Ñandejára arandu ojekuaa umi mbaʼe ko yvy ape ári oĩvare

‘Haʼe ñanemoaranduve mymba ha guyrakuéragui.’ (JOB 35:11)

UMI guyrakuéra ningo ivaleterei. Isaraki ha oveve rei hikuái yvágare. Ha umi avión ojapóva omombaʼeterei umi guyrakuérape. Oĩ guyra ovevéva hetaiterei kilómetro, avave ohechaukaʼỹre chupekuéra haperã.

Haʼekuéra ikatu avei oñekomunika oñondive ipurahéi rupive. Ko mbaʼe ohechauka avei ñandéve Ijapohare iñaranduha. Jahechamína umi ehémplo oñemoĩva koʼápe.

Mbaʼéichapa oñekomunika umi guyrakuéra

Oĩ guyra ikatúva oñekomunika oja mboyve voi. Pe codorniz ningo ojapo upéicha. Ko guyra ningo ocho rupi omboʼa, peteĩ káda día. Ikatu ñapensa ndojamoʼãiha hikuái peteĩcha. Péro ojáramo peteĩmimi káda día hasýta isýpe oñangareko hag̃ua umi guyraʼi ojaramóvare ha oñenovaʼerã gueteri avei umi ojaʼỹva ári. Péro ndoikói upéicha, seis órape ojapaitéma hikuái. Mbaʼéicha piko upéva? Umi ostudiáva ko mbaʼére heʼi ikatuha oiko upéva, oñekomunika rupi oñondive oja mboyve voi hikuái. Ha péicha ojoavisa ojapa hag̃ua peteĩchapalénto.

Hetaichagua guyra ningo oĩ, ha káda uno oreko ipurahéi. Umi guyra máchova hína umi opurahéiva jepi oheka hag̃ua ipareharã peteĩ ijoguaháva.

Koʼẽju térã kaʼaru pytũ opuraheive umi guyra. Ojapo hikuái upéicha ndaiporiguasúi rupi yvytu térã tyapu umi órape. Umi sientífiko heʼi 20 vése oñehendu porãveha ipuraheikuéra koʼẽju jave térã kaʼaru pytũ.

Umi guyrakuéra ningo oikuaa mbaʼéichapa ojoavisáta oĩ jave pelígro. Umi pinzón pór ehémplo oiporukuaa 9 sonído oñekomunika hag̃ua oñondive. Oiporu hikuái peteĩ sonído oavisa hag̃ua oĩ jave pelígro yvatéguio, oĩ mbaʼéramo ótro guyra hoʼuséva chupekuéra. Ha ótro sonído oiporu hikuái pe pelígro oĩ jave yvýguio.

Ñande hetave mbaʼe ikatu jajapo

Nanemopirĩripa ndéve mbaʼéichapa umi guyráre ikatu jahecha Ñandejára iñaranduetereiha? Péro umi guyra ojapóva ndahaʼeiete mbaʼeve ñambojojáramo yvypóra rehe. Heʼiháicha Job 35:​11, Ñandejára ‘ñanemoaranduve mymba ha guyrakuéragui’. Ñande yvypórante ikatu ñamombeʼu umi mbaʼe ñapensáva ñane ñeʼẽ térã séña rupive.

Umi mitãnguéra haʼete ojejapovaʼekue oaprende hag̃uáicha heta idióma michĩmi guive. Pe rrevísta American Scientist heʼi: “Umi mitãnguéra ikatu oaprende peteĩ idióma, ituvakuéra noñeʼẽiramo jepe hendivekuéra. Umi mitã ohenduʼỹva katu noñemboʼéiramo chupekuéra hógape, haʼekuéra voi ikatu ojapo iñidiomarã”.

Ajépa ndaijojahái mbaʼéichapa Ñandejára ñandeapovaʼekue. Ñande ningo ikatu ñañemongeta ha ñamombeʼu umi mbaʼe ñañandúva. Péro tuichaitereive mbaʼe ñañemboʼe Ñandejárape. Haʼe voi ñaneinvita ñañemongeta hag̃ua hendive. Filipenses 4:6 heʼi: ‘Ani pejepyʼapy mbaʼevére. Pemoĩ uvei opa mbaʼe Ñandejára  pópe peñemboʼévo. Pejerure ha peagradese avei chupe’.

Jadesidíta jave peteĩ mbaʼe hasýva ñandéve g̃uarã, Jehová oipota jaiporu Iñeʼẽ. Haʼe ningo iñarandueterei. Ha Haʼe voi ikatu ñanepytyvõ jajapo hag̃ua heʼíva upépe. Santiago 1:5 heʼi: ‘Oĩrõ pende apytépe naiñarandúiva, tojerure Ñandejárape ha Haʼe omeʼẽta chupe. Ñandejára niko heta porã omeʼẽ opavavépe ha ndojeruréi mbaʼeve hese’.

Mbaʼépepa ñanepytyvõ jaikuaávo koʼã mbaʼe Ñandejáragui?

Mbaʼépa reñandu rehendúvo peteĩ guyraʼi opurahéi, térã rehendúvo peteĩ mitãmi oñeʼẽramóvape? Rehechakuaápa Ñandejára arandu umi mbaʼére?

Rréi David ojepyʼamongetávo mbaʼeichaitépa ojejapo yvypórape heʼi: “Chemopirĩmba ha chembojurujái upe cherehe rejapóva. Upévare romombaʼeguasu. Ajépa tuichaite upe nerembiapokue” (Salmo 139:14). Ñahesaʼỹijóramo ha ñamombaʼéramo Ñandejára arandu ojekuaáva hembiapokuére, jajeroviavéta hese ñanepytyvõtaha jaiko porãve hag̃ua.

[Komentário oĩva páhina 4-pe]

Ñande ningo ikatu ñañemongeta. Upéva peteĩ rregálo neporambajepéva omeʼẽva Ñandejára