Mbaʼeichaguápa ñande Ru yvagapegua

HETA tapicha ningo oñemboʼe pe padrenuesto. Upéva Jesús omboʼevaʼekue hemimboʼekuérape, ohechauka hag̃ua chupekuéra mbaʼéichapa oñemboʼevaʼerã (Mateo 6:​9-13, BNP). Umi tapicha orrepeti jave ko ñemboʼe, heʼi Ñandejárape: “Ore Ru”. Upéicharõ jepe, mboýpa umíva apytégui oikuaa porã chupe?

Enterove voi ñañeporanduvaʼerã: “Añembojápa Ñandejárare che amigorõguáicha? Añemongetápa hendive ha amombeʼu chupe mbaʼépa chepyʼapy ha mbaʼépa chembovyʼa? Aikuaa porãpa Ñandejárape? Ha mbaʼépa ajapovaʼerã aikuaa porã rupi chupe?”.

‘Héra Jehová’

Umi mitã ningo michĩme heʼínte itúvape “papá”. Péro, tuichavévo hikuái oikuaáma itúva réra ha umi mbaʼe porã ojapóva. Upévare heta vése ijaguara hikuái itúva reheve. Ha ñandépa jaikuaa avei ñande Ru yvagapegua réra ha mbaʼeichaguápa haʼe?

Heta oĩ jepi heʼíva “toñemomarangatu nde réra”. Péro ndoikuaái mbaʼépa heʼíta oñeporandúramo chupekuéra “mávapa hína upéva?”. Mbaʼéichapa ñande ikatu jaikuaa mávapa? Jahechavaʼerã mbaʼépa heʼi la Biblia. Upépe heʼi: ‘Héra Jehová’ (Éxodo 15:​3, ÑÑB). Ha jaguerovia Ñandejára oĩha jahechávo umi estrélla ojajaipáva, peteĩ montáña ijyvatetereíva térã peteĩ rrío henyhẽtéva pirágui.

Ñandejára oipota jaikuaa héra. Mbaʼérepa? Héra voi omombeʼu ñandéve mbaʼeichaguápa Haʼe. Jehová heʼise chugui ikatuha oiko oimeraẽ mbaʼe oñekotevẽva ojapo hag̃ua hembipota. Pór ehémplo: peteĩ túva oñangareko hag̃ua ifamíliare omoĩ chupekuéra oikotevẽva, oñemoñeʼẽ, okorrehi, ha omboʼe chupekuéra. Oñeʼẽ avei ifamília rérape ha oiko hesevekuéra oikotevẽ jave. Upéicha avei Jehová réra ohechauka ñandéve haʼe ojapotaha hembipota, ha upéva oguerúta isiervokuérape heta mbaʼe porã.

Ñahesaʼỹijomi mbaʼépa heʼise Ñandejára réra jaikuaa hag̃ua mbaʼe mbaʼépa ikatu ojapo. Upéva ñanepytyvõta jaikuaa hag̃ua mbaʼeichaguápa Haʼe ha mbaʼépa jajapovaʼerã ñañemoag̃ui hag̃ua hese.

‘Mborayhu ha pyʼaguapy Jára’

Apóstol Pablo heʼi ñande Apoharére ‘Ñandejára ningo mborayhu ha pyʼaguapy jára’ (2 Corintios 13:11). Mbaʼérepa? Jesucristo heʼimavaʼekue voi: ‘Ñandejára ohayhuetereígui opa yvypórape, omeʼẽvaʼekue Itaʼýra peteĩete, ani hag̃ua omano umi hese ojeroviáva, oikove hag̃ua uvei opa ára’ (Juan 3:16). Jahechakuaa Ñandejára ñanderayhuetereígui, omeʼẽ hague Itaʼýra ñanderehehápe. Ha jajeroviáramo Jesucrístore jaikovéta opa ára g̃uarã, ha ndajahasaʼasyvéima pekadór haguére. Upévare, Pablo heʼivaʼekue: ‘Mbaʼe vai apo oporogueraha ñemanóme, Ñandejára jopói katu jeikove opa  ára g̃uarãme Jesucristo rupive’ (Romanos 6:23). Upévare ñande jahayhuvaʼerã Ñandejárape ha ñañemoag̃ui hese.

Ñandejára ningo ohayhu peteĩ iñeʼẽrendúvape. Moisés heʼivaʼekue umi isrraelíta naiñeʼẽrendúivape: ‘Péicha piko pemyengovia Ñandejárape, peẽ tekove tavyrai ha akãne. Ndahaʼéi piko pende Ru, pende apohare ha upe penemombaretéva’ (Deuteronomio 32:6). Mbaʼépa ñantende koʼápe heʼívare? Ojavýramo jepe umi isrraelíta heta mbaʼépe, Itúva yvagapegua akóinte ohayhu chupekuéra. Omoĩ chupekuéra oikotevẽva, tahaʼe hembiʼurã térã omombaʼeguasu hag̃ua chupe.

