1. ¿Mbaʼépa oiko Jerusalénpe áño 66-pe? (Ehecha pe taʼanga oĩva iñepyrũme.)

ÁÑO 66-pe, peteĩ funsionário rrománo hérava Floro, omonda hetaiterei pláta pe témplo de Jerusaléngui. Umi hudío ipochyeterei, upévare ojuka heta soldádo rrománope ha opuʼã Roma kóntrape. Péro pe goviérno rrománo pyaʼe orreaksiona. Tres mése mboyve, pe governadór Cestio Galo ou 30.000 soldádo reheve ha omongora Jerusalén. Umi hudío opuʼã vaʼekue hesekuéra oike okañy pe témplo korapýpe, ha umi soldádo rrománo oñepyrũ ombokua pe témplo murálla. Umi hénte katu oñemondyipa. ¿Mbaʼépa nde rejapo vaʼerãmoʼã reimérire upépe?

2. a) ¿Mbaʼépa ojapo vaʼerã kuri umi kristiáno ohechávo Jerusalén oñemongoraha? b) ¿Mbaʼe oportunidápa oñepresenta ikatu hag̃uáicha umi kristiáno osẽ Jerusaléngui?

² Unos kuánto áño upe mboyve, Jesús heʼíma kuri idisipulokuérape mbaʼépa oikóta: “Ág̃a pehecha vove umi ehérsito omongora Jerusalén, peikuaáta oñehundipotaitemaha. Upévo umi  oĩva Judéape odipara vaʼerã okañy umi sérrore; umi oĩva Jerusalénpe osẽ vaʼerã upégui, ha umi oĩva okáre animoʼãke oike upépe” (Luc. 21:20, 21). Péro, ¿mbaʼéichapa osẽta hikuái oñemongoráramo pe siuda? Jesús heʼi kuri ‘umi ára oñemombykytaha’. Upéva heʼise pe atáke oparaʼimitaha (Mat. 24:22). Ha upeichaite ningo oiko. Avave oimoʼãʼỹre umi rrománo ohopa Jerusaléngui. Ha upéva omeʼẽ oportunida umi kristiánope ojapo hag̃ua Jesús heʼi vaʼekue ha ohopa hag̃ua umi sérrore. * Áño 70-pe, pe ehérsito rrománo ou jey Jerusalénpe, péro ko vuéltape ohundíma pe siuda. Entéro iñeʼẽrendu vaʼekue Jesúspe ojesalva.

3. a) ¿Mbaʼépa oikóta koʼẽrõite? b) ¿Mbaʼépa ñahesaʼỹijóta ko artíkulope?

³ Jesús oprofetisa kuri mbaʼépa oikóta Jerusalénpe, ha mbaʼépa ojapo vaʼerã umi kristiáno ojesalva hag̃ua. Upe profesía oñekumplíta avei ñane tiémpope. Koʼẽrõitéma jahasáta peteĩ situasión ijetuʼuetereíva oiko haguéicha síglo primérope. Peichaháguintema oñepyrũta pe “jehasa asy guasu” (Mat. 24:3, 21, 29). Síglo primérope umi kristiáno iñeʼẽrendúva ojesalva Jerusalén oñehundírõ guare. Ñane tiémpope avei “peteĩ aty guasu” ojesalváta Satanás múndo oñehundi vove (elee Apocalipsis 7:9, 13, 14). Jajesalvaséramo, tekotevẽterei ñantende porã la Biblia heʼíva umi mbaʼe oikótavare. Ko artíkulope jahecháta mbaʼe mbaʼépa oikóta koʼẽrõite ha mbaʼépa ñande jajapo vaʼerã.

4. ¿Mbaʼéichapa oñepyrũta hína pe jehasa asy guasu?

⁴ Pe jehasa asy guasúpe primeroite oñehundíta umi rrelihión fálsape. La Biblia ohenói umi rrelihión fálsape “Babilonia Guasu, [...] umi kuña rekovai sy” (Apoc. 17:5-7). ¿Mbaʼérepa oñekompara chupekuéra peteĩ prostitútare? Pórke umi omoakãva koʼã rrelihión oñentremete yvyporakuéra goviérnore ha otraisiona Ñandejárape. Haʼekuéra oapoja rangue Jesúspe ha Ñandejára goviérno, oapoja yvypóra goviérno. Avei omboykénte heta enseñánsa oĩva la Bíbliape ikatu hag̃uáicha orekove autorida. Péro pe adorasión haʼekuéra omeʼẽva ikyʼa, upévare Jehová ndoaseptái chupekuéra. Ndojoguaiete hikuái umi unhídope. Koʼãvape oñekompara voi vírhenre, pórke pe adorasión omeʼẽva ipotĩ Jehová renondépe (2 Cor. 11:2; Sant. 1:27; Apoc. 14:4). ¿Mávapa ohundíta umi rrelihión fálsape? La Biblia heʼi oĩha “peteĩ mymba ñarõ pytã” ‘diez hatĩva’. Ko mymba ñarõ orrepresenta pe Organización de las Naciones Unídaspe (ONU), ha umi diez hatĩ katu orrepresenta entéro umi goviérno oapojávape ko Organizaciónpe. Umi goviérno oapojáva pe ONU-pe ohundíta umi rrelihión fálsape (elee Apocalipsis 17:3, 16-18).

