Diciémbrepe, opárupi ojejapo Jesús raʼanga onase ramóme guare, ojejapo mitãraʼy raʼanga ha oñemoĩ pesévrepe, peteĩ mbaʼyru oñemoĩháme animálpe hembiʼurã. Péro ¿oĩ porã piko ñapensa Jesús haʼeha gueteri peteĩ mitãraʼy?... * Iñimportánte ningo ñanemanduʼa hese ótro hendáicha. Jahechamína mbaʼépa oiko umi ovecharerekua rehe oñangareko aja hymbakuérare ñúme, ag̃uiete Beléngui.

Peteĩ ánhel ou umi ovecharerekua rendápe ha heʼi chupekuéra: “Koestedía [...] onase upe pendesalvátava, upéva hína Cristo ñande Ruvicha”. Ha omombeʼu chupekuéra otopataha upe mitãʼi ‘ojeliáva télape ha oñeno peteĩ pesévrepe’. Upe riremínte ohecha hikuái ouha hetave ánhel ha omombaʼeguasu Ñandejárape.

¿Mbaʼéichapa nde reñeñandu vaʼerãmoʼã rehendúrire umi ánhelpe omombaʼeguasujoa Ñandejárape?... Umi ovecharerekua ovyʼaiterei, ha heʼi: “Jaháke koʼag̃aite Belénpe jahecha hag̃ua ko mbaʼe oikóva”. Ha og̃uahẽ rire Belénpe, otopa hikuái “María, José, ha pe mitãraʼy oñenóva hína pesévrepe”.

Upe riremínte hetave hénte og̃uahẽ ohóvo Belénpe, ha oponderajoa hikuái umi ovecharerekua omombeʼúvo chupekuéra umi mbaʼe oiko vaʼekue. ¿Revyʼápa reikuaávo koʼã mbaʼe?... Enterove jahayhúva Ñandejárape javyʼa ñaaprendévo koʼã mbaʼe. Jahechamína koʼág̃a mbaʼérepa umi ovecharerekua ovyʼaite oikuaávo Jesús onaseha. Péro upearã jahecha raẽ vaʼerã mbaʼépa oiko raʼe María isoltéra tiémpope.

Peteĩ díape, ánhel Gabriel ou María rógape, ha omombeʼu chupe hyeguasutaha ha orekotaha peteĩ mitãkuimbaʼe. Upéi heʼi chupe: “Ko mitãʼi tuicháta ha oñehenóita Ñandejára Ijojahaʼỹva Raʼy”. Avei heʼi oikotaha chugui rréi ha Irréino ndopamoʼãiha arakaʼeve.

 María oikuaase mbaʼéicha rupípa hyeguasúta ko haʼe noñenóiva gueteri peteĩ kuimbaʼéndi. Upémarõ ánhel Gabriel heʼi chupe: “Ñandejára Ijojahaʼỹva podér nemoʼãta. Upévare pe mitã imarangatúta ha oñehenóita Ñandejára Raʼy”. Jehová ojapo peteĩ milágro ombou hag̃ua Itaʼýra onase peteĩ mitãicha. Jesús ningo oiko vaʼekue yvágape, péro upéi Jehová omoĩ Itaʼýra rekove María retepýpe ha okakuaa peteĩ mitãraʼýicha.

¿Ndépa rehechámava Navidápe, oñemoĩha avei tres “reyes magos” ovisitáva Jesúspe?... Heta hendápe ojejapo upéicha, péro tuicha ojavy hikuái. Umi “reyes magos” ojeʼeha ningo ndahaʼéi rréi ni mágo, síno astrólogo, ha upe haʼekuéra ojapóva ndogustái Ñandejárape. La Biblia omombeʼu haʼekuéra ‘otopa hague pe mitãme isy María ndive’. Upéicharõ Jesús ndahaʼevéima peteĩ mitãraʼy oĩva pesévrepe, síno oikóma José ha María ndive hógape.

¿Ndépa reikuaa mbaʼéichapa umi astrólogo og̃uahẽ raʼe Jesús oĩháme?... Osegi hikuái peteĩ estrélla joguaha, péro oho mboyve Belénpe, ohasa raẽ Jerusalénrupi, upépe ningo oiko vaʼekue rréi Herodes. La Biblia heʼi Herodes oikuaase hague moõpa oĩ Jesús ojuka hag̃ua chupe. ¿Mávapa nde ere ohechauka hague umi astrólogope pe estrélla joguaha oho hag̃ua Herodes rendápe?... Ndahaʼéi Ñandejára, síno iñenemígo, Satanás.

Satanás oipota umi hénte opensa Jesús haʼeha gueteri peteĩ mitãraʼy. Péro nemanduʼápa ánhel Gabriel heʼi hague Maríape Jesús ogovernataha opa ára g̃uarã, ha Irréino ndopamoʼãiha arakaʼeve. Jesús koʼág̃a ogovernáma yvágape ha koʼẽrõitéma ohundipáta Ñandejára enemigokuérape. Upéicha ñapensa vaʼerã koʼág̃a Jesús rehe ha ñamombeʼu upéva ñande rapichakuérape.