʼíva (Deuteronomio 32:4). * Jaʼe porãsérõ g̃uarã, Ñandejára odesidi mbaʼépa opredesíta ha mbaʼépa ndopredesimoʼãi.

Sapyʼánte ñande káusare voi jasufri. La Biblia heʼi: “Káda uno ñañemoñuhã, jahejávo umi mbaʼe jajaposéva ñandestira ha ñanembotavy. Umi mbaʼe jajaposéva oñembohapóramo ñande pyʼapýpe, upéva omoheñói pekádo ha pe pekádo káusare ñamano” (Santiago 1:14, 15). Peteĩ persóna ohejáramo odomina chupe hete rembipota vai, katuete osẽ vaíne (Romanos 7:21-23). Hetaiterei áñorema yvyporakuéra ojapo umi mbaʼe vai ombosufríva enterovépe. Hiʼarive koʼãichagua hénte, omboliga avei ótrope ojapo hag̃ua umi mbaʼe vai ha péicha iñasãi ohóvo ko múndo tuichakuére (Proverbios 1:10-16).

Péro, ¿mbaʼére piko Ñandejára nointervenírintema anivéma hag̃ua yvyporakuéra ojapo umi mbaʼe vai? La Biblia ningo heʼi Ñandejára ñandeapo hague ijoguaháramo, ha upéicha rupi ikatu jahechauka umi kualida porãita haʼe orekóva (Génesis 1:26). Avei Ñandejára omeʼẽ ñandéve peteĩ rregálo iporãitereíva ohejávo káda únope jaelehi mbaʼépa jajapóta. Upéicha rupi ñande ikatu jadesidi jahayhu ha ñaneñeʼẽrendútapa chupe térãpa nahániri (Deuteronomio 30:19, 20). Ha Ñandejára ñandeovligáramo jajapo hag̃ua peteĩ mbaʼe, ¿ndoipeʼamoʼãi jeýpa ñandehegui pe rregálo? ¿Ndoikomoʼãi piko péicha ñandehegui peteĩ rrovót ojapóva ijapohare omandávante chupe? Ajépa jaagradesete Ñandejárape ñanderrespeta haguére ha ohejágui ñandéve jadesidi mbaʼépa jajapóta, ndahaʼéi ku oexistíva peteĩ destíno oĩháme eskríto mbaʼépa jajapóta térã mbaʼépa oikóta ñandehegui. Péro, ¿heʼisépa upéva Ñandejára nointervenimoʼãiha voi anivéma hag̃ua oiko mbaʼe vai? Nahániri, haʼe nopermitimoʼãi jasegi jasufri opa árare jajavy haguére térã ótro odesidi vai haguére.

Ñaporandúramo peteĩ indu térã vudístape mbaʼérepa umi hénte ivuénova jepe osufri, katuete heʼíne ñandéve: “Umi hénte ivuénova osufri pe léi del karma káusare, upéva heʼise opagaha hína koʼág̃a umi mbaʼe ojapo vaʼekuére pe ótra vídape”. *

La Biblia ningo oexplika porã mbaʼérepa ñamano, ha upéva ñanepytyvõta ñantende hag̃ua oĩ porãpa jaguerovia pe léi del karma. Hardín de Edénpe, Ñandejára ojapo vaʼekue pe primer kuimbaʼépe, ha upérõ haʼe omanda chupe: “Ikatu reʼu opaichagua yva koʼapegua; upe yva oikuaaukáva iporã ha ivaíva katu nahániri. Cháke reʼuha ára upéva, remanóta” (Génesis 2:16, 17). Adán iñeʼẽrendúrire Ñandejárape ha ndopekáirire, ikatu vaʼerãmoʼã oiko opa árare. Upéicharõ ikatu jaʼe Adán omano hague naiñeʼẽrendúi rupi. Ha ifamíliarõ guare, “pe ñemano ohupyty entéro kuimbaʼépe, enterovéva opeka rupi” (Romanos 5:12). Upévare jaʼekuaa pekádo káusare ñamanoha (Romanos 6:23). La Biblia heʼi avei: “Pe omanóva ningo opagapáma ipekádore” (Romanos 6:7). Upéicharõ, peteĩ persóna ndahaʼéi opagáva gueteri ipekádore omano rire, síno umíva opytáma tesaráipe.

Koʼág̃arupi hetaiterei hénte oguerovia entéro jasufriha pe karma káusare. Umi opensáva upéicha oñerresignántema, ha heʼi upéichante vaʼerãha voi. Umi ogueroviáva koʼã mbaʼe oimoʼã ndopamoʼãiha voi pe jehasa asy. Ha heʼi avei ojelivera hag̃ua hikuái pe kármagui tekotevẽha ojeporta porã oikove aja entéro ha iñarandueterei vaʼerãha, upéicharõ añoite ndosufrimoʼãvéima. Péro koʼã mbaʼe ningo nomboʼéi la Biblia. *

Yvyporakuéra ndahaʼéi ijehegui reínte ojapóva umi mbaʼe vai, síno Satanás omomýi chupekuéra upearã. Haʼe ningo ñepyrũrã peteĩ ánhel iñeʼẽrendu vaʼekue Ñandejárape, péro upéinte ou “omboyke pe añetegua” ha omoñepyrũ pe pekádo ko yvy ape ári (Juan 8:44). ¿Mbaʼéichapa ojapo upéva? Hardín de Edénpe haʼe omboliga yvyporakuérape opuʼã hag̃ua Ñandejárare (Génesis 3:1-5). Jesucristo heʼi voi Satanás haʼeha pe “aña” ha ko “múndo ruvicha” (Mateo 6:13; Juan 14:30). Hetaiterei hénte ningo oheja Satanás odomina chupekuéra, upévare haʼekuéra opensa ijehénte ha oiko iñakãre, oiko rangue Jehová heʼiháicha (1 Juan 2:15, 16). Añetehápe “ko múndo kompletoite oĩ pe aña poguýpe”, péro ndahaʼéi yvyporakuérape añónte odomináva, haʼe ogueraha avei hapykuéri hetaiterei ánhelpe, oñehenóiva demónio (1 Juan 5:19). La Biblia heʼi Satanás haʼeha upe “ombotavýva hína ko múndo kompletoitépe”, ha umi demónio omoirũ chupe ombohasa asy hag̃ua yvyporakuérape (Apocalipsis 12:9, 12). Upéicharõ jaʼekuaa Satanás káusare oikoha hetaite mbaʼe vai.

Jahecha haguéicha, ndahaʼéi Ñandejára káusare yvyporakuéra osufríva ni ojapóva mbaʼe vai . Haʼe opromete katu ñandéve koʼẽrõitéma opataha opaichagua mbaʼe vai ñanembosufríva. Pe ótro artíkulope oñeñeʼẽvéta ko témare.