Jahayhúkena Jehovápe ‘jahayhu haguéicha chupe iñepyrũme’

‘Emombaʼékena nde jerovia.’ (REV. 3:11.)

1, 2. Mbaʼéichapa reñeñandu reikuaa ypýrõ guare Jehovápe?

 NEMANDUʼÁPA mbaʼéichapa reñeñandu rehendu ypýrõ guare umi mbaʼe porã ohaʼarõva iñeʼẽrendúva Jehovápe? Ikatu reimemarakaʼe peteĩ rrelihiónpe. Upéicharõ, mbaʼéichapa reñeñandu ojehechaukárõ guare ndéve la Biblia rupive umi mbaʼe porã Ñandejára ojapótava? Térã oñemyesakãrõ guare ndéve umi mbaʼe nerentendeivaʼekue? Oiméne reñeñandu vai reikuaárõ guare japuha umi mbaʼe regueroviáva. Péro mbaʼeichaitépa revyʼanerakaʼe reikuaa rire mbaʼépa omboʼe Ñandejára Ñeʼẽ! Oiméramo nde sy ha nde ru oikuaamavaʼekue Jehovápe, nemanduʼápa mbaʼeichaitépa revyʼa redesidírõ guare reservi Chupe? (Rom. 12:2.)

² Heta ñane ermanokuéra ovyʼaiterei oikuaa ypýrõ guare Jehovápe ha oservi haguére chupe (Juan 6:44). Kyreʼỹme ojapo hikuái Jehová rembipota ha omombeʼu opavavépe ogueroviáva. Reñeñandúpa rakaʼe nde upéicha avei?

3. Mbaʼépa Jesús heʼivaʼekue umi ermanokuéra Efesoyguápe?

³ Jesús heʼivaʼekue umi ermanokuéra Efesoyguápe ojapoha heta mbaʼe porã. Péro heʼi avei ndohayhuveimaha hikuái Jehovápe yma guaréicha. Jesús heʼi chupekuéra: ‘Aikuaa porã ningo nde pyʼapýpe oĩva, ne rembiapokue ha regueropuʼaka hague heta mbaʼe. Ha aikuaa avei ndaikatuiha reaguanta iñañávape, ha remboyke hague umi ijapúva ha umi apostolguaʼúpe. Nde rejerovia porã cherehe, rehasa asýramo jepe, ha heta rembaʼapovaʼekue cherehehápe nekaneʼõʼỹre. Péro areko haʼevaʼerã nderehe: Ndacherayhuvéima yma guaréicha’ (Rev. 2:2-4).

4. Mbaʼérepa iporã koʼág̃a peve umi konsého Jesús omeʼẽvaʼekue?

⁴ Umi konsého Jesús omeʼẽvaʼekue Efesoyguápe ha umi kongregasión ypykuépe, oipytyvõ avei umi ohótavape yvágape ijetuʼuve jave, pe áño 1914 guive (Rev. 1:10). Koʼág̃a peve ningo iporã umi konsého oĩgui heta kristiáno ‘ndohayhuvéimava Jehovápe yma guaréicha’. Upévare, mbaʼéichapa ikatu ñamombarete ñande jerovia Jehováre ha jahayhu jey chupe yma guaréicha? Ñanemanduʼavaʼerã umi mbaʼe jahasavaʼekue ha jajepyʼamongeta hese.

Mbaʼérepa regueroviarakaʼe umi mbaʼe reaprendéva Ñandejára Ñeʼẽgui?

5, 6. a) Mbaʼépa jaikuaavaʼerã ñañemeʼẽ mboyve Jehovápe? b) Mbaʼérepa regueroviarakaʼe umi mbaʼe reaprendéva Ñandejára Ñeʼẽgui? c) Mbaʼépa nepytyvõta rehayhu jey hag̃ua Jehovápe yma guaréicha?

⁵ Ñañemeʼẽ mboyve Jehovápe jaikuaavaʼerã ‘hembipota’ (Rom. 12:1, 2). Upéva heʼise jaikuaavaʼerãha mbaʼépa omboʼe la Biblia. Hetápe ojehechauka rire Ñandejára réra la Bíbliape, ohechakuaa testigos de Jehová omboʼeha Ñandejára Ñeʼẽ heʼihaichaite. Ótrope katu oikuaa rire mbaʼépa oiko umi omanovaʼekuégui (Sal. 83:18; Ecl. 9:5, 10). Ha  ambuépe ohechávo mbaʼeichaitépa ojoayhu umi Jehovápe oservíva (Juan 13:34, 35). Térã ohechakuaávo ndajajeheʼaiha ko múndore, ndajaikéi polítikape ha ndajahái gerrahápe (Isa. 2:4; Juan 6:15; 17:14-16).

