Opavave ikatu ñañemoag̃ui Ñandejárare. Haʼe oipota ñañemboʼe chupe ñande pyʼaite guive. Peteĩ túva ningo ovyʼa itaʼýra oñemongetáramo hendive ha omobeʼu chupe mbaʼéichapa oñeñandu ha mbaʼépa oipyʼapy chupe. Péicha avei Jehová oipota jajapo. Péro ñanderayhúramo jepe, nomeʼẽi ñandéve opa mbaʼe jajeruréva chupe. Haʼe ningo oikuaahína mbaʼérepa ojapo upéicha ha la Biblia omyesakã ñandéve mbaʼérepa.

Apóstol Juan ohechauka mbaʼeichagua ñemboʼépa ohendu Ñandejára: ‘Jajerovia niko Ñandejára rehe jajeruréramo chupe haʼe oipotaháicha ñanerendutaha’ (1 Juan 5:​14, JMP). Upeichaite ningo, ndaikatúi jajerure ñane ñemboʼépe umi mbaʼe ndahaʼéiva Ñandejára rembipota. Pór ehémplo Ñandejára nohendúi umi oñemboʼévape ogana hag̃ua lotería, térã ãichagua mbaʼe. Nohendúi avei umi oñemboʼévape mbaʼe vairãnte. Upévare disípulo Santiago heʼi: ‘Pejerure ha ndapehupytýi, peiporu vaise ha pemohyg̃uatãségui pende rete ojerurévante.’ (Santiago 4:​3, ÑÑB.)

Pór ehémplo, ñapensamína mokõi ekípo oñemboʼehahína ogana hag̃ua peteĩ partído. Ohendútapa Ñandejára Jehová iñemboʼekuéra? Nahániri. Upeichaite avei oiko oĩ jave gérra, káda ládo oñemboʼe hikuái ogana hag̃ua hetãygua.

Ha umi naiñeʼẽrendúiva Ñandejárape, ndaikatúinte avei ohaʼarõ haʼe ohendu chupekuéra. Jahechamína mbaʼépa heʼi la Biblia umi hovamokõivape: “Ha peñemboʼe heta hetavéramo jepe, Che napohendumoʼãi; pende po henyhẽgui pende rapicha ruguýgui” (Isaías 1:​15, ÑÑB). La Biblia heʼi porã voi: ‘Nañahenduséiramo Ñandejára léi, ñane ñemboʼe jepe ombojeguaru chupe’ (Proverbios 28:9).

Péro Ñandejára ohendu umi oñehaʼãvape oservi chupe Haʼe oipotaháicha. Upéva ndeʼiséi Haʼe omeʼẽtaha opavavépe imbaʼejerure. Jahechamína koʼã ehémplo.

Moisés ningo oĩ porãiterei vaʼekue Ñandejára ndive, upéicharamo jepe oñemboʼevaʼerã ‘Ñandejára oipotaháicha’. Peteĩ jey, ojerure asy Ñandejárape oike hag̃ua Canaánpe: “Tahasamína che avei Jordán mboypýri ha tahecha pe yvy porã”. Péro Moisés ojeruréva ningo ndahaʼéi Jehová rembipota. Ñandejára okastigavaʼekue chupe opeka haguére ha heʼimavaʼekue ndoikemoʼãiha pe yvy oñeprometevaʼekuépe. Upévare Ñandejára nomeʼẽi chupe pe oipotáva ha heʼi chupe: “Anive nemanduʼa chéve upévare” (Deuteronomio 3:​25, 26; 32:51).

Jahechami koʼág̃a apóstol Pablo ohasavaʼekue. Haʼe ningo heʼi: “Areko peteĩ ñuatĩ chekutúva”, ha ojerure Jehovápe oipeʼa hag̃ua chugui upéva (2 Corintios 12:7). Pe “ñuatĩ” haʼe heʼíva ikatu hína ndohechaporãigui térã opersegi memégui chupe umi ndaijaʼéiva hese, ha avei umi ‘iñermanoguaʼukuéra’ (2 Corintios 11:​26, ÑÑB; Gálatas 4:​14, 15). Pablo heʼi: “Mbohapy jevy ajerurevaʼekue Ñandejárape oipeʼa hag̃ua chehegui ko jehasa asy”. Péro Jehová oikuaa porã Pablo osegíramo opredika ohasa asýramo jepe, ojehechataha Ñandejára ipoderosoha ha Pablo ojeroviaha Hese. Ha upéicha oipeʼa rangue chugui pe “ñuatĩ”, heʼi chupe: ‘Che puʼakakue ojehechakuaave pe máva ikangýramo’ (2 Corintios 12:​8, 9, BNP).

Upeichaite, Jehová ningo oñangareko ñanderehe. Upévare omeʼẽ umi mbaʼe ou porãtavante ñandéve. Haʼe ningo ñanderayhu ha ñanerendu ñañemboʼéramo chupe oipotaháicha. Upéicha ohechauka ñandéve la Biblia.