ÑAÑEMOAG̃UÍKENA ÑANDEJÁRARE
“¡Péina! Ambopyahu hína opa mbaʼe”
¿Ndépa reikose vyʼápe ne família ndive opa árare peteĩ múndo ndaiporiveimahápe mbaʼasy? ¿Hiʼãpa ndéve opa umi mbaʼe ñanembohasa asýva ha ndaiporivéi omanóva? Koʼã mbaʼe ikatu hína jahupyty. Ñandejára Jehová opromete omoĩtaha peteĩ múndo pyahu ha koʼẽrõitéma okumplíta upéva. Jahechamína mbaʼépa heʼi la Biblia Ñandejára ojapotaha (elee Revelación [Apocalipsis] 21:3-5).
“[Ñandejára] omokãmbaitéta hesaykuéra.” (Revelación 21:4, NM.) ¿Mbaʼépa heʼise upéva? Heʼise Ñandejára oipeʼapaitetaha opa mbaʼe ñanembohasa asy ha ñanemyasẽva. Haʼe ndoipotavéima jasufri ni ñanerasẽ ñandejopy asýgui umi mbaʼe jahasáva.
“Ndaiporimoʼãvéima omanóva.” (Revelación 21:4, NM.) Enterovénte ñambyasy ha heta ñanerasẽ omanóramo ñandehegui peteĩ jahayhúva. Upévare Jehová opromete oguenohẽtaha ñemano poguýgui umi yvypóra iñeʼẽrendúvape. ¿Mbaʼéichapa ojapóta upéva? Ñande ningo ñamano pe pekádo káusare, ha Ñandejára ñandepeʼáta pe pekádo poguýgui (Romanos 5:12). Jesús sakrifísio rupive Jehová omeʼẽ jeýta perfeksión enterove iñeʼẽrendúvape. * Ñane enemígo tuichavéva ningo hína pe ñemano, ha upéva ‘oñehundíta’ (1 Corintios 15:26). Ñandejára okumpli vove ipromésa, umi ojeroviáva hese hesãita ha oikóta opa árare.
“Ndaiporimoʼãvéima [...] hasýva.” (Revelación 21:4, NM.) ¿Mbaʼeichagua mbaʼasýpa opáta? Heta ningo oĩ opyta vaíva térã oñedeprimíva oiko rire hese peteĩ mbaʼe vai, oĩ avei noĩporãiva iñakãme térã oikóva hasyháre. Opaite umi mbaʼe ningo jahasa ñane imperfékto ha japeka rupi.
Koʼẽrõitéma Ñandejára omoĩta peteĩ múndo pyahu ndaiporimoʼãveimahápe ñemano, mbaʼasy ni mbaʼeve ñanemyasẽva. Péro, ¿moõpa Ñandejára omoĩta upe múndo pyahu? Heta oĩ opensáva Ñandejára ñandeguerahataha yvágape japytuʼu hag̃ua. ¿Añetépa upéva? Nahániri. Ñepyrũrã la Biblia heʼi: “Ñandejára róga oĩta yvyporakuérandi”, ha ñande yvypóra ningo jaiko ko yvy ape ári (Revelación 21:3, NM). Segundo, Ñandejára opromete upe múndo pyahúpe ‘ndaiporimoʼãveimaha omanóva’. Ha yvágape ningo noñemanóiva voi, upéva ohechauka avei ñandéve ko yvy ape aritaha, pórke koʼápente yvyporakuéra omano. Upéicharõ, ikatu jajerovia umi mbaʼe porãita Ñandejára oprometéva oñekumplitaha ko yvy ape ári.
Ñandejára oipeʼapaitéta umi mbaʼe ñanembohasa asy ha ñanemyasẽva
Jehová oipota jajerovia ipromésare. Upévare, omombeʼu rire mbaʼéichapa ñanevendesíta, heʼi: “¡Péina! Ambopyahu hína opa mbaʼe”. Upéi heʼive: “Koʼã ñeʼẽ ningo añetegua ha ikatu pejerovia hese” (Revelación 21:5, NM). Iporãite vaʼerã nde ha ne hentekuéra peñehaʼãramo peaprende mbaʼéichapa ikatu pemoirũ umi omombaʼeguasúvape Ñandejárape. Pejapóramo upéicha, pehecháta mbaʼéichapa Ñandejára okumpli umi ipromésa porãita.
Ko méspe ikatu relee la Bíbliape
1 Pedro kapítulo 1-5; 2 Pedro 1-3; 1 Juan 1-5; 2 Juan 1-13; 3 Juan 1-14; Judas 1-25 ha Revelación kapítulo 1-22
^ párr. 5 Reikuaave hag̃ua mbaʼéichapa Jesús sakrifísio ñanepytyvõ, ikatu rehecha kapítulo 5, lívro Mbaʼépa añetehápe omboʼe la Biblia?, ojapóva testígo de Jehová.