5, 6. ¿Mbaʼérepa jaʼekuaa Babilonia Guasu oñehundi vove nomanombamoʼãiha umi operteneséva pe rrelihión fálsape?

⁵ Umi rrelihión fálsa oñehundi vove, ¿omanombátapa entéro umi hénte oĩva koʼã rrelihiónpe? Nahániri. Zacarías oprofetisa vaʼekue ojeataka vove umi rrelihión fálsape, oĩtaha líder rrelihióso ohejáva irrelihión ha hiʼarive onegáva opertenese hague pe rrelihión fálsape. Pe profesía heʼi: “‘Che ndahaʼéi proféta. Che ningo peteĩ chokokuénte. Peteĩ kuimbaʼe chejogua vaʼekue ijesklavorã chemitãme.’ Ha oñeporandúta chupe: ‘¿Mbaʼéicha rupi piko ereko umi erída nde atiʼýre?’ Haʼe katu  heʼíta: ‘Che amigokuéra rógape ojejapo cherehe’” (Zac. 13:4-6, NM).

⁶ ¿Mbaʼépa oikóta Ñandejára puévlogui ojeataka vove umi rrelihión fálsape? Jesús heʼi vaʼekue: “Umi ára noñemombykýiramo, ni peteĩ yvypóra ndojesalvamoʼãi, péro umi ojeporavo vaʼekue rehehápe, umi ára oñemombykýta” (Mat. 24:22). Jahecha haguéicha, áño 66-pe Jehová ndohejái kuri umi rrománo oataka Jerusalén. Upéicha rupi “umi ojeporavo vaʼekue”, térã umi kristiáno unhído ikatu kuri osẽ upégui. Ñane tiémpope oikóta avei upéicha. Jehová ndohejamoʼãi umi goviérno ohundi ‘umi ojeporavo vaʼekuépe’. Haʼe ojokoʼimíta pe primer atáke oikótava pe jehasa asy guasúpe, oprotehe hag̃ua ipuévlope. Upe rire pe situasión oñekalmamiéta peteĩ tiempoʼimíre.

7, 8. a) ¿Mbaʼépa jajapo vaʼerã og̃uahẽvo pe tiémpo de kálma pe jehasa asy guasu aja? b) ¿Mbaʼérepa upe tiémpope Jehová puévlo idiferénteta?

⁷ ¿Mbaʼépa oikóta oñehundi rire entéro umi rrelihión fálsa? Upe tiémpope la majoría umi hénte ohóta ojeprotehe hag̃ua “umi sérro paʼũme ita guasu apytépe”. Upéva heʼise haʼekuéra ojeroviataha umi organisasión yvyporakuéra okrea vaʼekuére (Apoc. 6:15-17). Péro ñande jajeroviáta Jehováre, pórke haʼe ñandeprotehéta. Áño 66 rire, oĩ vaʼekue peteĩ tiémpo de kálma, péro pe tiémpo mbykymi ndahaʼéi kuri oiko hag̃ua kristiáno heta hudíogui, síno ikatu hag̃uáicha umi kristiáno iñeʼẽrendúva Jesúspe osẽ pe siudágui. Upéicha avei, pe gran trivulasiónpe oĩta peteĩ tiémpo de kálma, péro ndahaʼemoʼãi oiko hag̃ua kristiáno heta héntegui. Upe moméntope entéro jaservíva Jehovápe jahechauka vaʼerã jahayhuha chupe ha jaapojaha umi unhídope (Mat. 25:34-40).

