CÉSAR ha hembireko Rocío oiko vaʼekue Califórniape, ha oĩ porã hikuái upépe. César ombaʼapo kuri un diaite ha ojapo traváho de kalefaksión, ventilasión ha áire akondisionádo. Hembireko katu ombaʼapo médio día peteĩ konsultório médikope. Haʼekuéra oiko hóga teépe ha ni naifamíliai, péro ojapo peteĩ tiémpo oñepresenta hague chupekuéra peteĩ oportunida ndojavyseietéva.

Octubre de 2009, pe sukursál de Estados Unidos omondo peteĩ kárta entéro kongregasiónpe upe paíspe, ha omokyreʼỹ ermanokuéra de diferénte profesiónpe ikatu hag̃uáicha oservi kómo voluntário de konstruksión oñembotuichave hag̃ua pe sukursál de Wallkill, Nueva York. Oñeinvita umi ohasámavape jepe pe límite de eda oservi hag̃ua Betélpe. César ha Rocío heʼi: “Ore ningo oreedáma ha rohechakuaa ndororekomoʼãveimaha ótra oportunida peichagua, ha upévare roʼe voi ni mbaʼevéicharõ ndorojavymoʼãiha”. ¿Mbaʼépa ojapo hikuái upe rire? Ensegída omyenyhẽ pe solisitu.

Upéi ohasáma un áño, ha ndorresivíri hikuái mbaʼeveichagua notísia. Upéicharõ jepe, haʼekuéra ojapóma tekotevẽva guive oiko sensillove hag̃ua. César omombeʼu: “Romodifika ore veíkulo renda, rojapo chugui peteĩ departamentoʼi ha rova upépe, ha upéi roalkila la ore róga. Roikohágui peteĩ óga guasúpe, orekóva 200 métro kuadrádo, rova peteĩ óga michĩme, de 25 métro kuadrádonte. Hiʼarive ndaʼareguasúi rojogapopa hague. Rojapo koʼã kámbio ikatu hag̃uáicha roime preparádo roho hag̃ua Betélpe rorresivíramo pe invitasión”. ¿Mbaʼépa oiko upe rire? Rocío omombeʼu: “Un mes rova haguépe, og̃uahẽ oréve pe invitasión roservi hag̃ua kómo voluntário temporál Wállkillpe. Rohechakuaa Jehová orevendesiha rojapo haguére umi kámbio roiko sensillove hag̃ua”.

Oĩ heta ermáno ojapóva César ha Rocío ojapo haguéicha ha oho oipytyvõ umi traváho de konstruksiónpe Nueva Yórkpe. Oĩ ermáno ombaʼapóva ikatu hag̃uáicha oñembotuichave pe sukursál  de Wallkill, ha hetaiterei avei oreko pe priviléhio ombaʼapóvo oĩtahápe pe Séde Sentrál Wárwickpe. * Heta matrimónio oheja hóga porã, itraváho ha imaskóta ombaʼapove hag̃ua Ñandejárape g̃uarã. ¿Mbaʼépa Jehová opensa koʼã ermánore? ¿Ovendesípa umi sakrifísio ojapóva hikuái? Si, haʼe ovendesi chupekuéra.

Por ehémplo, peteĩ ermáno elektrisísta hérava Way ha hembireko Debra, ovende hóga ha heta mbaʼe orekóva siuda de Kánsaspe, ha oho ombaʼapo hikuái Wállkillpe kómo voluntário extérno de Betel. * Haʼekuéra orekóma 60 áño potaite ha ojapo heta kámbio oho hag̃ua oservi upépe. Ko matrimónio ni michĩmi nombyasýi umi mbaʼe odesidíva, pórke ohechakuaa ndojaporeíri hague. ¿Mbaʼéichapa oñeñandu hikuái ombaʼapóvo Betélpe? Debra heʼi: “Ñane puvlikasiónpe osẽ jepi umi taʼanga ohechaukáva mbaʼéichapa umi ermáno omopuʼãjoa umi óga pe múndo pyahúpe. Haʼete voi chéve aimémava upépe”.

Melvin ha Sharon, Carolina del Surgua, ovende avei hóga ha ikosakuéra oho hag̃ua ombaʼapo Wárwickpe. Ndahaʼéi ifasilpáva chupekuéra ojapo hag̃ua umi mbaʼe, péro opensa tuichaiterei mbaʼeha oho oipytyvõ ko tembiapo iñimportantetévape. Haʼekuéra heʼi: “Rovyʼaiterei roikuaágui umi mbaʼe rojapóva ovenefisiataha enterove ermánope ko yvy tuichakuére. ¡Koʼã mbaʼe ningo ndaijojahái!”.

