Ojehasa asy hína koʼág̃a rupi

LA Biblia heʼimavaʼekue ‘heta ojehasa asytaha’ ha upe tiémpope ohenói ‘ára paha’ (2 Timoteo 3:1-5; 2 Pedro 3:3-7). Jesús oñeʼẽ avei upe tiémpore hemimboʼekuéra oporandúro guare chupe ‘mbaʼéichapa oikuaáta hikuái opatamaha ko múndo’ (Mateo 24:3). Péro, jaikomapañaína upe tiémpope? Koʼápe oñemoĩ heta mbaʼe la Biblia heʼivaʼekue oikotaha ha avei umi mbaʼe oikóva koʼág̃a rupi. Emañamína ha ejepyʼamongetami umívare.

La Biblia heʼivaʼekue: opuʼãvaʼerã tetãnguéra ojuehe (Lucas 21:10; Revelación [Apocalipsis] 6:4).

Oikóva koʼág̃a: “Umi omanovaʼekue ñorairõhápe [síglo XX-pe] tres vése hetave umi omanovaʼekuégui gerrahápe pe síglo I ñande ára guive 1899 peve” (Instituto Worldwatch).

La BiIblia heʼivaʼekue: oĩta ñembyahýi ha mbaʼasy opárupi (Lucas 21:11; Revelación 6:5-8).

 Oikóva koʼág̃a: Áño 2004-pe ojekalkula 863 millones ñande rapicha hasyha ndokaruporãigui. Hetave siete millones pe áño pasádo guarégui (Organización de las Naciones Unidas para la Agricultura y la Alimentación).

Opárupi oĩ 1.000 millones oikóva ogaʼi mimípe. Dos mil seiscientos millones ndorekói água korriénte ni váño modérno, ha 1.100 millones katu oimehaichagua ýntema hoʼu (Instituto Worldwatch).

Quinientos millones oĩ iñakãnunduroʼýva, 40.000.000 isídava (VIH) ha áño 2005-pe katu 1.600.000 omano mbaʼasypoʼígui (Organización Mundial de la Salud).

La Biblia heʼivaʼekue: oĩta ombyaíva ko yvy (Revelación 11:18).

Oikóva koʼág̃a: ‘Heta mbaʼe yvypóra ojapóva ombyai ko planétape, upéicha rupi hetaichagua animál ha plánta opáma ohóvo. Ha upéva ñandéve avei ñandeapeligra’. Ha ‘heta mbaʼe ñane planéta nomeʼẽmbavéima ohóvo’ (Evaluación de los Ecosistemas del Milenio).

‘Yvypóra rembiapo ombyai pe atmósfera, upévare ikatu hakueterei térã roʼyetereíma, ha upéva ipeligróso ñane planétape g̃uarã (Instituto Goddard de Estudios Espaciales, NASA).

La Biblia heʼivaʼekue: pe marandu Ñandejára Rréinore oñeʼẽva oñemoherakuãta opárupi (Mateo 24:14; Revelación 14:6, 7).

Oikóva koʼág̃a: Áño 2007-pe, 6.957.854 testigos de Jehová opredika mil cuatrocientos millones de óra ári, omoherakuãvo pe marandu porã Ñandejára Rréinore oñeʼẽva. Ha ojapo  hikuái upéva 236 tetãme (Anuario de los testigos de Jehová 2008).

Jahechaháicha, la Biblia heʼimavaʼekue jahasataha heta provlémare. Upéicha avei, heʼi mbaʼérepa ikatu ñanekyreʼỹ. Jesús heʼivaʼekue oñemombeʼuvaʼerãha ‘pe marandu porã’: Ñandejára oisãmbyhyha Irréino rupive. Péro mbaʼépa hína Ñandejára Rréino? Mbaʼépa ojapóta pe Rréino oiko porãve hag̃ua yvyporakuéra? Ha mbaʼe mbaʼépa nde ikatu rehupyty pe Rréino rupive?

[Komentário oĩva páhina 5-pe]

La Biblia heʼimavaʼekue mbaʼéichapa ojeikóta koʼã tiémpope