MAMA osẽ heʼi chéve: “¿Mbaʼéicha piko ndereadoraseimoʼãi ne antepasadokuérape? ¿Nderehechakuaái piko haʼekuéra rupivénte jaikoveha? ¡Ajépa nemalagradesidaite! ¿Mbaʼéichapa piko remboykétante ko kostúmbre ñane família osegíva ymaite guive? ¿Nde piko upéicharõ la ereséva hína vyroreiha la rojapóva ore?”. Mama heʼipa porã rire chéve koʼã mbaʼe, noñaguantavéi ha oñepyrũ hasẽ.

Unos kuánto mése mama heʼi mboyve chéve koʼã mbaʼe, ovisita kuri chupe umi testígo de Jehová. Upérõ oofrese chupe hikuái estúdio vívliko, péro haʼe ningo ndostudiaséi, ha iñamavlese rupi, heʼi umi Testígope ou hag̃ua chemboʼe chéve la Biblia. Che ningo siémpre ajapóva mama oipotáva, péro koʼág̃a ambovyʼaseve Jehovápe ha upévare ipochy chendive. Ijetuʼúramo jepe, Jehová chepytyvõpaite.

La majoría umi oikóva Japónpe ningo vudísta, ha che família oĩ avei ko rrelihiónpe. Péro astudia rire dos mése umi testígo de Jehovándi, aĩma segúra siertoha opa mbaʼe la Biblia omboʼéva. Aaprendérõ guare arekoha peteĩ Túva oĩva yvágape, aikuaa porãse chupe. Ñepyrũrã añemongeta kyreʼỹmi vaʼekue mamándi umi mbaʼe aaprendévare la Bíbliagui. Añepyrũ aha Salónpe domingokue, ha amáske aaprende ahávo la Bíbliagui, ahechakuaa naiporãiha apartisipa umi seremónia vudístape. Upévare añeʼẽ mamándi ha aexplika chupe ndaikatumoʼãveimaha ajapo koʼã mbaʼe. Péro upe guive mama okambiaite chendive. Haʼe heʼi chéve: “¡Mbaʼéicha piko nderehayhumoʼãi ñane antepasadokuérape. Nde ningo oremotĩ péicha!”. Mama omanda chéve anive hag̃ua astudia la Biblia ni aha rreunionhápe. Naimoʼãiete ningo heʼitaha chéve upéva. Añetehápe mama okambiaite chendive.

Papa oapoja mamápe. Ha che aaprende kuri Efesios kapítulo 6-pe heʼiha arrespeta vaʼerãha chupekuéra. Upévare apensa ajapo vaʼerãha haʼekuéra oipotáva ikatu hag̃uáicha aiko jey pyʼaguapýpe hendivekuéra. Upérõ ajapo vaʼerã kuri peteĩ exámen ikatu hag̃uáicha aike koléhiope, ha apensa iporãveha ameʼẽ gústo che tuvakuérape tres mésere. Péro apromete Jehovápe aha jeytaha rreunionhápe oñekumpli vove upe tiémpo.

Péro upéi ahechakuaa adesidi vai hague. Primero, apensa kuri ohasa rire umi tres mése, lomímonte chekyreʼỹtaha aservi hag̃ua Jehovápe. Péro ndaupeichaiete, pyaʼe voi aju  chekangy. Ha segundo katu, mama ha papa oñehaʼãvéntema chekonvense anivéma hag̃ua ajeheʼa Testigokuérare.

Salónpe aikuaa vaʼekue heta Testígope ohasáva avei che situasiónre. Haʼekuéra heʼi chéve Jehová chemombaretetaha (Mat. 10:34-37). Avei heʼi chéve hikuái asegíramo cheñeʼẽrendu Jehovápe, kon el tiémpo che família ikatuha avei oikuaase la Biblia omboʼéva. Upémarõ añemboʼe che pyʼaite guive, ikatu hag̃uáicha amás día ajeroviave Jehováre.