Enterove ningo jahasa asy jave, jajepyʼapy ha ikatu voi ndajavyʼavéi. Ñaikotevẽ jepi peteĩ ñanepytyvõvaʼerãre ñapensa porã hag̃ua. Ha mávapa hína upe ñanepytyvõtava? La Bíbliape jahechakuaa ndaiporiha Jehováicha ñanderayhu ha oñemoñeʼẽséva ñandéve ha ñanedefendeséva. Omombeʼu ñandéve mbaʼérepa jahasa asy ha mbaʼéichapa ikatu ñambohovái. Peteĩ túva ningo oipytyvõ ha omokunuʼũ itaʼýrape hoʼa ha ojegolpeáramo. Upéicha avei Jehová haʼete ojayvýva ñanepytyvõ hag̃ua ñaikotevẽ jave. Haʼe ningo katuete ombohasa ipo umi ojeroviávape hese (Isaías 59:1).

Ñandejára ohechauka avei ñanderayhuha ‘ohendu rupi ñane ñemboʼe’ (Salmo 65:​3, [65:​2, NM]). Mbaʼérepa haʼe ñanerendu haguére ikatu jaʼe ñanderayhuha? Apóstol Pablo heʼivaʼekue: ‘Ani pejepyʼapy mbaʼevére. Pemoĩ uvei opa mbaʼe Ñandejára pópe peñemboʼévo. Pejerure ha peagradese avei chupe. Ha Ñandejára omeʼẽne peẽme ipyʼaguapy, tuichavéva opa ikatu vaʼerãgui yvypóra ohaʼarõ. Ha pyʼaguapy oñangarekóne pende pyʼa ha pene remiandúre Cristo Jesús rupive’ (Filipenses 4:​6, 7). Péicha Jehová omeʼẽse ñandéve ‘ipyʼaguapy tuichavéva opa ikatu vaʼerãgui ñahaʼarõ’. Upearã ñañemboʼevaʼerã chupe ñande pyʼaite guive ha jajapo Haʼe ojeruréva ñandehegui.

‘Ñandejára iñarandu’

La Biblia heʼi Jehováre ‘iñaranduha’. Jehová iñarandu rupi, oikuaa porãiterei mbaʼeichaguápa ñande ha mbaʼépa ñaikotevẽ (Job 36:4; 1 Samuel 2:3). Upévare heʼivaʼekue: ‘Ndahaʼéi tembiʼu añónte oikotevẽva yvypóra oikove hag̃ua; oikotevẽ avei opa ñeʼẽ Ñandejáragui oúva’ (Deuteronomio 8:3; Mateo 4:4). Upéicharõ ndahaʼéi ñanerembiʼurãnte ñaikotevẽva javyʼa hag̃ua.

La Bíbliape ningo ñande Apohare ohechauka ñandéve ñande raperã. Upévare ñanepytyvõ hag̃ua ‘opa mbaʼe Ñandejára heʼíva’, ñahesaʼỹijovaʼerã la Biblia ha jajapo upéicha. Pór ehémplo: Peteĩ ermána hérava Zuzanna omombeʼu mbaʼeichaitépa Ñandejára Ñeʼẽ oipytyvõ chupe ha iménape. Haʼe heʼi: “Ore ningo rolee la Biblia oñondive, roho rreunionhápe ha romombeʼu ore rapichakuérape roaprendevaʼekue. Upévare rojoayhuve koʼẽ koʼẽre. Jehová orehekomboʼe rupi,  mokõive roñehaʼã roservi porã chupe ha roiko porãve oñondive”.

Ha ndépa reipota avei Ñandejára ohechauka ndéve nde raperã? Restudia meméramo la Biblia ha rejapo heʼíva, reikuaáta heta mbaʼe porã Ñandejáragui (Hebreos 12:9).

‘Ñandejára oporosalváva’

Koʼág̃a rupi ñaikotevẽterei peteĩ oñangarekovaʼerãre ñanderehe ha ñaneguenohẽtavare jejopy vaígui. Ko múndope henyhẽte oñorairõva, ha avave ndoikuaái mbaʼépa ohaʼarõ chupekuéra. Heta tetãme hiʼãiterei chupekuéra opáma umi ñorairõ guasu; ótro henda rupi katu oipota hikuái ndaiporivéi umi mbaʼe vai apoha, umi imboriahuetereíva ha umi terrorísta. Mávapa ikatu ñandepeʼa koʼã mbaʼe vaígui?

La Biblia heʼi: ‘Jehová réra ningo peteĩ óga yvate imbarete porãva; hendápe oñanivaʼerã pe hekopotĩva ojesalva hag̃ua’ (Proverbios 18:​10, ÑÑB). Umi ojeroviáva Jehová rérare oikuaa haʼe osalváma hague isiervokuéra ymaguarépe ha osalvataha avei chupekuéra koʼẽrõite. Jehová ningo ohechaukáma heta vése ikatuha osalva isiervokuérape. Pór ehémplo, Israélpe osalva hag̃ua ohundi faraón karrokuéra ha ijehérsito. Péicha Jehová ohechauka ojapoha oprometevaʼekue, imanduʼaha umi ohasa asývare ha oipytyvõseha chupekuéra (Éxodo 15:​1-4). 

