OJAPO peteĩ tiémpo, Roald ha Elsebeth, peteĩ matrimónio orekóva 50 áño rupi, oiko hague Bérgenpe, peteĩ siuda tuichaitereíva Noruégape. Upépe oservi hikuái peteĩ kongregasiónpe ifamiliakuéra Isabel ha Fabian ndive. Roald oservivaʼekue ansiánoramo ha Elsebeth de prekursóra. Isabel ha Fabian katu maranduhára katupyry.

Roald, hembireko ha Fabian odesidi oho opredika una semána peteĩ lugár mombyryvehápe. Upéicha rupi septiembre 2009-pe, Roald, Elsebeth ha Fabian (orekóva 18 áño) oho Nórdkinnpe, peteĩ lugár opytáva Fínnmarkpe, nórte gotyo Círculo polar árticope. Upépe oĩ peteĩ puévlo hérava Kjøllefjord, upe lugárpe oĩ heta ermáno ouvaʼekue avei mombyrýgui opredika hag̃ua. Roald heʼi: “Aha riremínte, avyʼa ha añeñandu porãiterei ikatu haguére amohenda porãmba che rembiapo apredika hag̃ua upépe una semána”. Péro upéi oiko peteĩ mbaʼe omopensáva chupe. ¿Mbaʼépa upéva?

Roald omombeʼu: “Mario, peteĩ prekursór oservíva Fínnmarkpe, ahaʼarõʼỹetére oporandu oréve ndaikatuichénepa rova Lákselvpe, oĩhápe peteĩ kongregasión orekóva 23 maranduhára, ha oikotevẽva oñepytyvõ chupekuéra”. Roáldpe omopensa upéva. Haʼe heʼi: “Che rembirekóndi ropensáva voi ore familiakuéra okakuaapa rire rohóvo roservi peteĩ lugár oñekotevẽvehápe maranduhárare, péro koʼag̃aite nahániri”. Upéicharõ jepe, opredika rire upe lugárpe Roald ohechakuaa oĩha hetaiterei hénte oikotevẽva Ñandejárare, ha ndaikatuvéimaha ohaʼarõ puku hikuái. Roald omombeʼu: “Heta chemopensa Mario heʼivaʼekue ha ni ndakevéi ajepyʼamongetágui mbaʼépa ajapóta”. Upéi Mario ogueraha chupekuéra 240 kilómetro súr gotyo Kjøllefjordpe, haʼe oipota oikuaa hikuái pe kongregasión oĩva Lákselvpe.

Andreas, oservíva upépe ansiánoramo, ohechaukapa chupekuéra upe lugár ha pe Salón del Reino. Umi ermáno oguerohoryeterei chupekuéra ha heʼi voi Roald ha Élsebethpe ovyʼaitereitaha hikuái ováramo upe lugárpe ifamiliakuéra ndive oipytyvõ hag̃ua chupekuéra predikasiónpe. Upéi Andreas opukavy ha heʼi okonsegimaha voi Roald ha Fabiánpe itravahorã. ¿Mbaʼépa ojapóta Roald ha ifamiliakuéra?

Fabian heʼi chupekuéra: “Che ndaikoséi koʼápe”. Haʼe ndovaséi peteĩ puévlo michĩvape ha ndohejaséi iñamigokuéra orekóva kongregasiónpe yma michĩ guive. Ndahaʼéi voi upéva añónte, haʼe ostudia elektrisistarã ha nomohuʼãi gueteri upéva. Péro oporandúrõ guare hikuái Isabélpe (orekóva 21 áño) ndovaséipa upe lugárpe, heʼi: “¡Upéva ningo che ymaite guivéma ajapose!”. Péro heʼi: “Apensaitereívo ko mbaʼére, chepyʼamokõima ha añeporandu; ¿ahechagaʼútapa che amigokuérape? ¿Iporãvétapa apytánte che kongregasiónpe, ha pe lugár aiko porã ha ndofaltaihápe chéve mbaʼeve?”. Elsebeth katu heʼi: “Ahechakuaa Jehová omeʼẽha oréve ore rembiaporã, péro añemoĩ avei apensa mbaʼépa rojapóta ore róga rombopyahupa ramoitévagui ha umi mbaʼe rombyatýmavagui 25 áño pukukue”.

Una semána opredika rire Nórdkinnpe, Roald, hembireko ha Fabian oho jey hógape Bérgenpe. Umi ermáno oikóva Lákselvpe opytáramo jepe 2.100 kilómetro chuguikuéra, akóinte imanduʼa hikuái koʼã ermánore. Elsebeth heʼi: “Pyʼỹinte añemboʼe Jehovápe ha roñekomunika umi ermánondi. Roguerahauka ojupe fóto ha romombeʼu umi mbaʼe porã rohasáva”. Roald katu heʼi: “Aikotevẽ tiémpo adesidi hag̃ua rovátapa upépe. Apensavaʼerã avei mbaʼéichapa roñemantenéta. Pyʼỹinte añemboʼe Jehovápe ha añemongeta ko mbaʼére che familiakuéra ha umi ermáno ikatupyrýva ndive”. Fabian omombeʼu: “Apensavévo upe témare, ahechakuaa haʼe reiete hague ndavaseiha upépe. Heta añemboʼe Jehovápe ha upéicha káda día ajedesidive avávo che tuvakuéra ndive Lákselvpe”. ¿Ha mbaʼépa ojapo Isabel? Haʼe oñepyrũma ojapo iprekursorádo ikongregasiónpe ikatu hag̃uáicha oservi porãve ováramo ambue lugárpe. Avei oñemotiempove ostudia ha ohesaʼỹijo hag̃ua la Biblia, ha seis mése haguépe heʼi oĩmaha ova hag̃uáicha.

