Heta tiémpore, ñane puvlikasionkuéra heʼi vaʼekue Gog de Magog haʼeha Satanás oñemosẽ rire yvágagui. ¿Mbaʼérepa ojeʼe raʼe upéva? Pórke lívro de Apocalípsispe heʼi Satanás oatakataha Jehová siervokuérape oĩva ko yvy tuichakuére (Apoc. 12:1-17). Upévare ñaimoʼã kuri Satanáspe oñehenoiha avei Gog.

Péro koʼág̃a ndojexplikavéima péicha. ¿Mbaʼérepa? Primero, pórke la Bíbliape heʼi jave Gog oñehunditaha, heʼi Jehová omeʼẽtaha hetekue umi ‘guyra ha mymba ñarõme’ hembiʼurã (Ezeq. 39:4). Avei Jehová heʼi: “Ameʼẽta Gógpe isepultúra rendag̃ua Israélpe. [...] Ha upépe oñeñotỹta Gógpe ha entéro umi omoirũvape chupe” (Ezeq. 39:11, NM). Péro Satanás ningo peteĩ espíritu, upévare umi animál ndaikatúi hoʼu hetekue, ni ndaikatúi oñeñotỹ chupe mamove. Hiʼarive la Biblia heʼi ojeitytaha chupe peteĩ yvykua pypukúpe, térã peteĩ lugár oĩtahápe préso 1.000 áñore. Upéva heʼise noñeñotỹmoʼãiha ni ndoʼumoʼãiha chupe mbaʼeveichagua animál (Apoc. 20:1, 2).

Segundo, opa rire umi 1.000 áño Satanás osẽ jeýta pe lugár oĩ haguégui préso. La Biblia heʼi hese: “Ha osẽta ombotavy hag̃ua umi tetãnguéra oĩvape umi cuatro eskína yvy ariguápe, Gog ha Magógpe, ha ombyatýta chupekuéra ñorairõrã” (Apoc. 20:8). Ko téxto heʼi Satanás ombotavytaha Gógpe. Ha oiméramo Satanás haʼe Gog, upéva heʼise oñembotavytaha ijupe voi. Péro upéva ningo naisentídoi. Upévare ikatu jaʼe Ezequiel ha Apocalípsispe oñeñeʼẽ jave “Gog” rehe, noñeʼẽiha hína Satanásre.

Upéicharõ, ¿mávapa hína Gog de Magog? Jaikuaa hag̃ua upéva, jastudia porã vaʼerã la Biblia ñantende hag̃ua mávapa oatakáta Ñandejára puévlope. La Biblia ohechauka Jehová puévlope oatakataha ‘Gog de Magog’, pe “rréi del nórte” ha “umi rréi yvy arigua” (Ezeq. 38:2, 10-13, NM; Dan. 11:40, 44, 45, NM; Apoc. 17:14; 19:19). Posívlemente koʼã atáke ndeʼiséi Jehová puévlope ojeatakataha tres vése. Upéva rangue, ojerreferi peteĩ atákerente, péro oñehenói de diferénte fórma. ¿Mbaʼérepa jaʼe upéva? Pórke la Biblia heʼi opa tetãnguéra ko yvy arigua oatakataha Jehová siervokuérape, ha upéva omoñepyrũtaha pe Armagedón (Apoc. 16:14, 16).

 Ñakomparáramo umi téxto heʼíva ojeatakataha Ñandejára puévlope, jahechakuaáta Gog de Magog ndahaʼeiha Satanás, síno peteĩ grúpo tuicháva oĩháme heta país. ¿Ikatúpa jaʼe pe “rréi del nórte” omoakãtaha pe atáke? Upéva ndajaikuaaporãi, péro ikatu hína, pórke Jehová voi heʼi Gógpe: “Rejúta ne retãgui opytáva mombyry nórte gotyo, [...] heta tapicha ha ehérsito imbaretéva reheve” (Ezeq. 38:6, 15, NM).

Proféta Daniel heʼi vaʼekue avei pe rréi del nórtere: “Oĩta notísia oúva kuarahyresẽgui ha nórtegui oipyʼapyetereítava chupe, ha pochýre osẽta ohundi ha ojuka hag̃ua hetápe. Ha omopuʼãta hóga guasu pe mar ha pe montáña Sánta paʼũme. Péro upépe oñehundíta, ha ndaiporimoʼãi avave oipytyvõva chupe” (Dan. 11:44, 45, NM). Koʼã mbaʼe Daniel heʼíva ojoguaiterei avei Ezequiel heʼívape Gog rehe (Ezeq. 38:8-12, 16).

¿Mbaʼépa oikóta ojeataka rire Jehová puévlope? Daniel heʼi: “Upe tiémpope oñemboʼýta Miguel, pe prínsipe iñimportantevéva, oĩva odefende hag̃uáicha nde puévlope”. Ha upéi heʼi avei: “Upérõ oikóta jehasa asy oikoʼỹ haguéicha arakaʼeve, oĩ ypy guive tetãnguéra”. Upéva oñekumplíta pe jehasa asy guasu aja. Upe rire Daniel heʼi avei: “Nde puévlo ojesalváta, entéro umi héra ojehaíva pe lívrope” (Dan. 12:1, NM). ¿Mbaʼépa ohechauka ko téxto? Jesucristo, pe Rréi ogovernámava 1914 guive, oñorairõtaha Armagedónpe ñanedefende hag̃ua. Daniel heʼíva ojoguaiterei avei Apocalipsis 19:11-21 heʼívape. Mokõive téxto omyesakã mbaʼépa Jesucristo ojapóta ojeataka rire Jehová puévlope.

Upéicharõ, ¿mávapa ‘Gog ha Magog’ oñemensionáva Apocalipsis 20:8-pe? Gog ha Magog orrepresenta umi persóna oñemoĩtavape Jehováre ha oatakátava isiervokuérape pe última pruévape, opa rire Jesucristo goviérno de 1.000 áño. Koʼã persóna ndaijaʼemoʼãi Ñandejára puévlore ‘Gog de Magog’ ndaijaʼéi haguéicha hesekuéra. Péro Ñandejára odestruíta Gog ha Magógpe, ohunditaháicha avei Gog de Magógpe Armagedónpe (Apoc. 19:20, 21; 20:9). Ndareíri la Biblia ohenói Gog ha Magog entéro umi persóna ojerrevelátavape umi 1.000 áño rire.

Opavave testígo de Jehová ostudia la Biblia ha oĩ aténto ikatu hag̃uáicha oidentifika mávapa pe “rréi del nórte” ág̃a oñepresenta vove koʼẽrõite. Péro tahaʼe haʼéva upe omoakãtava umi tetãme ñandeataka hag̃ua, ñande ñaĩ segúro Gog de Magog ha ijehersitokuéra oñehunditaha. Avei jaikuaa porã ñande rréi Jesucristo ñandesalvataha ha ñanemoingetaha peteĩ múndo pyahúpe oĩtahápe segurida ha pyʼaguapy (Apoc. 7:14-17).