Che família ojapo ikatúva guive aheja hag̃ua Jehovápe. Por ehémplo, mama ojerure asy chéve anivemínte hag̃ua astudia la Biblia, ha oñehaʼã chekonvense. Che katu akirirĩnte, pórke añepyrũvo añeʼẽ ja rojodiskutíma, mokõivénte rodefendeségui ropensa lája. Koʼág̃a ahechakuaa rojogueraha porãvetaha kuri arrespetavérire umi mbaʼe ogueroviáva, ha oñandúva. Mama ha papa oñepyrũ chemohembiapove ógape ani hag̃ua aha moõve. Sapyʼánte chereja hikuái okápe, térã ndohejái chéve mbaʼeve haʼu vaʼerã.

Mama noñentregái voi. Ojerure che profesórpe chekonvense hag̃ua, péro mbaʼeve nokonsegíri. Upéi chegueraha itravahohápe ikatu hag̃uáicha ipatrón chekonvense entéro rrelihión ndovaleiha mbaʼeverã. Avei ohenói ore hentekuérape ha hasẽhápe ojerure chupekuéra ajúda. Upéva chembopochyeterei. Péro rreunionhápe umi ansiáno heʼi chéve, mama oñemeʼẽʼỹre enkuénta opredika hague oikóvo, ha heʼi chéve hikuái apensa hag̃ua upévare.

Che tuvakuéra oipota avei aha universidápe ikatu hag̃uáicha upéi ambaʼapo porã. Péro che ndajaposéi upéva, upéicha rupi ndaikatúi roñemongeta porã ko témare. Upémarõ  askrivi chupekuéra heta kárta aexplika hag̃ua mbaʼépa ajapose. Papa ipochy ha heʼi chéve: “Nde epensáramo lomímonte ikatuha etopa nde travahorã, koʼẽrõma ekonsegi vaʼerã, osino ehóta koʼágui”. Upémarõ añemboʼe Jehovápe ha ajerure chupe tachepytyvõmi. Al ótro día, aĩ aja predikasiónpe mokõi ermána oofrese chéve traváho. Oipota hikuái amboʼe imembykuérape. Péro papa noñeʼẽvéi chéve ha nopenavéi cherehe. Mama katu heʼi chéve iporãvetaha oikóramo chehegui peteĩ delinkuénte, oiko rangue chehegui testígo de Jehová.

Sapyʼánte añeporandu oimépa Jehová oipota añemoĩ che sy ha che túvare. Upévare añemboʼe Jehovápe ha ajepyʼamongeta umi téxto ohechaukávare haʼe ñanderayhuha. Koʼã mbaʼe chemokyreʼỹve, ha chepytyvõ antende hag̃ua che tuvakuéra ojepyʼapynteha cherehe. Avei, Jehová chepytyvõ akambia hag̃ua apensa lája ha aikuaa hag̃ua mbaʼépa ajapóta. Añepyrũ apredikave ha ahechakuaa avyʼaveha. Upéva chemokyreʼỹ ajapo hag̃ua che prekursorádo.

Unas kuánta ermána oñentera ajaposeha che prekursorádo, ha heʼi chéve hikuái iporãveha ahaʼarõmie oñekalmave peve pe situasión ógape. Añemboʼe Jehovápe ha ajerure chupe chemoarandu hag̃ua. Avei aheka heta informasión ñane puvlikasionkuérape, apensa porã mbaʼérepa ajapose che prekursorádo, ha añemongeta heta ermáno ha ermána iñexperiensiavévandi. Upéi adesidi ambovyʼaseveha Jehovápe, pórke ahaʼarõramo ndaikuaái voi che tuvakuéra okambiátapa.

Añepyrũ che prekursorádo atermina potaitépe che koléhio. Ohasa rire un tiémpo, aservise umi lugár oĩvehápe nesesida. Péro mama ha papa ndoipotái aha ógagui. Upévare ahaʼarõ amboty peve 20 áño, ha askrivi Betélpe aporandu hag̃ua ikatúpa aha aservi peteĩ siuda opytávape sur gotyo Japónpe. Upépe oiko unos kuánto che hentekuéra, ha mama ndojepreokupamoʼãi.