⁸ ¿Mbaʼépa oikóta pe tiémpo de kálmape? Ndajaikuaaporãi gueteri. Péro ikatu hína heta mbaʼe ijetuʼuve ha tekotevẽta jajapo heta sakrifísio. Por ehémplo, Jerusalén oñehundi mboyve, umi kristiáno oheja kuri hóga ha ombohovái hetaiterei situasión ijetuʼúva ikatu hag̃uáicha ojesalva (Mar. 13:15-18). Upévare ñañeporandu vaʼerã: “¿Ambyasýtapa tekotevẽramo aheja umi kósa materiál térã ojepeʼáramo chehegui? ¿Aimépa dispuésto aaguantávo oimeraẽ mbaʼe cheñeʼẽrendu hag̃ua Jehovápe?”. Ñanemanduʼa vaʼerã upe tiémpope ñande añoite jaadoráta Jehovápe toiko la oikóva, ojapo haguéicha proféta Daniel (Dan. 6:10, 11).

9, 10. a) ¿Mbaʼeichagua mensáhepa japredikáta pe jehasa asy guasu aja? b) ¿Mbaʼépa ojapóta ñane enemigokuéra ohendúvo pe mensáhe de kondéna?

⁹ Pe gran trivulasión aja ndajapredikamoʼãvéima umi “marandu porã oñeʼẽva Ñandejára Rréinore”, pórke pe fin og̃uahẽtama (Mat. 24:14). Péro japredikáta pyʼaguasúpe peteĩ mensáhe de kondéna ndogustamoʼãiva umi héntepe. Posívlemente jaʼéta hína chupekuéra Satanás múndo oñehunditamaha. La Biblia heʼi umi persóna ipochytaha pe mensáhere, ha heʼitaha hikuái: “Hoʼa yvágagui amandáu guasu, káda uno orekóva veinte kílorupi; koʼãva hoʼa umi kuimbaʼe ári, ha umi kuimbaʼe otaky Ñandejárare pe amandáu káusare, pe amandáu oguerúgui tuicha ñehundi” (Apoc. 16:21).

¹⁰ ¿Mbaʼépa ojapóta ñane enemigokuéra ohendu vove pe mensáhe de kondéna? Proféta Ezequiel omombeʼu mbaʼépa opensáta Gog de Magog, haʼéva hína peteĩ  grúpo tuicháva oĩháme heta país: “Aatakáta pe puévlo noirĩvape protehído. Haʼekuéra ndojepyʼapýi ha oiko trankílo, péro aháta hiʼarikuéra. Ko puévlo naimurállai, ndorekói okẽ guasu ni tránka”. Ezequiel oprofetisa haguéicha, Gog oatakaséta ha osakeaséta Ñandejára siervokuérape. Opensáta voi haʼeha “peteĩ puévlo oñembyatýnteva umi tetãgui ha ombyatýva rrikésa ha propieda, ha oikóva pe párte iñimportantevévape ko yvy ape ári” (Ezeq. 38:10-12, NM). Ñandejára siervokuéra oĩta “pe párte iñimportantevévape ko yvy ape ári”. Upéva heʼise opavave oĩva ko yvy tuichakuére ohechakuaataha haʼekuéra idiferenteha. Péro Gog de Magógpe ndogustamoʼãiete upéva, ha oatakasetereítama umi unhídope ha entéro umi oapojávape chupekuéra.

11. a) ¿Mbaʼe órdenpepa oikóta umi señál pe gran trivulasiónpe? b) Ñandejára enemigokuéra ohecha vove umi señál yvágape, ¿mbaʼéichapa orreaksionáta?

¹¹ ¿Mbaʼépa oikóta upe rire? La Biblia heʼi oikotaha heta mbaʼe, péro ndeʼíri mbaʼe órdenpepa. Ikatu hína oĩ señál oñekumplíva al mísmo tiémpo. Jesús oñeʼẽrõ guare pe fínre, heʼi: “Ojehecháta avei [señál] pe kuarahýre, jasýre ha umi estrellakuérare. Ha yvy ape ári katu ipyʼatarovapáta umi tetãnguéra, ndoikuaáigui mbaʼépa ojapóta ohendúvo mbaʼeichaitépa hyapu pe mar pochy. Umi kuimbaʼe katu odesmajáta kyhyjégui ohaʼarõ rupi umi mbaʼe oúva hína ko yvy ape ári; ha opa mbaʼe oĩva yvágape oñembokachapaitéta. Upévo ohecháta hikuái Yvypóra Raʼýpe ouha umi arai ári, [tuicha autorida] ha podér reheve” (Luc. 21:25-27; elee Marcos 13:24-26). ¿Mbaʼépa hína umi señál ojehechátava? ¿Jahechátapa algúna kósa pe yvágare? Og̃uahẽ vove upe tiémpomante jaikuaáta. Péro tahaʼe haʼéva umi señál, Ñandejára enemigokuéra tuicha oñemondýita ha okyhyjetereíta ohechávo umíva.