⁶ Koʼãva ha hetave mbaʼe omomýi ñane ermanokuérape ohayhu hag̃ua Jehovápe. Upévare eñehaʼãkena akóinte nemanduʼa mbaʼérepa regueroviarakaʼe umi mbaʼe reaprendéva Ñandejára Ñeʼẽgui. Ñande ningo ndahaʼéi peteĩchapa. Upévare nemanduʼavaʼerã mbaʼépa nemomyivaʼekue rehayhu hag̃ua Jehovápe ha rejerovia hag̃ua hese. Upéva nepytyvõta rehayhu jey hag̃ua chupe yma guaréicha (jaleemína Salmo 119: 151, 152; 143:5).

Jahayhuvékena Jehovápe koʼẽ koʼẽre

7. Mbaʼérepa ñamombaretevaʼerã ñande jerovia, ha mbaʼépa ñanepytyvõ jahayhuve hag̃ua Jehovápe?

⁷ Ñañemeʼẽha ára guive Jehovápe oiméne heta mbaʼéma okambia. Upévare ñambohovái hag̃ua opaichagua provléma ñamombaretevaʼerã ñande jerovia, ha jahecháta mbaʼéichapa Jehová akóinte ñanepytyvõ (1 Cor. 10:13). Péicha, umi mbaʼe jahasáva ñanepytyvõ jahayhuve hag̃ua Jehovápe, ha jaikuaa porã hag̃ua hembipota (Jos. 23:14; Sal. 34:8).

8. Mbaʼépa Jehová heʼi Moiséspe, ha mbaʼéichapa umi Israelgua oikuaa porãve Jehovápe?

⁸ Ñanemanduʼamína Jehová heʼírõ guare Moiséspe mbaʼépa ojapóta oguenohẽ hag̃ua umi Israelguápe Egíptogui. Haʼe heʼi: ‘Chehegui oikóta upe oñekotevẽva’ (Éxo. 3:7, 8, 13, 14). Jehová ningo heʼisevaʼekue ojapotaha opa mbaʼe oñekotevẽva oguenohẽ hag̃ua ipuévlope jejopy vaígui. Upe rire, umi Israelgua oikuaa porãve Jehovápe umi mbaʼe ojapovaʼekuére hesehapekuéra. Ohechakuaa Jehová haʼeha pe Ipuʼakapáva, ha oisãmbyhy, omoakã, omosãso, oñorairõ ha omeʼẽ chupekuéra hemikotevẽ. Upéicha oiko chugui opa mbaʼe oñekotevẽva (Éxo. 12:12; 13:21; 14:24-31; 16:4; Neh. 9:9-15).

9, 10. Mbaʼéicha javépa jahechakuaa Jehová ojepyʼapyha ñanderehe? Ha mbaʼérepa iporã jajepyʼamongeta koʼã mbaʼére?

⁹ Oiméramo jepe nderehasái umi Israelgua ohasavaʼekue, katuete rehechakuaáne Ñandejára ojepyʼapyha nderehe. Ikatu oime rehasa asy jave Jehová nembopyʼaguapy, omeʼẽ ndéve ne remikotevẽ térã nerekomboʼe. Koʼã mbaʼe rehasáva omombarete nde jerovia. (jaleemína Isaías 30:20b, 21). Ikatu avei rehechakuaa mbaʼéichapa Jehová ombohovái ne ñemboʼe. Térã rehasa asýramo guare peteĩ ermáno nepytyvõ, ýrõ restudia jave neaño retopa peteĩ téysto nemokyreʼỹva.

¹⁰ Remombeʼúramo umi mbaʼe rehasavaʼekue, ikatu oĩ nomombaʼéiva. Ha jaʼe porãséramo g̃uarã ndahaʼéi voi peteĩ milágro. Péro  ndéve g̃uarã ningo tuichaiterei mbaʼe, nemomanduʼágui Jehová nepytyvõ hague reikotevẽve jave. Epensamína mboy áñomapa reservi hague Jehovápe. Nemanduʼápa mbaʼéichapa Jehová oñangareko nderehe rehasárõ guare peteĩ mbaʼe ijetuʼúva? Upéicharõ, ejepyʼamongetákena umi mbaʼére reñemoag̃uive hag̃ua Jehováre. Upéicha rehayhu jeýta chupe yma guaréicha. Ha nemanduʼákena Jehová ojepyʼapyha nderehe. Péicha rejeroviáramo avave nanemboykemoʼãi Jehová rapégui.

Jajepyʼamongetákena

11, 12. Mbaʼépa ikatu ñanemomombyry Jehovágui? Ha mbaʼépa Jesús heʼivaʼekue hemimboʼekuérape?

