OJAPO 10 áñorupi, Gregorio ha Marilou oiko hague Manílape ha ojapo hikuái iprekursorádo rregulár. Upérõ haʼekuéra oreko 30 áño rasami ha mokõivéva ombaʼapo un diaite. Ijetuʼúramo jepe, okumpli porã hikuái umi rresponsavilida orekóva. Upe riremínte Marilóugui oiko herénte pe vánko ombaʼapohápe. Haʼe heʼi: “Rogana porãiterei ningo ha ndofaltái oréve mbaʼeve”. Upéicha rupi haʼekuéra odesidi ojapo peteĩ óga neporãva peteĩ várrio oikohápe umi iplátava, opytáva 19 kilómetrorupi Manílagui éste gotyo. Upémarõ ofirma hikuái kontráto peteĩ emprésandi oñekomprometehápe opagataha hógare káda més 10 áño pukukue.

Marilou heʼi: “Che puésto pyahu hoʼuve chehegui tiémpo ha chemokaneʼõve, upéicha rupi mbeguekatúpe nachekyreʼỹvéi ambaʼapo hag̃ua Ñandejárape g̃uarã. Haʼete chéve amondáva Jehovápe. Saʼíma chetiémpo aservi porã hag̃ua chupe”. Gregorio ha Marilou noñeñanduporãi isituasión reheve, upémarõ ohecha mbaʼépepa osẽta hikuái péichante osegíramo. Gregorio omombeʼu: “Rohechakuaa  tekotevẽha rokambia, péro ndoroikuaái mbaʼéichapa rojapóta upéva. Ore ningo ni naorefamíliai, upémarõ roñemongeta porã ha rohecha mbaʼe mbaʼépa ikatu rojapo roñemeʼẽmbaite hag̃ua Jehová servísiope, ha rojerure chupe orepytyvõmi hag̃ua”.

Upe tiémporupi, ohendu hikuái heta diskúrso omokyreʼỹva ermanokuérape oho hag̃ua oservi oñekotevẽhápe puvlikadór rehe. Gregorio heʼi: “Rohechakuaa Jehová ombohovaiha ore ñemboʼe”. Mokõivéva ojerure Ñandejárape taimbareteve ijerovia ha taipyʼaguasu hikuái odesidi porã hag̃ua. Péro oĩ peteĩ provléma: oheja vaʼerã hogakuéra, hiʼarive 3 áñoma opaga hese. ¿Mbaʼépa ojapóta hikuái? Marilou heʼi: “Hetáma ropaga hese, ha rokanselárõ ore kontráto, roperdepaitéta upe ropaga vaʼekue. Péro rohecha upe situasiónpe ikatuha rodesidi rojapótapa Jehová rembipota térãpa ore roipotávante”. Gregorio ha Marilou imanduʼa Pablo omboyke hague heta mbaʼe Ñandejára Rréino rehehápe. Ha osegi hikuái upe ehémplo: okansela pe kontráto, oheja itravahokuéra, ovende heta mbaʼe orekóva ha ova hikuái peteĩ puévlo oĩvape ísla de Palawánpe, opytáva 480 kilómetro Manílagui sur gotyo (Filip. 3:8).

Gregorio ha Marilou ova mboyve, ojepreparáma kuri ani hag̃ua odependeterei umi komodidáre, péro og̃uahẽ rire upépentema ohecha mbaʼéichapa añetehápe oikóta hikuái. Marilou heʼi: “¡Noroimoʼãiete voi ningo la rohecháva! Ndaipóri elektrisida ni mbaʼeveichagua komodida. Aiporu rangue che ólla eléktrika ambojy hag̃ua arrós, roiko vaʼerã rojapo jepeʼa, rojatapy ha upéicha ambojy. Ndaikatuvéi aha de kómpra, ni umi rrestaurántepe, ni akonsegi umi mbaʼe ikatúva siudaháre oñekonsegi. Añetehápe ahekaiterei kuri koʼã mbaʼe”. Upéicharõ jepe, ndahesaráiri hikuái maʼerãpa ova upépe, ha sapyʼaitépe ojepokuaáma upe lugárpe. Marilou heʼi: “Koʼág̃a katu avyʼa voi ahechávo umi paisáhe neporã porãva ha umi mbyja ojajaipáva. Péro avyʼaiteve ahechávo mbaʼéichapa oñeñandu umi hénte apredikáva; ojajaipa ningo hesakuéra ohendúvo pe marandu porã. Koʼápe ningo ‘roaprende peteĩ mbaʼe naentéroi oikuaáva’, roikokuaa umi rorekomívare” (Filip. 4:12, NM).