12, 13. a) ¿Mbaʼépa Jesús ojapóta ou vove tuicha autorida ha podér reheve? b) ¿Mbaʼépa ojapóta Jehová siervokuéra upe moméntope?

¹² Jahecha haguéicha, Jesús oúta tuicha autorida ha podér reheve. Og̃uahẽvo upe tiémpo, orrekompensáta umi iñeʼẽrendúvape Jehovápe, péro okastigáta umi naiñeʼẽrendúivape (Mat. 24:46, 47, 50, 51; 25:19, 28-30). ¿Mbaʼéichapa ojapóta upéva? Jesús heʼi: “Pe Yvypóra Raʼy og̃uahẽ vove tuicha podér reheve entéro umi ánhel ndive, oguapýta itróno omimbipávape. Ha opa tetãnguéra oñembyatýta henondépe, ha haʼe omoĩta umi héntepe mokõi atýpe, pe ovecharerekua oipeʼaháicha ovecha, kavarágui. Omoĩta umi ovecha iderécha gotyo ha umi kavara ijiskiérda gotyo” (Mat. 25:31-33). Upéva heʼise Jesús ohusgataha entéro yvypórape. Umi “kavara” térã umi persóna naiñeʼẽrendúiva, “oñehundíta opa ára g̃uarã”. Péro umi “ovecha” térã umi iñeʼẽrendúva, “oikovéta opa ára g̃uarã” (Mat. 25:46).

¹³ La Biblia heʼi umi “kavara” ohechakuaávo oñehunditaha ‘ojepytiʼanupãtaha ñembyasýgui’ (Mat. 24:30) ¿Ha mbaʼépa ojapóta umi unhído ha ambue Ñandejára siervokuéra? Ojapóta Jesús heʼi vaʼekue: “Oñepyrũvo oiko koʼã mbaʼe, peñemboʼy ha peñakãrapuʼã, Ñandejára pendesalvapotaitéma rupi” (Luc. 21:28).

14, 15. a) ¿Mbaʼépa oikóta Gog de Magog oñepyrũ rire oataka Ñandejára puévlope? b) ¿Mbaʼérehepa oñeʼẽ la Biblia heʼi jave Jesús ‘ombyatytaha umi ojeporavo vaʼekuépe’?

¹⁴ ¿Mbaʼépa oikóta Gog de Magog oñepyrũ rire oataka Ñandejára puévlope?  La Biblia heʼi mbaʼépa Jesús ojapóta: “Omondóta hiʼanhelkuéra ombyaty hag̃ua umi ojeporavo vaʼekuépe opa hendáguio; nórte, sur, kuarahyreike ha kuarahyresẽguio, pe yvy púnta guive yvága púnta peve” (Mar. 13:27; Mat. 24:31). Upéva ndeʼiséi hína ojeporavotaha umi unhídope upe moméntope. Ni ndeʼiséi umi unhído oĩtava gueteri ko yvy ape ári orresivitaha pe último séllo upépe. Pe último séllo haʼekuéra orresivipátama oñepyrũ mboyvemi pe jehasa asy guasu (Mat. 13:37, 38; Apoc. 7:1-4). Upéicharõ, ¿mbaʼérehepa oñeʼẽ la Biblia heʼi jave Jesús ‘ombyatytaha umi ojeporavo vaʼekuépe’? Upéva heʼise Jesús orrekompensataha umi unhídope oĩva gueteri ko yvy ape ári oguerahávo chupekuéra yvágape (1 Tes. 4:15-17; Apoc. 14:1). Upéva oikóta algún moméntope Gog de Magog oñepyrũ rire oataka Ñandejára puévlope (Ezeq. 38:11). Upépe oñekumplíta Jesús heʼi vaʼekue: “Umi hekojojáva kuarahýicha omimbíta Itúva Rréinope (Mat. 13:43). *

