Ko múndope henyhẽte pe pornografía ha oimehápe rei ojehecha. a Por ehémplo, télepe, Internet, propagánda, pelíkula, rrevísta, katálogo, videohuégo, selulár ha músikape jepe oñehendu mbaʼe tieʼỹ. Koʼág̃arupi oĩ avei umi páhina ikatuhápe oimeraẽva ohupi ha okomparti umi fóto tieʼỹ. Oparupiete heta hetave umi ohecháva pornografía (ehecha pe rrekuádro  “¿Hetápa oĩ ohecháva pornografía?”).

Koʼág̃arupi umi hénte tuichaiterei okambia opensáva pe pornografíare. Ymave ojehecha ivaietereívaramo upéva, koʼág̃a katu ndaupeichavéima. Profesóra Gail Dines heʼi: “Yma ojeʼe vaʼekue ivaiha umi pornografía ohechaukapaitéva umi mbaʼe kyʼa térã tieʼỹ ojejapóva, ha oporombojeguaru voi. Koʼág̃a katu noñepensavéima ivaietereiha umi mbaʼe”.

¿Mbaʼépa nde ere? ¿Ikatúpa jahecha pornografía jajedivertimi hag̃uánte, térãpa ikatu ñanembyai? Jesús heʼi: “Opa yvyramáta iporãva hiʼa porãiterei, ha opa yvyramáta hasýva hiʼa vai” (Mateo 7:17, NM). ¿Mbaʼépa ikatu jaʼe pe pornografíare? ¿Ikatúpa ojapo vai ñanderehe? Jaikuaa hag̃ua jahechamíta mbohapy mbaʼe.

MBAʼÉPA HEʼI UMI IÑARANDÚVA: Pe pornografía ningo peteĩ vísio. Umi doktór ha investigadorkuéra heʼi voi ikatuha ñambojoja crack rehe (kokaína joguaha).

Brian b ojepokuaa vaʼekue ohecha pornografía Internétpe ha oñenvisiaite voi hese. Haʼe omombeʼu: “Ndaikatúi vaʼekue ajejoko. Haʼete voi ajedrogáva mbaʼe ahechávo hína. Péro upe rire añeñandu vaieterei, aryryipa ha cheakãrasy apytávo. Añehaʼãmbaite ningo aheja hag̃ua, ha heta áño rire ae apoiete chugui”.

Umi oñenvisiáva pornografíare, oñomikuaa ha hasy ojepilla hag̃ua chupekuéra. ¿Mbaʼérepa? Haʼekuéra ndojeheʼasevéima voi avavére, oñemohaʼeño, otĩ, oñedeprimi, ijarhél ha ndovyʼái. Oĩ voi katu ojesuisidaséva upévare. Sergio, peteĩ kuimbaʼe ojepokuaa vaʼekue káda día omboguejy pornografía iselulárpe, omombeʼu: “Ahecha rire pornografía, nañeʼẽvéima avavéndi ha upévantema che akãme. Péro upéi añeñandu vaieterei, haʼete voi ndavaléiva mbaʼeverã, añeñandu cheaño ha ndaikuaái mbaʼépa ajapóta. Avei atĩ ha akyhyje ajerure hag̃ua ótrope chepytyvõ hag̃ua”.

Ñaimoʼãʼỹre jepe jahechárõ sapyʼaitemi pe pornografía, ojapo vaietereíta ñanderehe. Peteĩ doktóra hérava Judith Reisman, heʼi pe komite del Senado Estados Unidosguápe: “Umi taʼanga tieʼỹ jahecháva opytaitéma ñane akãme ha ombyai ñane pensamiénto. Jahechaseʼỹre jepe jahecháramo, ijetuʼúma javorra hag̃ua. Umi mbaʼe tieʼỹ ñamoingéva ñane akãme, hasýma jaipeʼa hag̃ua”. Susan, yma imitãme ohechaseʼỹhágui ohecha peteĩ taʼanga tieʼỹ oiporu jave Internet ha upéi oñenvisiaite hese. Haʼe koʼág̃a orekóma 19 áño, ha omombeʼu: “Ndaikatúi cheresarái umi taʼanga ahecha vaʼekuégui. Ha aimoʼãʼỹve jave, ou jey jepi chéve che akãme. Haʼete voi ndaikatumoʼãiva arakaʼeve avorra upe ahecha vaʼekue”.

MBAʼÉPA ÑAAPRENDE: Pe pornografía ojapo vaieterei ñanderehe ha ñandeguereko hembiguáiramo (2 Pedro 2:19).

MBAʼÉPA HEʼI UMI IÑARANDÚVA: “Pe pornografía ombyai umi matrimónio ha ifamíliape.” (The Porn Trap [Las trampas del porno], Wendy ha Larry Maltz.)

¿Mbaʼéichapa pe pornografía ohundi umi matrimónio ha ifamíliape?

• Upéva káusa umi omendáva ndojeroviavéi ojuehe ha ndojoayhuvéi (Proverbios 2:12-17).

• Upe ohecháva pornografía opensa ijehénte, oñemomombyry iména térã hembirekógui ha noñeñanduporãvéi hendive (Efesios 5:28, 29).

• Opensa ha ojapose umi mbaʼe tieʼỹ ohecháva (2 Pedro 2:14).

