PETEĨ ansiáno de kongregasión hérava François, oikóva peteĩ tetã oñakãrapuʼãvape ohóvo, omombeʼu: “Opa rire pe vóto umi hénte oñepyrũ oiko vaipa, upévare heta testígo de Jehová oheja hogakuéra. Tembiʼu ha pohã ofaltapa, ha umi hembymíva katu hepyeterei. Umi vánko oñembotypa ha heta kahéro automátiko oñemonandi ha ótro ndaikatúi ojeporu”.

Umi Testígo oheja vaʼekue hóga oñembyaty heta Salón del Réinope oĩva upe tetãme. Ha umi ermáno ombaʼapóva sukursálpe pyaʼe porã oguerahauka chupekuéra pláta ha heta mbaʼe oikotevẽva. Umi mokõi grúpo polítiko oñepyrũ omoĩ kontról umi tapére, péro oikuaa rupi Testigokuéra ndoikeiha polítikape, nomoprovlemaguasúi umi veíkulo sukursalguápe.

François heʼi: “Rohokuévo peteĩ Salón del Réinope, umi frankotiradór oñepyrũ ohaʼã ore veíkulo ha umi vála ojekyty kyty orerehe. Upéi peteĩ soldádo odipara ou oréve hiʼárma reheve ha pyaʼe romboguevi ore veíkulo, rojere ha roho jey sukursálpe. Roagradeseterei ningo Jehovápe ndojehúi haguére oréve mbaʼeve. Pe ótro díape, umi 130 ermáno oñembyatypa vaʼekue upe Salónpe ohopa ótro lugárpe oĩ porãvetahápe. Umíva apytégui oĩ ohóva sukursálpe. Upépe oñemeʼẽ chupekuéra hemikotevẽ ohasapa peve umi provléma ha oñeñangareko hesekuéra ani hag̃ua ikangy ijerovia.

François omombeʼu: “Tiémpo rire, heta ermáno oĩva upe tetãme oskrivi sukursálpe ha heʼi oagradesetereiha oñeñatende porã haguére hesekuéra. Ojeroviave hikuái Jehováre ohecha rire mbaʼéichapa heta ermáno oparupigua oipytyvõ chupekuéra ijetuʼuve jave”.

Oiko jave sarambi, tahaʼe desástre naturál térã umi hénte voi ojapóva, ndahaʼéi jaʼénteva ñane ermáno oikotevẽvape: “Hiʼãite chéve rekonsegi nde aorã ha ne rembiʼurã” (Sant. 2:15, 16, NM). Upéva rangue, ñañehaʼãmbaite ñaipytyvõ chupekuéra, ojapo haguéicha umi kristiáno primer síglope. Haʼekuéra oikuaárõ guare oĩtaha ñembyahýi, “odesidi káda uno omondotaha ikatumíva oipytyvõ hag̃ua umi ermáno oikóva Judéape” (Hech. 11:28-30, NM).

Ñande jaservíva Jehovápe ñaipytyvõseterei umi oikotevẽvape, péro jaikuaa avei tekotevẽha oñemoag̃ui hikuái Ñandejárare (Mat. 5:3). Jesús heʼi vaʼekue hemimboʼekuérape ojapo vaʼerãha disípulo umi héntegui, ha upearã tekotevẽ oñepytyvõ chupekuéra ohechakuaa hag̃ua mbaʼe situasiónpepa oĩ ha ojedesidi hag̃ua oñemoag̃ui Jehováre (Mat. 28:19, 20). Káda uno ningo jaiporu ñane tiémpo, ñane mbaretekue ha ñane mbaʼerepy jajapo hag̃ua ko tembiapo. Ñane organisasiónpe ojeporuve umi kontrivusión oñemotenonde hag̃ua Ñandejára Rréino ha ojepredika hag̃ua pe marandu porã, upéicharõ jepe, oñepytyvõ avei oikotevẽvape. Péicha jahechauka jahayhuha Jehovápe ha ñande rapichakuérape (Mat. 22:37-39).

Opavave omeʼẽva ikontrivusión oñemotenonde hag̃ua umi tembiapo ojapóva testígo de Jehová ko yvy tuichakuére ndojepyʼapýi vaʼerã. Umi kontrivusión ojeporúta hendaitépe ha ideprovechove hag̃uáicha. ¿Ikatúpa nde reipytyvõ umi ermáno oikotevẽvape? ¿Reipytyvõsépa ojejapove hag̃ua disípulo? Oiméramo upéicha, ikatu resegi ko konsého: “Oikotevẽva oñembojárõ ne rendápe, ani rejere chugui. Ikatúramo, eipytyvõ chupe” (Prov. 3:27).