Oĩ ndaikatúiva ohetũ perfúme ojapo vai rupi hesekuéra, ha upéva ijetuʼueterei. Haʼekuéra oñehaʼãvéramo jepe, ndaikatúi oevita upe provléma, pórke opárupi oĩ la oipurúva perfúme. Upéicha rupi, oĩ oporandúva ndaikatúipa ojejerure umi ermánope ani hag̃ua oipuru perfúme ohóta jave rreunión ha asambleahápe.

Jaikuaaháicha, peteĩ ermáno ndojapomoʼãi peteĩ mbaʼe oikuaa porãva ikatuha ojoko hapichápe oho hag̃ua rreunionhápe. Rreunionhápe ningo ñañomokyreʼỹ, ha enterove ñaikotevẽ upévare (Heb. 10:24, 25). Upéicharõ, oĩramo peteĩ ermáno térã ermána ndaikatúiva ohetũ perfúme ojapo vai rupi hese, ikatu oñeʼẽ ansianokuérandi. Haʼekuéra ndaikatumoʼãi oproivi avavégui oipuru perfúme, péro omeʼẽkuaa ermanokuérape informasión ikatu hag̃uáicha okomprende umi oguerekóvape ko provléma. Ohechakuaáramo tekotevẽha, ikatu avei ojejapo peteĩ diskúrso oñeʼẽva ko témare pe párte héravape “Kongregasión oikotevẽva”; upearã ojepuru vaʼerã umi artíkulo osẽ vaʼekue ñane puvlikasionkuérape oñeʼẽva upévare. * Térã ikatu ojejapo peteĩ anúnsio mbykymi ikatu hag̃uáicha enterovéva oikuaa oĩha kongregasiónpe ndaikatúiva ohetũ perfúme. Upéicharõ jepe, umi ansiáno ndoikói vaʼerã pyʼỹieterei ojapo umichagua anúnsio. Ñanemanduʼa vaʼerã umi ipyahu ha oho ramo ramóva hína rreunionhápe ndoikuaamoʼãiha oĩha oguerekóva ko provléma kongregasiónpe, ha ndajaipotái oñeñandu vai hikuái koʼãichagua anúnsiore. Umi ansiáno ndojapói vaʼerã koʼã párte omoñeñandu vai hag̃uáicha umi ojepokuaávape oipuru perfúme.

Oĩramo kongregasiónpe peteĩ ndaikatúiva ohetũ perfúme ha pe salón orekóramo espásio tuicha, ansianokuéra ikatu oheja peteĩ lugár apartete umi orekóvape g̃uarã ko provléma. Por ehémplo, ikatu oñekonekta sonído sála B-pe ha ojerreserva chupekuéra upépe. Péro oimérõ ojejapopáma la ikatumíva guive oñesolusiona hag̃ua upe situasión, ha oĩ gueteri ojapo vaíva hese la perfúme ryakuã, ikatu ojegrava chupekuéra la rreunión térã ohendu hóga guive por teléfono, ojejapoháicha jepi oĩ jave ermáno ndaikatúiva osẽ hógagui, tahaʼe ijeda térã hasykatu rupi.

Jaha jave ñande aty guasu tres diaguápe tekotevẽterei ñanembaʼerechakuaa ha ani jaipuru umi perfúme imbaretetereíva. Koʼã asambléape ijetuʼu jepi ojaparta hag̃ua lugár umi ndaikatúivape g̃uarã ohetũ perfúme. Upéicharõ jepe, ko instruksión ndoaplikái jaha jave rreunionhápe.

Ko múndope ningo enterovévante jasufri ñaneimperfékto haguére. Upévare ñamombaʼeterei oĩ jave ñanepytyvõva jagueropuʼaka hag̃ua umi mbaʼe jahasáva. Ikatu oime ñane kongregasiónpe oĩ peteĩ ermáno térã ermána ndaikatúiva ohetũ perfúme ojapo vai rupi hese. Upévare, oĩramo nesesida jajesakrifikaʼimíta hesehápe ha michĩmiénte jaipurúta. Péicha jahechauka hína jahayhuha ñane ermanokuérape.