Gregorio omombeʼu: “Rog̃uahẽrõ guare, oĩ vaʼekue cuatro Testígonte, ha ovyʼaiterei hikuái añepyrũrõ guare ajapo diskúrso káda semána ha ambopu che mbaraka ropurahéi hag̃ua umi kántiko”. Un áñopente ko matrimónio ohecha mbaʼéichapa ko grúpo michĩvagui oiko peteĩ kongregasión oĩháme 24 puvlikadór. Gregorio heʼi: “Umi ermáno ningo orerayhueterei, ha upéva opoko orerehe”. Ko matrimónio oservi rire seis áño upe lugárpe heʼi: “Rovyʼaiterei rohechávo mbaʼéichapa heta hénte oñepyrũ oservi  Jehovápe, ha upéva ndaijojahái. Roñandu roiporu porãha ore rekove”.

Filipínaspe haimete 3.000 puvlikadór ova umi lugár oñekotevẽvehápe maranduhárare. Koʼãva apytépe oĩ 500 ermána soltéra. Peteĩva koʼã ermána héra Karen.

Karen oreko 25 áñorupi ha okakuaa Baggáope (Cagayán). Imitã guive oiporuseve itiémpo Jehová servísiope. Haʼe omombeʼu: “Aikuaa mbykypaitemaha pe tiémpo ha heta hénte oikotevẽ pe marandu porãre, upévare aservise oñekotevẽvehápe”. Ihentekuéra apytépe katu oĩ heʼíva chupe iporãveha oho universidápe, oho rangue mombyry opredika hag̃ua. Péro Karen ojerure Jehovápe toipytyvõmi chupe ha oñeʼẽ umi ermáno oservívandi mombyrymbyry. Orekórõ guare 18 áñonte haʼe ováma peteĩ lugár oñekotevẽvehápe, opytáva 64 kilómetro hógagui.

Pe kongregasión Karen ohohápe, michĩ ha iterritório opyta pe oséano Pacífico rembeʼýpe, oĩháme heta montáña. Karen heʼi: “Rog̃uahẽ hag̃ua che kongregasión pyahúpe, roguata kuri tres día Baggao guive. Rohasa vaʼerã mas de 30 vése umi rrío ha heta montáña”. Upe rire omombeʼu avei: “Ag̃uahẽ hag̃ua heta estudiánte rógape aguata vaʼerã seis óra, upévare apytámante ake hogapekuéra ha pe ótro día aguata jey seis óra aju hag̃ua ógape”. ¿Mbaʼéichapa Karen oñeñandu ojesakrifika haguére? Haʼe heʼi: “Sapyʼánte hasyeterei chéve che retyma”. Ha upéi opuka ha heʼi: “Péro amoñepyrũ jepe 18 estúdio. Añetehápe ahechakuaa Jehová imbaʼeporãha” (Sal. 34:8).

Sukhi ningo peteĩ ermána soltéra oiko vaʼekue Estados Unídospe. Haʼe oreko 40 áño rasami ha ova Filipínaspe. ¿Mbaʼépa omokyreʼỹ chupe ojapo hag̃ua upéva? Áño 2011-pe peteĩ asambléa de sirkuítope ohendu oñentrevistárõ guare peteĩ matrimóniope. Haʼekuéra omombeʼu ovendepa lénto hague umi mbaʼe orekóva ikatu hag̃uáicha oho opredika Méxicope. Sukhi heʼi: “Upe entrevísta chepytyvõ apensa hag̃ua umi mbaʼe ikatúvare ahupyty Jehová servísiope, ymave ni mbaʼeveichavérõ napensái vaʼekue”. Ohendu rire tekotevẽha ojepredika umi hénte oikóvape Filipínaspe ha oñeʼẽva panhavi, ko ermána odesidi ova upépe. Ihénte ningo Indiagua, upéicha rupi haʼe oñeʼẽkuaa upe idióma. Péro, ¿mbaʼépa ombohovái vaʼerã ko ermána?