¹⁵ ¿Ikatúpa jaʼe upéicharõ oikotaha peteĩ arrevatamiénto ha umi unhído ohotaha yvágape ikuérpo reheve? Heta persóna heʼíva ijehe kristianoha orovia ko enseñánsa fálsa. Opensa hikuái Jesús outaha ogoverna ko yvy ape ári ha oguerahataha yvágape umi kristiánope ikuerpokuéra reheve, ha enterove ohechataha koʼã mbaʼe oikóva. Péro la Biblia ndeʼíri ojehechataha Jesúspe ou vove, síno heʼi haʼe outaha “umi arai ári” ha ojekuaataha “yvágare pe Yvypóra Raʼy [señál]” (Mat. 24:30). Avei la Biblia heʼi porã “soʼo ha tuguy ndaikatuiha oike Ñandejára Rréinope”. Upéicharõ,  ¿mbaʼéichapa ojegueraháta yvágape umi unhído oĩtavape gueteri ko yvy ape ári? La Biblia heʼi primero ‘oñekambiataha hikuái’, térã oiko raẽ vaʼerãha chuguikuéra espíritu. Ha “upéva oikóta peteĩ tesapirĩme, ipu vove pe última trompéta” (elee 1 Corintios 15:50-53). * Ñande ndajaipurúi pe palávra arrevatamiénto jaexplika hag̃ua upe oikótava umi unhídore, pórke hetápe omopensa pe enseñánsa fálsare. Péro jaikuaa porã umi unhído oĩtava gueteri ko yvy ape ári pe gran trivulasiónpe, ojeguerahataha yvágape peteĩ tesapirĩme, péro oiko raẽ vaʼerãha chuguikuéra espíritu.

16, 17. ¿Mbaʼépa oikóta pe Ovecharaʼy kasamiénto mboyve?

¹⁶ Umi 144.000 unhído ohopa vove yvágape, ¿oikótamapa pe Ovecharaʼy kasamiénto? (Apoc. 19:9.) Nahániri. Oiko raẽ vaʼerã ótra kósa. Ñanemanduʼa vaʼerã Gog de Magog oataka vove Ñandejára puévlope, oĩtaha gueteri kristiáno unhído ko yvy ape ári (Ezeq. 38:16). ¿Mbaʼépa jajapóta oñepyrũ vove pe atáke? La Biblia heʼi: “Peẽ napeñorairõmoʼãi koʼág̃a. Pepyta pende lugárpe ha pehecha mbaʼéichapa Jehová pendesalva”. Upéi heʼi avei: “Ani pekyhyje ni peñemondýi” (2 Crón. 20:17, NM). Jahecháma haguéicha, algún moméntope Gog oataka rire Ñandejára puévlope, umi unhído oĩtava gueteri ko yvy ape ári, ojeguerahapáta yvágape. ¿Mbaʼépa oikóta upéi? Apocalipsis 17:14 heʼi Ñandejára enemigokuéra oñorairõtaha “pe Ovecharaʼy kóntrape, péro haʼe ipuʼakáta hesekuéra”, pórke pe Ovecharaʼy haʼe hína “mburuvichakuéra Ruvicha ha Rréi omandáva entéro rréire”. Jesucrístope omoirũta “umi oñehenóiva, ojeporavóva ha ojepytasóva Ñandejára ykére”, ha haʼekuéra ipuʼakáta iñenemigokuérare. Péicha jahecha Jesús ha umi 144.000 rréi omoirũva chupe, osalvataha Ñandejára puévlope oĩva ko yvy ape ári.

¹⁷ Pe Armagedón rupive oñembotuicháta Jehová réra porãite (Apoc. 16:16). Umi persóna oñekomparáva ‘kavaráre’ oñehundíta, ha ndaiporimoʼãvéima hénte aña ko yvy ape ári. Péro pe “aty guasu” ojesalváta. Ha heʼiháicha opakuévo lívro de Apocalipsis, upépe ae oikóta pe Ovecharaʼy kasamiénto (Apoc. 21:1-4). * Jehová ohechaukáta ohayhuha yvyporakuérape ha omeʼẽta heta mbaʼe porã umi ojesalvávape. ¡Ajépa jaipotaitéma og̃uahẽ upe tiémpo! (Elee 2 Pedro 3:13.)

18. ¿Mbaʼépa jajapo vaʼerã jaikuaámarõ umi mbaʼe oikótava koʼẽrõite?

¹⁸ Ñande ningo jaikuaáma mbaʼépa oikóta koʼẽrõite. Upévare, jasegíkena jajapo apóstol Pedro heʼi vaʼekue espíritu sánto rupive: “Peñatendéke mbaʼeichagua persónapa peẽ: penderekomarangatu ha pemombaʼeguasu vaʼerã Ñandejárape pende pyʼaite guive. Akóinteke penemanduʼa ha pehaʼarõ Jehová ára. [...] Upéicharõ che ermanokuéra pohayhuetéva, pehaʼarõ rupi koʼã mbaʼe, peñehaʼãmbaitékena penepotĩ Ñandejára renondépe, ani oĩ pende pype mbaʼeve ivaíva, ha peiko porã hendive” (2 Ped. 3:11, 12, 14). Upéicharõ, aníkena ñapermiti umi kreénsia fálsa omongyʼa ñane adorasión. Upéva rangue jasegi jaapoja ñande pyʼaite guive Jesucrístope, pe rréi oguerútava pyʼaguapy.