• Upe ohecháva pornografía, oĩ jave iména térã hembirekóndi, oovliga chupe ojapo hag̃ua upépe ohecha haguéicha, noĩporãiramo jepe (Efesios 5:3, 4).

• Pe pornografía káusare iñakãraku peteĩ ndahaʼéivare iména térã hembireko, térã omoakãratĩ chupe (Mateo 5:28).

 La Biblia heʼi porã umi omendáva ndovaleiha oñomoakãratĩ (Malaquías 2:16). Umi ména térã tembireko ojapóva upéva, ombyai hína imatrimónio ha ikatu voi ojueja térã ojedivorsia, ha upéva káusa umi mitã avei osufri.

Pe pornografía ningo ombyai avei umi mitãme. Brian, ñañeʼẽma hague ko artíkulope, omombeʼuve: “Arekópe 10 áño, ahuga jave tukaʼẽkañy, atopa vaʼekue heta rrevísta tieʼỹ orekóva che túva. Ha ndaikuaáiramo jepe mbaʼérepa ahechasete, aha jepi ñemiháme ahecha jey umi rrevísta. Péicha, mbeguekatúpe añenvisiaite hese, ha akakuaapa rire jepe asegi ahecha pornografía”. Heta investigadór ohechakuaa umi mitã ohecháva pornografía orekomaha rrelasión sexuál voi reheve, oñenose oimeraẽvandi, iviolénto oreko jave rrelasión sexuál ha ndohayhukuaavéima avavépe.

MBAʼÉPA ÑAAPRENDE: Pe pornografía ningo peteĩ venéno ohundíva umi matrimónio ha ifamíliape, ha ombohasa asy chupekuéra (Proverbios 6:27).

MBAʼÉPA HEʼI LA BIBLIA: “Pejukáke pende rete rembipota vai, ani penderekovai, ani penderekokyʼa, ani penembaʼepota vai, ani pendetarovaite pejaposégui ivaíva, ha ani pendetaryrýi, cháke upéva haʼe hína taʼanga ñemombaʼeguasu” (Colosenses 3:5, NM).

Jaʼe porãsérõ g̃uarã, Jehovápe c ombojeguaru pe pornografía. Upéva ndeʼiséi Ñandejára nañanentendeiha. Haʼe ningo ojapo vaʼekue kuña ha kuimbaʼépe oĩse hag̃uáicha oñondive, ha ikatu hag̃uáicha umi omendáva omeʼẽ ojupe oikotevẽva, oñemoag̃uive ojuehe ha ifamília hag̃ua hikuái (Santiago 1:17).

¿Mbaʼérepa upéicharõ ombojeguaru Jehovápe pe pornografía?

• Oikuaa pe pornografía ikatuha ohundi peteĩ tapichápe (Efesios 4:17-19).

• Ñanderayhu ha ndoipotái jasufri (Isaías 48:17, 18).

• Ndoipotái oñembyai umi matrimónio ha umi família (Mateo 19:4-6).

• Oipota ñanderekopotĩ ha jarrespeta ñande rapichakuéra derécho (1 Tesalonicenses 4:3-6).

• Oipota umi omendávante oreko rrelasión sexuál ha ndoipotái oñomoakãratĩ (Hebreos 13:4).

• Oikuaa umi ohecháva pornografía opensaha ijehénte, ndohechaveimaha hekópe pe rrelasión sexuál ha opensaha Satanás oipotaháicha (Génesis 6:2; Judas 6, 7).

MBAʼÉPA ÑAAPRENDE: Umi ohecháva pornografía ndaikatúi oiko Ñandejára amígoramo (Romanos 1:24).

Péro Jehová oiporiahuvereko ha oipytyvõse umi ohejasévape ko vísio vaiete. La Biblia heʼi: “Ñandejára imbaʼeporã ha oporoporiahuvereko, ndaipochyreíri ha oporohayhu. [...] Haʼe oikuaa mbaʼéguipa ñandeapo rakaʼe, oikuaa porã yvynteha voi ñande” (Salmo 103:8, 14). Jehová oipota umi iñumíldeva oñemoag̃ui hese, haʼe ningo “ñandeporiahuverekóta ha imbaʼeporãta ñanepytyvõ hag̃ua ñaikotevẽ jave” (Hebreos 4:16, NM; ehecha heʼihápe:  “Mbaʼéichapa ikatu jaheja pe pornografía”).

La Biblia omombeʼu oĩ hague heta ohejáva umi vísio vaiete, Ñandejára oipytyvõ rupi chupekuéra. Por ehémplo, 1 Corintios 6:11 heʼi: “Ñandejára ijespíritu rupive penemopotĩma, penemomarangatúma, ha heʼíma penderekojojaha ñande Ruvicha Jesucristo rérape” (NM). Umichagua tapicha ikatu heʼi apóstol Pablo heʼi haguéicha: “Opa mbaʼerã chembarete Ñandejára omeʼẽgui chéve podér” (Filipenses 4:13, NM).

Susan oñenvisiaite vaʼekue pornografíare, péro upéi oheja. Haʼe omombeʼu mbaʼépa oipytyvõ chupe: “Jehová añoite ikatu ñaneguenohẽ ko vísio vaietégui. Jahejáramo haʼe ñanepytyvõ ha ñanesãmbyhy, ikatúta ñanderekopotĩ ha jaiko iñamígoramo. Ñandejára arakaʼeve nañanderejareimoʼãi”.