¿Ndépa reguerovia Ñandejára oexistiha? Ha oimérõ upéicha, ¿mbaʼéichapa rehechaukáta upéva? Umi mbaʼe oĩvare ñande jerére jahechakuaa oĩha peteĩ Apohare iñarandu, ipoderóso ha ñanderayhúva. ¿Mbaʼe mbaʼépa oĩve ohechaukáva Ñandejára oexistiha? ¿Ikatúpa jaguerovia? Jaikuaa hag̃ua, ñahesaʼỹijomi apóstol Pablo heʼi vaʼekue umi kristiáno Romaguápe.

Haʼe heʼi: “Ndaikatúiramo jepe ojehecha Ñandejárape, ko múndo ojejapo ypy guive, hembiapokuére umi hénte ikatu ohecha mbaʼeichaguápa haʼe, ohecha ipodér opaʼỹva ha haʼeha Ñandejára, upévare haʼekuéra ndaikatúi onega Haʼe oĩha” (Romanos 1:20, NM). Pablo heʼiháicha, Ñandejára rembiapokuére ikatu jahecha Haʼe oexistiha. Ñahesaʼỹijovemína Pablo ohai vaʼekue.

Haʼe heʼi “ko múndo ojejapo ypy guive” ojekuaaha mbaʼeichaguápa Ñandejára. ¿Mbaʼépa heʼise upéva? Pe ñeʼẽ griégo ojetradusíva “múndo” heʼise hína yvyporakuéra, ndahaʼéi ko yvy ñande jaikoha. a Upéicha Pablo ohechauka yvyporakuéra ojejapo ypy guive, ohechakuaamaha Ñandejára rembiapokuére mbaʼeichaguápa haʼe.

Avave ndaikatúi onega Ñandejára oexistiha, enterovénte “ikatu ohecha” upéva. Ñandejára rembiapokue michĩvévare jepe jahechakuaa oĩha peteĩ Apohare iñarandu, ipoderóso ha ñanderayhúva. Ñapensamíntena umi plánta ha animalkuérare, ¿ndohechaukáipa umíva iñaranduetereiha Ijapohare? Ha umi estrélla ojajaipáva yvágare, ¿ndohechaukái piko avei Ñandejára ipoderosoha? ¿Mbaʼépa jaʼekuaa umi tembiʼu hepa jepévare ha pe koʼẽju térã kuarahy reike iporãitévare? ¿Ndohechaukáipa umíva Ñandejára ñanderayhuetereiha? (Salmo 104:24; Isaías 40:26.)

Hetaiterei mbaʼe oĩ ohechaukáva Ñandejára oexistiha ha avave “ndaikatúi onega” upéva. Peteĩ karai katupyry heʼi: Ñamoĩ chupe peteĩ kuimbaʼe omaneháva hína ohóvo ohechaha peteĩ letréro heʼíva ndaikatuiha osegi derécho, síno ojere vaʼerãha oho hag̃ua ótro tapérupi. Péro haʼe nopenái upévare ha osegínte oho derécho. Upéi peteĩ polisía ojoko ko kuimbaʼépe omulta hag̃ua chupe, péro haʼe heʼi ndohechái hague upe letréro. Pe polisía ndogueroviái chupe, pórke upe letréro tuicha ha ojekuaa porãiterei, avave ndaikatúi heʼívo ndohechaiha. Avei pe polisía ohechakuaa pe kuimbaʼe ndoguerekoiha provléma hesápe ha upévare ndogueroviái chupe. Ha ndahaʼéi upéva añónte, umi omaneháva ojesareko vaʼerã voi umi letrérore ha ojapo upépe heʼiháicha. Upéicha avei umi plánta, animál ha opa mbaʼe oĩva ñande jerére, ohechauka porãiterei Ñandejára oexistiha. Ndaikatúi jaʼévo ndajahechaiha.

Ñandejára rembiapokue ohechauka ñandéve mbaʼeichaguápa haʼe. Péro oĩ peteĩ lívro ñanepytyvõtava jaikuaa porãve hag̃ua chupe, upéva hína la Biblia. Ko lívrope oñembohovái ko porandu iñimportantetéva: ¿Mbaʼépa ojapóta Ñandejára ko yvy ha yvyporakuéra rehehápe? Jaikuaávo upéva, ñañemoag̃uivéta hese, ha hembiapokuére entéronte jahechakuaáta “mbaʼeichaguápa haʼe”.