Peteĩ ermáno hérava Kenneth ombaʼapo vaʼekue konstruksiónpe, péro ojehuviláma. Haʼe ha hembireko Maureen oreko 50 áño rasami ha oiko kuri Califórniape. Upéi ova hikuái Wárwickpe oipytyvõ hag̃ua pe konstruksiónpe. Péro ohótarõ guare hikuái, onkarga peteĩ ermánape oñatende hag̃ua chupekuéra hógare. Upéi Kenneth ojerure ihentekuérape oñangarekomi hag̃ua chupe itúva ijedámavare. ¿Ombyasýpa koʼã ermáno ojapo haguére umi sakrifísio oservi hag̃ua Betélpe? Kenneth heʼi: “Añetehápe ningo sapyʼánte ijetuʼu kuri oréve, péro rohasáma hetaiterei mbaʼe porã. Upévare rorrekomenda entéro ikatúvape oñanima hag̃ua ojapo koichagua servísio”.

Enterove lénto umi oñekuaveʼẽva oho hag̃ua oipytyvõ pe konstruksiónpe, oheja heta mbaʼe. Por ehémplo, peteĩ matrimónio orekóva 60 áño rasami hérava William ha Sandra, oiko porãiterei kuri Pensilvániape. Oreko vaʼekue hikuái peteĩ emprésa ofavrikáva rrepuésto diferénte kláse makináriape g̃uarã ha omombaʼapo 17 persónape. Haʼekuéra oservi pe kongregasión oĩ haguépe voi imitã guive, ha enterove lénto umi ihénte oiko ag̃ui chuguikuéra.  Oñepresentárõ guare chupekuéra pe oportunida oho hag̃ua oservi kómo voluntário extérno Wállkillpe, haʼekuéra oikuaa porã ohejámante vaʼerãha ihentekuérape ha hetave mbaʼe. William omombeʼu: “Ijetuʼueterei vaʼekue oréve roheja pe lugár ymaite guive rojepokuaa hague”. Péro haʼekuéra heta oñemboʼe Jehovápe ha upéi odesidi oho, ha koʼag̃aite peve nombyasýi upe sakrifísio ojapo vaʼekue. William heʼi: “Vyʼápe rombaʼapo umi ermáno Betelpeguándi, ha upéva ndaijojahái. Sandra ha che núnka ndorovyʼáiva peichaite peve”.

Ricky katu haʼe vaʼekue herénte de konstruksión Hawáipe, ha oñeinvita avei chupe oservi hag̃ua kómo voluntário extérno Wárwickpe. Hembireko Kendra omokyreʼỹ chupe oasepta hag̃ua upe invitasión. Péro oreko hikuái peteĩ ifamília de 11 áño hérava Jacob, ha okyhyje oafektárõ g̃uarã chupe upe kámbio, pórke pe siuda idiferenteterei haʼekuéra oikohágui. Upéicha rupi ñepyrũrã oduda hikuái ova hag̃ua Nueva Yórkpe.

Ricky heʼi: “Hiʼãiterei kuri oréve rotopa peteĩ kongregasión oĩháme heta imitãva oservi kyreʼỹva Jehovápe ikatu hag̃uáicha Jacob oreko iñamigorã oipytyvõtava chupe”. Péro amo ipahápe oho hikuái peteĩ kongregasión ndaiporiguasuihápe mitã, péro si oĩ heta vetelíta. Ricky omombeʼu: “Roreko rire pe primera rreunión ore kongregasión pyahúpe, aporandu che raʼýpe mbaʼéichapa oñeñandu ndaipóri haguére ijavegua. Ha haʼe heʼi chéve: ‘Ani ejepyʼapy papa. Koʼág̃a che amígota umi vetelíta imitãvéva’”.

Ha upeichaite oiko. Umi mitãrusu oservíva Betélpe oñembososioite Jacob rehe. ¿Mbaʼéichapa oipytyvõ chupe upéva? Ricky omombeʼu: “Peteĩ pyhare ahecha che raʼy ilurendyitiha. Che aimoʼã kuri atopataha chupe ivideohuégo reheve, péro ahecha olee hína ivívlia. Aporandúvo chupe mbaʼépa ojapo, heʼi chéve: ‘Che ningo vetelíta koʼág̃a ha aleepáta la Biblia un áñope’”. Natekotevẽi voi ni jaʼe mbaʼeichaitépa Ricky ha Kendra ovyʼa, ha ndahaʼéi Ricky oipytyvõ haguérente pe konstruksiónpe Wárwickpe, síno ohechakuaágui hikuái mbaʼeichaitépa upe kámbio oipytyvõ ifamíliape oñemoag̃uive hag̃ua Jehováre (Prov. 22:6).

