Peteĩ mbaʼe ojejeruréva oparupiete

EPENSAMÍNTENA rehenduha hetaitereípe ojeruréramo peteĩ mbaʼe pe mburuvicha guasu ijojahaʼỹvape. Oipota hikuái peteĩ mbaʼe, péro nañaimoʼãiramo jepe, saʼi umíva apytépe oikuaa mbaʼépa ojerurehína. Ikatúnepa oiko upéva? Káda diagua ningo upéva. Ha mbaʼe piko ojerure hikuái? Ojerure Ñandejárape omoĩma hag̃ua igoviérno.

Ojeʼe oĩha treinta y siete mil rrelihión rupi heʼíva ojapoha Jesucristo omboʼevaʼekue. Ha dos mil millones rasa oñeĩ umi rrelihiónpe. Umíva apytépe ningo hetaiterei oĩ oñemboʼéva pe padrenuéstro. Oimevaʼerã nde avei reikuaa upe ñemboʼe. Jesús ningo omboʼevaʼekue upéva hemimboʼekuérape, ha oñepyrũ kóicha: “Ore Ru reiméva yvágape, toñemomarangatu nde réra. Tou ne rréino, tojejapo ne rembipota yvy ári yvagapeguáicha” (Mateo 6:​9, 10, BNP).

Ymaite guive heta rrelihionpegua orrepeti ipyʼaite guive ko ñemboʼe. Ha ndahaʼéi voi tupãópente oñemboʼéva hikuái, hógape ha haʼeñohápe avei. Haʼekuéra niko orrepeti upe ñemboʼe ipyʼaite guive ovyʼa ha ohasa asy jave. Oĩ katu oñemboʼéva iñakãguinte opensaʼỹre mbaʼépa ojerurehína. Péro ndahaʼéiningo umi rrelihiónpe oĩvante ohaʼarõ ha ojeruréva ou hag̃ua Ñandejára Rréino.

Peteĩ mbaʼe ojeruréva tahaʼe haʼéva rrelihionpegua

Peteĩ ñemboʼe oiporúva jepi umi hudiokuéra omanovahápe héra qaddish. Saʼíramo jepe oñeñeʼẽ pype ñemanóre térã ñembyasýre, oñeñemboʼe jepi umi veloriohápe. Peteĩ hendápe heʼi kóicha: “[Ñandejára] tomoĩ irréino pene tiémpope [...] ha koʼẽrõitéma tojapo upéva”. * Ha oĩ avei peteĩ ñemboʼe ojeporúva jepi umi hudiokuéra ijatyhápe. Upe ñemboʼépe ojeʼe oñehaʼarõha peteĩ Rréino oisãmbyhytahápe pe Mesías onaséva David familiarégui.

Oĩ heta rrelihión ndojeroviáiva Jesucrístore, umívape oĩ avei umi tapicha oipotáva Ñandejára omoĩ Irréino. Peteĩ diário hérava The Times of India omombeʼu upe síglo diecinuévepe peteĩ rrelihión omoakãva Índiape oipotahague oñemopeteĩ pe hinduismo, islam, ha pe cristianismo. Ha heʼi kóicha: “Ñandejára omoĩta Irréino ág̃a umi kristiáno ha umi ndahaʼéiva og̃uahẽ vove peteĩ ñeʼẽme oñondivepa”. Ha peteĩ omoakãva universida islámica Stráthfieldpe (Australia) ramoite ohai kóicha: “Enterove musulmán ogueroviaháicha, che avei aguerovia Jesús ou jeytaha ha omoĩtaha Ñandejára Rréino añetetéva”.

Añetehápe, hetaiterei oĩ umi ojerure ha ohaʼarõva Ñandejára Rréino. Péro jahechakuaa avei peteĩ mbaʼe ñaimoʼãʼỹva.

Nde oimevaʼerã reikuaareína ore testigos de Jehová roguenohẽha ko rrevísta. Avei rog̃uahẽha jepi opa ogaha rupi roñeʼẽ hag̃ua la Biblia rehe. Ko tembiapo rojapo oparupiete 236 tetãme, ha ropredika  cuatrocientos ári idiómape. Ore ningo roñeʼẽroína Ñandejára Rréino rehe. Ehechamínte mbaʼéichapa héra ko rrevísta: Ñemañaha. Oikuaauka Jehová Sãmbyhy. Ha pyʼỹinte roporandu ore rapichakuérape oñemboʼe javépa ojerure jepi Ñandejára Rréinore, ha hetaiterei heʼi oréve ojerureha. Péro roporandúramo chupekuéra oikuaápa mbaʼépa hína upe Rréino, hetaiterei oĩ heʼíva ndoikuaaiha térã vai vaínte heʼi oréve mbaʼénepa upéva.

Mbaʼérepa hetaiterei oĩ ojeruréva Ñandejára Rréino ndoikuaáiramo jepe mbaʼépa heʼise? Oime piko hasyeterei mbaʼe ojekuaa hag̃ua, térã ndojekuaái voínte mbaʼépa upe Rréino? Nahániri, la Biblia omyesakã porã mbaʼépa upe Rréino. Ha ohechaukáta avei ndéve ikatuha rehaʼarõ heta mbaʼe porã koʼã tiémpo ijetuʼuetévape. Pe artíkulo oúvape jahecháta la Biblia heʼiha ñaneraʼarõha heta mbaʼe porã. Ha upe rire jahecháta arakaʼépa oñemoĩta pe Rréino Jesús ojerurevaʼekue.

[Nóta]