¹¹ Oiméramo nderehayhuvéi Jehovápe yma guaréicha ndahaʼemoʼãi haʼe okambia rupi. Jehová ningo arakaʼeve nokambiái (Mal. 3:6; Sant. 1:17). Haʼe ojepyʼapy gueteri nderehe yma guaréicha. Upéicharõ, mbaʼépa nemomombyry Jehovágui? Ikatu oĩ heta mbaʼe ndepyʼapýva ha upévare ndaikatuvéi reñemboʼe, restudia térã rejepyʼamongeta yma guaréicha. Ikatu nanekyreʼỹvéi repredika hag̃ua térã nderehomeméi rreunionhápe (2 Cor. 13:5).

¹² Oiméramo rehasareína koʼã mbaʼére, reñeporandúmapa mbaʼérepa? Ikatu ningo rejepyʼapyeterei nderasy haguére térã ijetuʼu rupi ndéve remantene hag̃ua ne famíliape. Upéva ikatu nemokangy ha nderehechakuaavéi jaikomaha ára pahápe. Jesús ningo heʼi hemimboʼekuérape: ‘Peñeñangarekóke ani peʼa mbaʼeveichagua mbaʼe vaípe, jekaʼu térã pejepyʼapyeterei pene rembiʼurãre, ani hag̃ua pehaʼarõʼỹre upe ára hoʼa pende ári peteĩ ñuhãicha. Upe ára katuete og̃uahẽvaʼerã. Peñembosakoʼíke ha peñemboʼe opa ára, ikatu hag̃uáicha pejesalva koʼã mbaʼe oikótavagui’ (Luc. 21:34-36).

13. Mbaʼe rehépa ombojoja Santiago Ñandejára Ñeʼẽ?

¹³ Santiago ohaivaʼekue péicha iñermanokuérape ojepyʼamongeta hag̃ua Ñandejára Ñeʼẽre: ‘Pejapo katu Ñandejára Ñeʼẽ heʼíva, anítei pehendúnte, ani hag̃ua peẽ voi peñembotavy pendejupe. Upe ohendúnteva Ñandejára Ñeʼẽ ha ndojapói, haʼete ku omañáva ijehe peteĩ espéhope, ha oho rire pyaʼe hesarái mbaʼéichapa haʼe. Upe ojesarekóva Ñandejára léire ha oñehaʼãmbaitéva ojapo upépe heʼiháicha, ndahaʼéi ohendúnteva ha upe rire hesarái jey. Upéicha ojapóva katuete ovyʼáta hembiapo porã rupi’ (Sant. 1:22-25, ÑÑB).

14, 15. a) Maʼerãpa ñanepytyvõ Ñandejára Ñeʼẽ? b) Mbaʼépa ñañeporanduvaʼerã?

¹⁴ Ñande ningo jaiporu peteĩ espého ñamaña hag̃ua ñandejehe, ha péicha jahecha ñaime porãpa. Pór ehémplo, peteĩ kuimbaʼe ikatu omaña espéhope omoĩ porã hag̃ua ikorváta. Térã peteĩ kuña omoĩ porã hag̃ua iñakãrangue. Upéicha avei Ñandejára Ñeʼẽ ñanepytyvõ jahechakuaa hag̃ua mbaʼépepa ñakambiavaʼerã. Ñambojojávo umi mbaʼe jajapóva la Biblia heʼívare, jaiporuñaína Ñandejára Ñeʼẽ peteĩ espéhoicha. Péro ñamañánteramo espéhope ha nañakambiái upe oĩ vaíva, ndaikatúi jaʼe ideprovechoha ñandéve  upe espého. Upévare jajapovaʼerã Ñandejára Ñeʼẽ heʼíva, upéicharõmante ñanepytyvõta. Oiméramo jahechakuaa ndajahayhuveimaha Jehovápe yma guaréicha, ñañeporanduvaʼerã: “Mbaʼe provlémapa ahasaʼaína, ha mbaʼépa ajapo agueropuʼaka hag̃ua? Mbaʼéichapa ambohovaivaʼekue yma? Mbaʼérepa ijetuʼuve koʼág̃a agueropuʼaka hag̃ua?” Rehechakuaáramo nekangyha peteĩ mbaʼépe, pyaʼe rekambiavaʼerã (Heb. 12:12, 13).