Avyʼa aĩ aja che asignasiónpe pórke ahecha mbaʼéichapa che estudiantekuéra oprogresa ha ojevautisa. Upéi añepyrũ astudia inglés ikatu hag̃uáicha chedeprovechove Jehová servísiope. Che kongregasiónpe oservi kuri mokõi prekursór espesiál. Ahechávo mbaʼéichapa ikyreʼỹ hikuái ha oipytyvõha umi ermánope, adesidi avei añehaʼãtaha ahupyty pe priviléhio. Upe tiémpope, mama ou hasyete dos vése, ha umi dos vése aha ógape añangareko hese. Añetehápe mama nohaʼarõiete kuri ajapotaha upéva, péro upe rire ou ivuenamie chendive.

Siete áño upe rire, Atsushi, peteĩva umi prekursór espesiál oĩ vaʼekue che kongregasiónpe, oskrivi chéve peteĩ kárta. Omombeʼu chéve omendaseha, ha oikuaase mbaʼépa apensa hese. Upéva chesorprende pórke che nañandúi hese mbaʼeve ni napensái voi haʼe omañáne hag̃ua cherehe. Un mes haguépe arresponde chupe ha haʼe aĩha dispuésta rojokuaavévo. Ahechakuaa rojojoguaha heta mbaʼépe Atsushi ndive. Mokõivévante roservise de tiémpo kompléto ha roĩ dispuésto roaseptávo oimehaichagua asignasión. Upéi romenda, ha avyʼaiterei mama, papa ha unos kuánto che hentekuéra oĩ haguére ore kasamientohápe.

Tiémpo riremínte, roservi aja de prekursór rregulár, Atsúshipe oñenombra superintendénte sustitúto. Upe rire katu roñeasigna kómo prekursór espesiál ha upei oñenombra chupe kómo superintendénte de sirkuíto. Rovisitapa rire primera ves umi kongregasión  oĩva upe sirkuítope, pe sukursál orerenói ha oporandu oréve roiméipa dispuésto rovávo Nepálpe, ikatu hag̃uáicha rosegi rovisita umi kongregasión upepegua.

Apensa mbaʼépa heʼíta mama ha papa oikuaa rire avataha mombyry. Upémarõ ahenói ógape ameʼẽ hag̃ua chupekuéra upe notísia. Papa la oñatendéva, ha heʼimi chéve: “Rehóta ningo peteĩ lugár iporãitereívape”. Una semána upe mboyve, peteĩ iñamígo omeʼẽ chupe peteĩ lívro oñeʼẽva Nepal rehe. Papápe ogusta upe país, ha opensa voi iporãtaha ohóramo algún día ovisita.

Umi persóna oikóva Nepálpe ningo iñamávle ha horyeterei, upévare rovyʼa upépe. Upe rire, oñeasigna avei oréve rovisita hag̃ua umi kongregasión oĩva Bangladéshpe. Ko país ag̃uíramo jepe Nepálgui, idiferenteterei. Upévare roipuru vaʼerã diferénte método ropredika hag̃ua. Cinco áño haguépe, roñeasigna jey Japónpe, ha koʼág̃a peve rovyʼaiterei roservívo koʼápe pe sirkuítope.

Heta mbaʼe aaprende Jehovágui aservi aja Japón, Nepal ha Bangladéshpe. Ahechakuaa káda país orekoha diferénte istória, kultúra ha kostúmbre. Ha káda persóna idiferénteramo jepe, ahecha mbaʼéichapa Jehová oñangareko, oguerohory, oipytyvõ ha ovendesi káda únope.

Jehová hetáma chevendesi. Por ehémplo chepytyvõ aikuaa hag̃ua chupe, chepuru apredika meme hag̃ua, omeʼẽ chéve che menarã peteĩ ermáno ivuenoitereíva ha chepytyvõ siémpre adesidi porã hag̃ua. Koʼág̃a aime porãiterei Ñandejárandi ha avei che famíliandi. Aagradese Jehovápe, mama ha che oñoamigaite jey haguére. Añetehápe, avyʼaiterei pórke aiko pyʼaguapýpe Ñandejárandi ha mamándi.