La Biblia omombeʼu Poncio Pilato okondena ha ojukauka hague Jesúspe (Mat. 27:1, 2, 24-26). Upéicharõ jepe, ko mburuvicha réra ndahaʼéi la Bíbliape añónte oĩva, oñeñeʼẽ avei hese umi lívro yma guarépe. Peteĩ lívro oĩva ingléspe, hérava Diccionario Bíblico El Ancla, heʼi yma ojeskrivi hague heta mbaʼe umi governadór de judéare, péro entéro umi governadór apytépe oñeñeʼẽve Poncio Pilátore.

Pilato réra oĩ avei umi lívro oskrivi vaʼekuépe Josefo, peteĩ hudío ojededikáva oinvestiga umi istória yma guare. Josefo omombeʼu mbohapy provléma oiko vaʼekue Pilato ogovernárõ guare Judea. Ótro hudío hérava Filón, oinvestigáva avei umi istória yma guare, omombeʼu avei peteĩ provlemaʼi oiko vaʼekue Pilato ogovernárõ guare. Upéicha avei peteĩ eskritór rrománo hérava Tácito, ojededikáva oskrivi opa mbaʼe umi governadór rrománo ojapo vaʼekue, heʼi Poncio Pilato ojukauka hague Jesúspe Tiberio ogovernárõ guare Roma.

Áño 1961-pe, unos kuánto karai ojededikáva ojeporeka umi mbaʼe yma guarére otopa peteĩ ita pedáso oĩhápe Pilato réra idióma latínpe. Upe ita ojetopa peteĩ teátro yma guarépe, umi rrománo okonstrui vaʼekue siuda de Cesaréape, oĩva Israélpe. Ko itáre ndojekuaapái la ojehaise vaʼekue, péro amalisia upépe heʼi vaʼekue: “Poncio Pilato, Judea mburuvicha, odedika (ko) Tiberieum umi diós iñimportantevévape”. Koʼápe amalisia oñeñeʼẽ kuri peteĩ palásio ojejapo vaʼekuére Tibériope, pe mburuvicha omanda guasuvévape g̃uarã Rómape.

Ñande rrevísta La Atalaya 15 de julio de 2002 oñeʼẽ vaʼekue ko témare pe artíkulo héravape “Preguntas de los lectores”, upe artíkulo ohechauka kuri peteĩ ermána omoĩ vaʼerãha iñakã rehegua ojapórõ estúdio vívliko ha omoirũ chupe peteĩ puvlikadór, tahaʼe vautisádo térã nahániri. Péro oñeanalisa porãve rire ko téma ojehecha iporãveha oñekambiaʼimi upe instruksión.

Peteĩ ermána ojapórõ peteĩ estúdio vívliko ha omoirũ chupe peteĩ ermáno vautisádo, omoĩ vaʼerã iñakã rehegua. ¿Mbaʼérepa? Ojapo rupi peteĩ tembiapo okorrespondéva peteĩ kuimbaʼépe. Omoĩvo iñakã rehegua ohechauka orrespetaha pe arréglo oĩva kongregasiónpe (1 Cor. 11:5, 6, 10). Pe ermána ikatu avei ojerure pe ermánope okondusi hag̃ua, oiméramo haʼe ikatu ha oĩ kapasitádo ojapo hag̃ua upe estúdio.

Péro oimérõ pe omoirũva pe ermánape neʼĩra ojevautisa ha ndahaʼéi iména, natekotevẽi omoĩ iñakã rehegua. Ndaipóri ni peteĩ téxto vívliko ohechaukáva upéicha vaʼerãha. Upéicharõ jepe, ikatu oĩ ermána odesidíva lomímonte omoĩ iñakã rehegua, ikonsiénsia heʼi rupi chupe ojapo vaʼerãha.