Sukhi heʼi: “Naimoʼãiete hasyetereitaha chéve adesidi mbaʼépa avendéta che kosakuéragui. Che ningo 13 áñore aiko peteĩ departaménto ikomodida hetávape, upe rire katu ava che familiakuéra oĩháme ndaiporiguasuihápe komodida. Ñepyrũrã ijetuʼu chéve, péro upéva cheprepara aikokuaa hag̃ua arekomívarente”. ¿Mbaʼépa ohasa ko ermána  og̃uahẽ rire Filipínaspe? Haʼe omombeʼu: “Akyhyjeterei umi víchogui, ha ahechagaʼu heta mbaʼe. Koʼã mbaʼe ijetuʼueterei chéve. Koʼág̃a ajeroviave Jehováre”. ¿Mbaʼéichapa Sukhi oñeñandu koʼág̃a? Haʼe opukavy ha heʼi: “Jehová heʼi ñandéve: ‘Petanteántena, ha pehecháta mbaʼéichapa ahykuavo pende ári heta mbaʼe porã’. ¡Siertoite ningo ko téxto heʼíva! Ha upéva ahechakuaa ojeʼe jave chéve predikasiónpe: ‘¿Arakaʼe piko reju jeýta? Aikuaasevéngo heta mbaʼe’. Añeñandu porãiterei aipytyvõ haguére che rapichakuérape oikuaa hag̃ua Jehovápe” (Mal. 3:10, NM). Upe rire heʼive: “Hasýpe ajedesidi ava. Péro ava rire ahechakuaa mbaʼeichaitépa Jehová chepytyvõ opaite mbaʼépe ha nombofaltái chéve mbaʼeve. Añetehápe amombaʼeterei upéva”.

Sime ningo peteĩ ermáno omendáva orekóva 40 áño pota. Haʼe ova Filipínasgui peteĩ tetãme oĩva Oriente Médiope ombaʼapo hag̃ua peteĩ puésto ojepaga porãhápe. Oĩ aja upépe, peteĩ superintendénte de sirkuíto heta omokyreʼỹ chupe ha avei ohendu peteĩ diskúrso ojapo vaʼekue peteĩ ermáno oĩva Kuérpo Governántepe. Koʼã mbaʼe omomýi chupe omotenonde hag̃ua Jehová servísio. Haʼe heʼi: “Aikuaa aheja vaʼerã che traváho ha upéva nachemongevéi”. Upéicharõ jepe, oheja itraváho ha oho jey Filipínaspe. Koʼág̃a Sime ha hembireko Haidee oiko Davao del Súrpe (Filipinas), peteĩ lugár oñekotevẽhápe maranduhárare. Sime heʼi: “Chemanduʼa akyhyje hague aheja hag̃ua che traváho, upéicharõ jepe adesidi amotenonde Jehovápe. Avyʼaiterei ningo apensávo ambohovái porã hague upe situasión. Ñañemeʼẽmbaite vaʼerã Jehová rehehápe. ¡Ndaipóri mbaʼeve iporãvéva upévagui!”.

Ramilo ha Juliet ningo peteĩ matrimónio oservíva de prekursór ha oreko hikuái 30 áño rasami. Ohendúrõ guare oĩha peteĩ kongregasión oikotevẽva maranduhárare, opytáva 30 kilómetrorupi haʼekuéra oĩhágui, oñekuaveʼẽ oho hag̃ua. Káda semána, oky ha ndokýipe, oho hikuái upépe móto ári rreunionhápe ha osẽ hag̃ua opredika. Haʼekuéra oho vaʼerã umi tape ivaívare ha ohasa umi puénte ipeligrósovare, upéicharõ jepe nombyasýi hikuái oñekuaveʼẽ haguére. Ramilo heʼi: “En totál roguereko 11 estúdio. Añetehápe rojesakrifika heta roservi hag̃ua peteĩ lugár oñekotevẽhápe, péro roñeñandu porãiterei ha rovyʼa rojapo haguére upéva” (1 Cor. 15:58).

¿Mbaʼépa rejapo vaʼerã reservi hag̃ua umi lugár oñekotevẽvehápe puvlikadór rehe tahaʼe ne retãme térã ótro paíspe? Reñeʼẽ vaʼerã ne superintendénte de sirkuíto ndive ha elee Ñane Marandu Porã osẽ vaʼekue agosto 2011-pe heʼihápe “Ikatúpa rehasa Macedóniape?”.