Akakuaa peteĩ puévlo héravape Turku opytáva ag̃ui peteĩ puértogui ha upépe enterovénte ombaʼapo. Che túva boxeadór ha osẽ vaʼekue kampeón, che ermáno ha che ropraktika vaʼekue avei upe depórte. Aike tiémpope eskuélape ndakyhyjeiete voi ahaʼã hag̃ua sóko oimeraẽvandi. Che mitãrusúpe katu aime vaʼekue peteĩ pandílla ojekuaávape opárupi ha koʼýte aike provlémape. Avei chegusta pe músika heavy metal ha apensa voi ikatuha oiko chehegui peteĩ kantánte famóso.

Upéi ajogua peteĩ batería umi músiko oiporúva, aforma peteĩ grúpo ha che voi apurahéi. Igustoitereími chéve ajapo sarambi pe esenáriope apurahéi jave ha káda día ifamosove ore grúpo rojapógui heta vyrorei rombopu jave. Roñepyrũma avei heta ore hénte ha rograva ore músika. Heta tapichápe ogusta pe último dísko roguenohẽ vaʼekue. Áño 1980-pe katu roho rombopu heta hendárupi Estados Unídospe romopropagánda hag̃ua ore músika. Heta vése rombopu Nueva York ha Los Ángelespe ha roho mboyve Finlándiape roñemongeta heta emprésa ogravávandi umi kantántepe imúsika.

Igústoramo jepe chéve aime pe grúpope, ndavyʼái ha ajapose umi mbaʼe ideprovéchotava. Ambyasy ahechávo mbaʼéichapa ko múndope enterovénte umi músiko ifamosose ha tuichaháicha okompeti hikuái ohupyty hag̃ua upéva. Péro che voi ajapo heta mbaʼe ivaíva ha nañeñanduporãi umívare. Upéicha rupi akyhyje ahárõ g̃uarã infiérnope. Añehaʼãmbaite alee heta lívro oñeʼẽva rrelihión rehe ahecha hag̃ua nachepytyvõipa, ha apensáramo jepe Ñandejára ndacheguerohorymoʼãiha, ajerure chupe chepytyvõ hag̃ua.

Añemantene hag̃ua, ambaʼapo peteĩ ofisína de korréope. Peteĩ árape aikuaa ombaʼapoha orendive peteĩ testígo de Jehová ha ijuru ramóvaicha aporandu chupe umi mbaʼe aikuaaséva. Amombaʼeterei ahechávo mbaʼéichapa la Biblia rupive ombohovái  chéve umi mbaʼe aporandúva. Upévare añepyrũ astudia hendive la Biblia. Upe riremínte che grúpo orresivi peteĩ invitasión rograva hag̃ua peteĩ dísko Estados Unídospe. Che apensa ajavypaitetaha ndaaprovecháiramo upe oportunida.

Amombeʼu pe Testígo chembostudiávape agravaseveha peteĩ dísko ha upéi añehaʼãmbaitetaha ajapo umi mbaʼe aaprendéva la Bíbliagui. Haʼe ndeʼíri chéve mbaʼépa opensa upévare, síno ojerure chéve alee hag̃ua Jesús heʼi vaʼekue Mateo 6:24-pe. Upépe heʼi: “Avave ndaikatúi ombaʼapo tembiguáiramo mokõi patrónpe g̃uarã”. Akirirĩete ahecha rire mbaʼépa Jesús heʼise upe téxtope. Péro upe rire haʼehaitéma ndoikuaái mbaʼépa heʼíta chéve amombeʼúrõ guare chupe aheja hague che grúpo amoirũségui Jesúspe.

La Biblia peteĩ espéhoicha ohechauka chéve akambia vaʼerãha heta mbaʼépe (Santiago 1:22-25). Añetehápe aiko vaʼekue che akãre, añemombaʼeguasu, apensa chejehénte, che juru tieʼỹ, aikovaisénte voi, apita ha che kaʼu. Ahechakuaávo ni michĩmi ndajapoiha la Biblia heʼíva, añeñandu vaieterei. Péro adesidi akambiataha (Efesios 4:22-24).

Ñepyrũrã chejopy asy umi mbaʼe vai ajapo vaʼekue, péro pe chemboʼéva la Biblia heta chepytyvõ. Haʼe ohechauka chéve Isaías 1:18 heʼíva: ‘Pene rembiapo vaikue pytãvéramo jepe, ahejáta morotĩ asy mandyjúicha’. Kóva ha hetave téxto ohechauka porã chéve mbaʼeichaitépa ñande Ru yvagapegua oiporiahuvereko ha oipytyvõse umi oñembyasývape hembiapo vai haguére.

Aikuaa porã rire Jehovápe, ahayhu chupe che pyʼaite guive ha upéva chemomýi añemeʼẽ hag̃ua chupe (Salmo 40:8). Áño 1992-pe ajevautisa peteĩ asambléa internasionál ojapóvape umi testígo de Jehová San Petersburgope (Rusia).

Jehová puévlope areko hetaiterei amígo ovaléva. Sapyʼánte roñembyaty rombopu hag̃ua umi músika iporãva ha rohasa porã oñondivepa Ñandejára oipotaháicha (Santiago 1:17). Che rembireko ningo héra Kristina ha ahechakuaa Jehová ovendesiha ore matrimónio. Hendive akomparti opaite mbaʼe, tahaʼe umi mbaʼe chembovyʼa térã chemoñeñandu vaíva. Chupe ikatu amombeʼupaite mbaʼéichapa añeñandu.

Ndaikuaáirire Jehovápe, ymáma amano vaʼerãmoʼã. Che ningo aiko vaʼekue che akãre ha nasẽi provlémagui. Koʼág̃a katu avyʼa ha aikuaa maʼerãpa aikove. ¡Añeñandu porãiterei!