Jaikove hag̃ua opa ára g̃uarã jajeroviavaʼerã Jehová ñandesalvataha. Upéicha ojapo rréi David, haʼe ningo ogueropuʼakavaʼekue heta mbaʼe vai. Upévare heʼi Jehovápe kóicha: “Ndéko che Jára ha upe cherenohẽva jejopy vaígui” (Salmo 25:5). Apóstol Pedro heʼivaʼekue avei: ‘Jehová oguenohẽkuaa jejopy vaígui umi hese ojeroviávape’ (2 Pedro 2:​9, ÑÑB).

Jehová opromete umi ojeroviávape hese: ‘Che añangarekóta nderehe reikuaágui cheréra’ (Salmo 91:​14, ÑÑB). Koʼág̃a rupi, Ñandejára siervokuéra ohecháma mbaʼéichapa okumpli upe oprometevaʼekue. Pór ehémplo, Henryk oikóva Polóniape iprovléma heta ha ojepersegíramo jepe, setenta áñoma oservi Jehovápe. Orekórõ guare 16 áño, ohecha mbaʼéichapa ojegueraha itúvape campo de concentración Auschwitz-pe. Umi nazi ogueraha avei kárselpe Henryk ha iñermánope. Upe rire ojeguerova chupe heta campo de concentraciónpe. Upéicharõ jepe, Henryk imanduʼávo ohasavaʼekuére heʼi: “Ijetuʼuve jave, Jehová ndacherejaivaʼekue. Heta vése ningo aime amano hag̃uaichaitéma, péro haʼe katuete chepytyvõva akóinte ajerovia hag̃ua  hese”. Jehová ningo omombarete isiervokuéra jerovia ha oipytyvõ chupekuéra ogueropuʼaka hag̃ua heta mbaʼe vai.

Jajeroviáramo Ñandejárare, haʼe koʼẽrõitéma ñandesalváta ha ñaneguenohẽta opa jejopy vaígui. Upévare heʼi: “Cheñoite opa mbaʼe Jára. Ndaipóri ambue ikatúva oporopeʼa jejopy vaígui” (Isaías 43:11). Ha upéva Ñandejára ipuʼakapáva ojapóta hiʼára guasúpe. Upe árape ohundipáta umi iñañávape ha osalváta umi ipyʼaporãvape (Apocalipsis [Revelación] 16:​14, 16; Proverbios 2:​21, 22). Upe rire, ‘umi oñemomirĩvape oñemeʼẽta ko yvy imbaʼerã ha pyʼaguapýpe oikóta hikuái’ (Salmo 37:​11, ÑÑB).

Ikatu oiko ñandehegui Ñandejára raʼy

Proféta Malaquías tiémpope, umi Israelgua heʼi Jehová ituvakueraha. Péro omombaʼeguasu ha ojeroviarangue hese, oikuaveʼẽ chupe pán oñembyaipapyrémava ha umi mymba hesatũ ha ikarẽmbáva. Upévare heʼi chupekuéra: ‘Chéramo pende ru, mbaʼére piko nachemombaʼéi?’ (Malaquías 1:6).

Péro, nde ningo ndovaléi rejapo umi isrraelíta ojapo haguéicha. Upévare ore romokyreʼỹ reikuaa porãve hag̃ua Jehovápe ha reñemoag̃ui hag̃ua hese. Jesús remimboʼe Santiago ningo heʼi voi: ‘Peñemoag̃ui Ñandejárare ha haʼe oñemoag̃uíta penderehe’ (Santiago 4:8).

Tuichaiterei mbaʼe ningo jareko ñande rúramo Jehovápe. Upévare ñamombaʼeguasuvaʼerã chupe ha jajapo opa mbaʼe Haʼe oipotaháicha. Haʼe ndahesaraimoʼãi ñañehaʼã hague jajapo hembipota. Ñanepytyvõta voi katu akóinte jaguata hag̃ua pe múndo pyahu rapére. Upépe ningo “ndaiporimoʼãvéima ñemano, tasẽ, jaheʼo, ha temimbyasy” (Apocalipsis [Revelación] 21:4). Upe árape, umi iñeʼẽrendúva Jehovápe ‘ojeíta mbaʼe vai poguýgui ohupyty hag̃ua umi Ñandejára raʼykuéra reko sãʼỹ ojajaipáva’ (Romanos 8:​21, BNP).

[Komentário oĩva páhina 5-pe]

Ñandejára oipota jaikuaa héra Jehová, heʼiséva chugui ikatuha oiko oimeraẽ mbaʼe oñekotevẽva ojapo hag̃ua hembipota

[Komentário oĩva páhina 6-pe]

“Ijetuʼuve jave, Jehová ndacherejaivaʼekue.” (HENRYK)

[Komentário oĩva páhina 7-pe]

“Ore ningo rolee la Biblia oñondive, roho rreunionhápe ha romombeʼu ore rapichakuérape roaprendevaʼekue. Upévare rojoayhuve koʼẽ koʼẽre.” (ZUZANNA)