Jaikuaaháicha, ág̃ante oñemohuʼãta umi traváho de konstruksión ojejapóva Wallkill ha Wárwickpe. Umi oñeinvita vaʼekue oipytyvõ hag̃ua oikuaa porã avei peteĩ día opataha iñasignasión upépe. ¿Ojepyʼapýpa umi ermáno ndoikuaáigui mbaʼépa oikóta chuguikuéra upe rire? Nahániri. Heta oĩ opensáva peteĩ matrimónio Floridagua opensaháicha. Umíva hína John ha hembireko Carmen. John ningo herénte de konstruksión ha oservi hembirekóndi kómo voluntário temporál Wárwickpe. Haʼekuéra  heʼi: “Rohechakuaa Jehová koʼag̃aite peve nombofaltaiha oréve mbaʼeve. Roikuaa porã haʼe ndaorerejareimoʼãiha ko traváho opa rire” (Sal. 119:116). Luis katu ombaʼapo vaʼekue sistéma de extinsión de inséndiope. Haʼe ha hembireko Quenia oho avei oservi Wállkillpe. Haʼekuéra heʼi: “Heta vésema rohecha mbaʼéichapa Jehová omeʼẽ oréve umi mbaʼe roikotevẽva. Ha rojerovia osegitaha oñangareko orerehe toroime roimehápe” (Sal. 34:10; 37:25).

Enterove lénto umi oñekuaveʼẽ vaʼekue oservi hag̃ua umi traváho de konstruksiónpe Nueva Yórkpe, ikatu kuri opensa isituasión nomeʼẽiha oho hag̃ua oservi ótro hendápe. Péro haʼekuéra ojerovia Jehováre.  Haʼe voi heʼi isiervokuérape: “Pejeroviántena cherehe [...] ha pehecháta mbaʼéichapa yvága guive ahykuavo pende ári heta mbaʼe porã, ndofaltamoʼãi peẽme mbaʼevete” (Mal. 3:10, NM).

Ha nde, ¿rejeroviátapa avei péicha Jehováre? Eñemboʼéna chupe ko asúntore ha ehecha ndaikatúipa nde avei reho reipytyvõ umi ótro ermáno ojapoháicha, tahaʼe Nueva Yórkpe térã ambue konstruksiónpe. Rejapóramo upéicha, rehecháta mbaʼéichapa Jehová nevendesi (Mar. 10:29, 30).

Peteĩ ermáno inheniéro hérava Dale ha hembireko Cathy oiko vaʼekue Alabámape ombaʼapo avei de voluntário Wállkillpe. Ko paréha omokyreʼỹ ipyʼaite guive enterovépe oipytyvõ hag̃ua umi traváho de konstruksiónpe ojejapóva Jehová organisasiónpe. Haʼekuéra heʼi: “Eñembopyʼaguasúramo ha embotapykueʼimi umi mbaʼe ndegustáva reho hag̃ua reservi ótro hendápe, rehecháta mbaʼéichapa Jehová espíritu ombaʼapo ha nepytyvõ”. ¿Mbaʼépa nde ikatu rejapo reservi hag̃ua avei péicha? Dale heʼi: “Mbeguekatúpe eñehaʼã vaʼerã eiko sensillomiénte. ¡Arakaʼeve nerembyasymoʼãi rejapo haguére upéicha!”. Peteĩ ermáno Carolina del Nortegua hérava Gary ombaʼapo vaʼekue 30 áñore kómo supervisór de konstruksión. Ha koʼág̃a haʼe ha hembireko Maureen oipytyvõ avei pe konstruksiónpe Wárwickpe. Koʼã ermáno heʼi: “Tuichaiterei vendisión ningo ñambaʼapo ha jahasa tiémpo heta ermáno ha ermána ikalidaitereíva ndive, oservímava heta áñore Jehovápe Betélpe”. Gary heʼi avei: “Jaservi hag̃ua Betélpe jajepokuaa vaʼerã jaiko sensillomi, ha añetehápe iporãiteve jaiko upéichante ko múndope”. Jason ningo elektrisísta, ha ombaʼapo vaʼekue peteĩ emprésape ojapóva instalasión eléktrika. Haʼe ha hembireko Jennifer oiko vaʼekue Illinóispe ha oñekuaveʼẽ avei oho hag̃ua ombaʼapo Wállkillpe. Ko matrimónio heʼi ombaʼapóvo upépe haʼetemaha chupekuéra “oikómava pe múndo pyahúpe”. Jennifer heʼi avei: “Igustoiterei ningo jahecha Jehová oguerohoryha la jajapóva ha arakaʼeve ndahesaraimoʼãiha upévagui. Ha ndahaʼéi upéva añónte, ipo renyhẽ omeʼẽ ñandéve umi vendisión”.