El 6 de septiembre de 1926, peteĩ peregríno (superintendénte viahánte) haponés oservíva Estados Unídospe, oñemondo jey hetãme kómo misionéro. Upépe ohaʼarõ chupe pe únika persóna ojesuskrivi vaʼekue rrevísta Ñemañaháme ha omoñepyrũmava peteĩ grúpo de estúdio vívliko táva Kóbepe. Upe siudápe avei umi Estudiánte de la Biblia ojapo primera ves peteĩ asambléa el 2 de enero de 1927. Upérõ oho 36 persóna ha ocho ojevautisa. Añetehápe oñepyrũ porãma voi hikuái. ¿Péro mbaʼéicha piko peteĩ grúpo michĩva ikatúta omog̃uahẽ pe añetegua oĩva la Bíbliape umi 60 millón persónape oĩva Japón tuichakuére?

Mayo de 1927-pe, umi Estudiánte de la Biblia kyreʼỹme oinvita umi héntepe ou hag̃ua ohendu umi diskúrso vívliko. Ojejapótarõ guare pe primer diskúrso siuda de Osákape, umi ermáno omoĩ heta letréro ha kartél tuichaicháva oporoinvita hag̃ua pe siuda tuichakuére. Omondo hikuái 3.000 invitasión umi persóna iñimportántevape. Orreparti pe siudáre 150.000 invitasión, omoĩ anúnsio 400.000 voléto de trénre ha umi diário iñimportantevévape. Pe diskúrso díape katu mokõi avión oveve pe siuda de Osaka ári ha oity 100.000 invitasión. Amo 2.300 persónarupi oho ohendu pe diskúrso “Ñandejára Rréino hiʼag̃uimbaitéma”. Omyenyhẽte hikuái pe Salón Asahi oĩva Osákape, ha 1.000 persónarupi ndaijavéima. Opa rire pe diskúrso, ojejapo peteĩ sesión de pregúnta ha rrespuésta, ha mas de 600 persóna opyta upearã. Umi ótro méspe ojejapo avei heta diskúrso vívliko siuda de Kyótope ha ambue siudápe, opytáva oéste gotyo Japónpe.

Octubre de 1927-pe, umi Estudiánte de la Biblia ojapo avei umi diskúrso Tókyope. Ha upe mboyve oñemondo invitasión heta hénte iñimportántevape, umíva apytépe pe primer minístro, umi ombaʼapóva parlaméntope, militarkuéra ruvicha ha heta omoakãvape rrelihión. Avei oñemoĩ heta kartél ha anúnsio diáriope ha oñentrega 710.000 invitasión. En totál oho 4.800 persóna ohendu hag̃ua umi mbohapy diskúrso ojejapo vaʼekue Japón kapitálpe.

Umi kolportór (prekursór) rembiapo ningo iñimportanteterei vaʼekue oñemog̃uahẽ hag̃ua umi ogahárupi pe mensáhe oñeʼẽva Ñandejára Rréinore. Peteĩva umi prekursóra ypykue Japónpe, hérava Matsue Ishii, ha iména Jizo, haimete voi opredikapa Japón tuichakue, 75% upe território. Haʼekuéra oho Sapporo guive, opytáva nórte gotyo, táva Sendai peve, ha avei opredika hikuái Tokyo, Yokohama, Nagoya, Osaka, Kyoto, Okayama ha Tokushímape. Ermána Ishii ha ótra ermána ijedáva hérava Sakiko Tanaka omonde ao típiko (kimóno) oho hag̃ua ovisita umi funsionário ombaʼapóvape goviérnope. Peteĩ funsionário ojerure chupekuéra 300 lívro El Arpa de Dios ha 300 lívro Liberación, ogueraha hag̃ua umi vivliotéka oĩvape umi kárselpe.

Ermána Ishii oheja vaʼekue unos kuánto lívro Katsuo ha Hagino Miúrape, ha sapyʼaitépe ohechakuaa hikuái otopaha pe rrelihión verdadéra. Ko matrimónio  ojevautisa áño 1931-pe ha oñepyrũ oservi de kolportór. Haruichi ha Tane Yamada, ha heta ihentekuéra ohendu pe marandu porã áño 1930 mboyve, ha oñepyrũ oservi Jehovápe. Haruichi ha hembireko Tane oñepyrũ oservi de kolportór ha itajýra Yukiko oho oservi Betel de Tókyope.

Upe tiémpope umi veíkulo hepyeterei, ha umi tape katu ivai. Upémarõ, Kazumi Minoura ha ótro mitãrusu kolportór oipuru umi kása rrodanteʼi imotorʼỹva. Haʼekuéra imanduʼa mbaʼeichaitépa Jehú, peteĩ rréi de Israel, omanehakuaa vaʼekue ikárro. Upévare ombohéra avei hikuái “Jehú” umi kása rrodántepe (2 Rey. 10:15, 16). Sukursál de Japónpe ojejapo mbohapy “Jehú” tuicháva, ipukúva 2,2 métro, ipéva 1,9 métro, ha ijyvatéva 1,9 métro. Ipype ija porã seis prekursór. Upéi ojapo avei hikuái 11 “Jehú” michĩva. Umíva ojeprepara ikatu hag̃uáicha ojestira peteĩ visiklétare, ha ija pype mokõi persóna. Ermáno Kiichi Iwasaki oipytyvõ vaʼekue ojejapo hag̃ua umi “Jehú”, ha haʼe omombeʼu: “Káda ‘Jehú’ oreko peteĩ óga karpaʼi ha oñemoĩ chupe áuto vatería ikatu hag̃uáicha oreko lus”. Umi kolportór ogueraha Japón tuichakuére pe añetegua oporohesapéva. Okorre hikuái opárupi umi “Jehú” reheve, ojupi ha oguejy umi montáñare, okrusa umi ñu oĩva Hokkáidope, opytáva nórte gotyo, ha oho hikuái Kyushu peve, sur gotyo.

Pe kolportór hérava Ikumatsu Ota omombeʼu: “Rog̃uahẽvo peteĩ puévlope, romohenda ore “Jehú” peteĩ rrío rembeʼýpe térã peteĩ ñúme. Ñepyrũrã roho rovisita umi autoridápe, por ehémplo pe alkáldepe. Upéi rog̃uahẽ umi ogahárupi ha roheja umi puvlikasión. Ropredikapa rire upe território, rohasa ambue puévlope”.

Oikórõ guare pe primera asambléa Kóbepe, pe añetegua ‘oñepyrũ ramo’ hesakã Japónpe. Upérõ ijaty 36 Estudiánte de la Bíbliante (Zac. 4:10). Upéi 1932-pe, cinco áño haguépente, Japónpe oĩma 103 puvlikadór ha kolportór ontregáva iñinfórme, ha oheja hikuái mas de 14.000 lívro umi ogahárupi. Ñane tiémpope, umi testígo de Jehová kyreʼỹme opredika umi siudahárupi Japónpe. Koʼág̃a oĩma 220.000 maranduhárarupi omyesakãva oikóvo pe añetegua “kuarahyresẽ gotyo”. Manduʼarã oúva Japóngui.