Ikatu oime rehecha oĩha heta rrelihión ndosegíriva la Biblia heʼíva, ha upévare nderejeroviavéima ni peteĩ rrelihiónre. Péro oĩ hína peteĩ rrelihión ikatuha jajerovia. Jesús oikórõ guare ko yvy ape ári, oĩ vaʼekue omoirũva chupe ha haʼe omboʼe chupekuéra oiko hag̃ua Ñandejára oipotaháicha. Ha koʼag̃aite peve oĩ gueteri kristiáno añetegua oñehaʼãva oiko la Biblia heʼiháicha. ¿Mávapa umíva?

Estela, ñañeʼẽ hague pe ótro artíkulope, heʼi: “Astudia rire la Biblia testígo de Jehová ndive, añepyrũ antende upépe heʼíva. Ha ahechakuaa mbaʼéichapa oñekumpli cherehe Jesús heʼi vaʼekue Juan 8:32-pe: ‘Peikuaáta pe añetegua ha pe añetegua penemosãsóta’”.

Ray heʼi avei: “La Biblia rupive, umi testígo de Jehová ohechauka chéve ndahaʼeiha Ñandejára upe ombohasa asýva yvyporakuérape. Ha opermitíramo jepe oiko heta mbaʼe vai, opromete koʼẽrõitéma oipeʼapataha umíva”.

Jaikuaa ningo ijetuʼuha ñanediferénte ñande rapichakuéragui ha ndajajapói haʼekuéra ojapóva. Péro ñanemanduʼa vaʼerã iñimportanteveha jajapo la Biblia heʼíva. Heta oĩ oikotevẽva oñepytyvõ chupe ontende hag̃ua la Biblia ha oiko hag̃ua upépe heʼiháicha. Upévare, káda semána umi testígo de Jehová omboʼe la Biblia hetaiterei héntepe, hogaitépe ha gratiete. Heta tapicha oaprende hína mbaʼépa añetehápe omboʼe la Biblia, upéicha oñemoag̃ui Ñandejárare ha oiko vyʼápe. *

Ág̃a umi testígo de Jehová og̃uahẽ jey vove nde rógape ikatu reporandu chupekuéra mbaʼérepa ojerovia irrelihión rehe. Upéi ehecha mbaʼépa omboʼe ha mbaʼéichapa oiko hikuái. Upéicha reikuaáta oĩpa peteĩ rrelihión ikatuha rejerovia.