¹⁵ Péicha jajepyʼamongetárõ ñanepytyvõta ñambaʼapove hag̃ua Jehová servísiope. Apóstol Pablo ohaivaʼekue Timotéope: “Ejepyʼamongetákena koʼã mbaʼe rehe ha ejapo upéicha opavave ohecha hag̃ua oho porãha ndéve”. Ñande jajepyʼamongetavaʼerã avei jahecha hag̃ua mbaʼépepa ikatu ñakambia (1 Tim. 4:15, BNP)

16. Mbaʼépa ikatu jahechakuaa jajepyʼamongeta jave?

¹⁶ Rejepyʼamongetáramo ndepyʼaite guive katuete rehechakuaáta tekotevẽha rekambia, péro ani reheja upéva nemokangýtei. Nemanduʼavaʼerã upéva rejapoha rehechakuaa hag̃ua mbaʼépepa tekotevẽ rekambia. Ha nemanduʼákena avei Satanás oipotaha ñapensa ndajavaleiha mbaʼeverã. Yma ningo oĩvaʼekue heʼíva Ñandejára ndoikuaaseiha ñandehegui mbaʼeve (Job 15:15, 16; 22:3). Péro upéva ningo japu, Jesús heʼi porã vaʼekue Ñandejára omombaʼe ha ohayhuetereiha isiervokuérape. (jaleemína Mateo 10:29-31). Rehechakuaáramo tekotevẽha rekambia reñehaʼãvaʼerã rejapo, ha Jehová nepytyvõta upearã. (2 Cor. 12:7-10). Oiméramo nanemitãvéima térã nderasy, eñehaʼãkena reservi Jehovápe ikatumiháicha. Péro aníkena nekangýtei, ehayhu guei Jehovápe ‘ehayhu haguéicha chupe iñepyrũme’.

Hetaiterei mbaʼe ningo oĩ jaagradese hag̃ua Jehovápe

17, 18. Mbaʼe mbaʼépa ohupyty umi oñehaʼãva ohayhuve Jehovápe koʼẽ koʼẽre?

¹⁷ Reñehaʼãramo rehayhuve Jehovápe koʼẽ koʼẽre, rehupytýta hetaiterei mbaʼe porã. Reikuaa porãvéta chupe ha remombaʼéta ne sãmbyhy porã haguére (jaleemína Proverbios 2:1-9; 3:5, 6). Pe lívro hérava Salmo ohechauka ohupytytaha heta mbaʼe porã umi ojapóva Jehová heʼíva. Avei ikatuha jajerovia Ñandejára Ñeʼẽre ha ‘omoaranduha oikuaaʼỹvape’. Heʼi avei péicha: ‘Ovyʼaite ningo umi oguatáva Ñandejára rapére ha umi oikóva iñeʼẽ heʼihaichaite’ (Sal. 19:7, 11; 119:1, ÑÑB).

¹⁸ Hetaiterei mbaʼe ningo oĩ jaagradese hag̃ua Jehovápe. Pór ehémplo jaikuaa porã mbaʼérepa oĩ hetaite provléma ko múndope. Avei Jehová ñandeporavo jaservi hag̃ua chupe ha oiko hag̃ua ñandehegui itestígo. Ha oñangareko ñanderehe iñorganisasión rupive. Upévare, epensamíntena umi mbaʼe porã rehupytývare. Hetaitereígui ningo ndaikatumoʼãi reipapa. Ejapókena pyʼỹi upéicha ‘emombaʼe hag̃ua nde jerovia’ (Rev. 3:11).

19. Mbaʼépa tekotevẽ jajapo ñañemoag̃uive hag̃ua Jehováre?

¹⁹ Jajepyʼamongetáramo jahechakuaáta mbaʼe mbaʼépa jajapóma ñañemoag̃uive hag̃ua Jehováre, ha upéva ñanepytyvõta ‘ñamombaʼeve hag̃ua ñande jerovia’. Péro oĩve ningo jajapovaʼerã. Ko rrevísta ohechauka jepi oĩha heta mbaʼe tekotevẽva jajapo ñañemoag̃uive hag̃ua Jehováre. Pór ehémplo, ñañemboʼe, japredika kyreʼỹ, jaha meme rreunionhápe ha ñakomenta. Rejapopáramo koʼã mbaʼe rehayhuvéta Jehovápe koʼẽ koʼẽre (Efe. 5:10; 1 Ped. 3:15; Jud. 20, 21).

Mbaʼépa ñambohováita?

• Mbaʼépa ñanepytyvõta jahayhu jey hag̃ua Jehovápe yma guaréicha?

• Mbaʼérepa iporã jajepyʼamongeta umi mbaʼe jahasavaʼekuére?

• Mbaʼépa ikatu jahechakuaa jajepyʼamongeta jave?

[Porandu ñahesaʼỹijóva]

[Nóta oĩva taʼanga ndive páhina 24]

Mbaʼérepa regueroviarakaʼe umi mbaʼe reaprendéva Ñandejára Ñeʼẽgui?

[Nóta oĩva taʼanga ndive páhina 25]

Mbaʼépepa tekotevẽ rekambia?