Umi estrélla ohechauka Ñandejára puʼaka

‘Pejesaupi ha pemaʼẽ: máva piko umi mbaʼe Apohare? Pe heʼíva peteĩteĩme hembiaporã ha héra rupi ohenói. Haʼe ipoderóso ha ipuʼaka mbarete.’ (ISAÍAS 40:26)

PE Kuarahy ningo peteĩ estrélla ha ndahaʼéi tuichaitereíva, péro tuichave 330.000 vése ko Yvýgui. Heta estrélla ikatu jahecha michĩve jeýva pe Kuarahýgui. Péro oĩ avei tuichaitevéva. Pe estrélla V382 Cygni, 27 vése tuichave Kuarahýgui.

Mbaʼeichaitépa ojope pe Kuarahy? Ekalkulamína oĩha peteĩ tata 15 kilometroha guive ikatúva ñandejope. Pe Kuarahy ningo 150 millones de kilometrohápe oĩ ñandehegui. Ha peteĩ ára hakúpe ikatu jakaipaite ha ñandeapiruʼapa! Pe Kuarahy akukue ningo og̃uahẽ ko Yvy ape ári  peteĩ milmillonésima párte rupínte, michĩmi ningo upéva, péro omeʼẽtereíma ojeiko hag̃ua ko Yvy ape ári.

Umi sientífiko heʼi peteĩ Kuarahy akukue ikatuha oipytyvõ treinta y un billones de planétape ojeiko hag̃ua ipype, ojeikoháicha ko Yvy ape ári. Internétpe jahekávo, pe Space Weather Prediction Center (Centro de Predicción del Clima Espacial) heʼi péicha: un segundo aja oñembyatýramo pe Kuarahy mbaretekue, ikatúta “ojeporu elektrisidáramo 9 millones de áño pukukue aja Estados Unídospe”.

Pe Kuarahy mbytetépe oĩ oñondivepa hetaiterei átomo (michĩmíva peteĩ púntoicha), ha umíva ojávo ojuehe, tatáicha hendy ha ojope. Ha tuichaiterei rupi pe Kuarahy, hetaiterei áño rire osẽ hakukue pe mbytégui ojope hag̃ua. Pe Space Weather Prediction Center (Centro de Predicción del Clima Espacial) heʼi avei: “Pe Kuarahy mbytetépe umi átomo nombaʼapovéiramo, cincuenta millones de áño rire ae ñande ñañandukuaáta”.

Epensamína ko mbaʼére: remañávo pyhare yvágare, rehecháta umi estrellaita oĩva ha ojoguáva Kuarahýpe. Umi estrélla imbareteterei avei. Umi sientífiko heʼi ko univérsope oĩha hetaiterei estrélla, miles ha miles de millones heʼi oĩha!

Moõgui piko osẽmba umíva? Koʼág̃a rupi umi ostudiáva koʼã mbaʼére heʼi ko univérso oaparese reínte hague, ojapóma catorce mil millones de áño rupi. Péro ndaikatúi omyesakã hikuái mbaʼéichapa oiko upéva. La Biblia katu omyesakã porã voi: ‘Iñepyrũme Ñandejára ojapo yvága ha Yvy’ (Génesis 1:1). Ajépa hoʼa umi estrélla Apohare rehe jaʼe ipoderosoitereiha (Isaías 40:26).

Mbaʼéichapa Ñandejára oiporu ipodér?

Ñandejára oiporu ipodér omombarete hag̃ua umi ojapóvape hembipota. Pór ehémplo, apóstol Pablo ojapo opa mbaʼe omombeʼu hag̃ua hapichakuérape Ñandejáragui ha umi mbaʼe haʼe ojapótava. Pablo ningo ñandeichaguánte avei, péro hetaiterei mbaʼe niko ojapovaʼekue oĩramo jepe oñemoĩ mbaretéva hese. Mbaʼéichapa ojaporakaʼe upéva? Haʼe voi heʼivaʼekue ‘ipuʼaka omeʼẽha chupe Ñandejára’ (2 Corintios 4:​7-9).

Ñandejára Jehová oiporu avei ipodér ohundi hag̃ua umi ndojaposéivape Haʼe heʼíva. Jesucristo ohechaukavaʼekue Ñandejára oiporuha ipodér oporohundi hag̃ua. Upearã imanduʼa Sodoma ha Gomorra oñehundírõ guarére ha avei pe Ama guasu Noé tiémpope oikovaʼekuére. Heʼivaʼekue avei koʼẽrõite Ñandejára oiporu jeytaha ipodér ohundi hag̃ua umi ndojaposéivape Haʼe heʼíva (Mateo 24:​3, 37-39; Lucas 17:​26-30).

Mbaʼépepa ñanepytyvõ jaikuaávo koʼã mbaʼe Ñandejáragui?

Rréi David ohechakuaa Ñandejára ipoderosoha ojepyʼamongetávo umi estrélla rehe. Upévare heʼi: ‘Amañáramo yvágare umi ne rembiapokue rehe, jasy ha estrellakuérare hendápe remoĩvaʼekue, haʼe chejupe: “Máva piko yvypóra, nemanduʼa hag̃ua hese?”’ (Salmo 8:​4, 5; 8:​3, 4, NM).

Tuichaiterei ningo pe univérso ha ñambojojáramo yvyporakuéra rehe, ñande ndahaʼéi mbaʼeve. Upéva ñanepytyvõ pono ñañemombaʼeguasu. Péro upéicharamo jepe ndajakyhyjeivaʼerã Ñandejáragui Ipoderosohaguére. Proféta Isaías ohaivaʼekue: ‘Ñandejára omokyreʼỹ ikaneʼõvape, ikangývape omombarete. Mitãrusu jepe ijukuʼa ha ikaneʼõne, kariaʼy oñepysanga ha hoʼáne, ojeroviáva Ñandejárare katu ikyreʼỹ jeýne ha ágilaicha ovevéne. Ijukuʼaʼỹre oñaníne ha oguatáne ikaneʼõʼỹre’ (Isaías 40:​29-31).

Nde rejaposéramo Ñandejára rembipota, reikuaavaʼerã Haʼe nemombaretetaha ijespíritu sánto rupive. Upearã rejerurevaʼerã chupe (Lucas 11:13). Ñandejára nepytyvõramo, rembohovaikuaa oimeraẽ mbaʼe ikatúva rehasareína. Ha nemombaretéta rejapo hag̃ua iporãva (Filipenses 4:13).

[Komentário oĩva páhina 6-pe]

Ñandejára nepytyvõramo ndepuʼakáta rejapo hag̃ua iporãva