Roald ha ifamiliakuéra enterovéma ohose oservi Lákselvpe ha ojapo hikuái tekotevẽva ova hag̃ua upépe. Pór ehémplo, Roald ogana porãramo jepe, ojerure permíso un áño. Péro opyta hag̃ua rehehápe, ipatrón heʼi chupe nombaʼaposéipa dos semána káda un més imédio. Roald heʼi: “Saʼietereive agana, péro oho porã oréve”.

Elsebeth omombeʼu: “Che ména heʼi chéve aheka hag̃ua peteĩ óga roiko hag̃ua Lákselvpe ha roalkila hag̃ua ore róga rorekóva Bérgenpe. Upéva heta tiémpo chegueraha, péro rokonsegi. Tiémpo rire, Isabel ha Fabian ojuhu avei ombaʼapo hag̃ua michĩ mimi, ha koʼág̃a orepytyvõ hikuái ropaga hag̃ua umi gásto”.

Isabel omombeʼu: “Pe puévlo rova hague ningo michĩeterei ha ijetuʼu chéve ajuhu hag̃ua peteĩ traváho ndoʼupamoʼãiva chehegui che tiémpo ha chepytyvõtava asegi hag̃ua che prekursorádope. Sapyʼánte  haʼete chéve ndatopamoʼãiva voi”. Upéicharõ jepe, Isabel ohupyty hemikotevẽ repyrã ojapo rupi umi traváho mimi oñekuaveʼẽva chupe, nueve hendápe voi ombaʼapo pe primer áñope. ¿Ha mbaʼéichapa oho Fabiánpe? Haʼe heʼi: “Amohuʼã hag̃ua che estúdio, tekotevẽvaʼekue ambaʼapo raẽ de aprendís ha ajuhu peteĩ lugár ambaʼapo hag̃ua upéicha. Upe rire arrendi, amohuʼã che estúdio ha ambaʼapo mimíma elektrisístaramo Lákselvpe”.

Marelius ha hembireko Kesia oservisevaʼekue avei oñekotevẽvehápe maranduhárare. Marelius koʼág̃a orekóva 29 áño heʼi: “Umi entrevísta ha diskúrso ojejapóva asambleahápe chemokyreʼỹeterei ahecha hag̃ua ikatútapa apredikave”. Péro Késiape g̃uarã, orekóva 26 áño, ijetuʼu opensávo ohotaha mombyry ifamíliagui. Haʼe omombeʼu: “Chepyʼapyeterei apensávo añemomombyrytaha che hentekuéragui”. Upe tiémpope Marelius ombaʼapo jejopyvaʼekue avei omyengovia hag̃ua pláta oiporuvaʼekue vánkogui. Haʼe omombeʼu: “Roñemboʼe meme Jehovápe ha haʼe orepytyvõ rupi ikatuvaʼekue rova”. Ñepyrũrã oñemotiémpove hikuái ostudia hag̃ua la Biblia. Upéi ovende hóga, oheja umi traváho porã oguerekóva, ha agosto 2011-pe ova Áltape opytáva nórte gotyo Noruégape, upépe oservi hikuái de prekursór. Oñemantene hag̃ua, Marelius ombaʼapo de kontadór ha Kesia katu peteĩ oñembaʼevendehápe.

Knut ha Lisbeth, peteĩ matrimónio orekóva 30 áño rasami, olee Anuáriope umi mbaʼe porã ohupytýva ermanokuéra ohóva oservi oñekotevẽvehápe maranduhárare. Lisbeth heʼi: “Umi tembiasakue oremopensa ha roñeporandu ikatúnepa avei ore rova ótro tetãme. Che chepyʼamokõi apenságui peteĩ cheichagua ndaikatumoʼãiha ojapo upéva”. Upéicharõ jepe oñehaʼãmbaite hikuái upearã. Knut omombeʼu: “Rovende ore róga ha rova che sy rógape ani hag̃ua rogasta heta. Upe rire rohecháma hag̃ua mbaʼéichapa roñeñandúta roservívo oñeñeʼẽhápe ambue idióma, rova peteĩ kongregasión ingléspe Bérgenpe ha ropyta Lisbeth sy rógape”. Upe riremínte Knut ha Lisbeth ohechakuaa ikatumaha ova ha odesidi oho hikuái Ugándape (África). ¿Mbaʼépa ojapo hikuái oñemantene ha osegi hag̃ua iprekursorádope? Káda áño oho Noruégape ombaʼapo hag̃ua dos mése.

¿Mbaʼéichapa oñeñandu koʼã ermáno oho haguére oservi ótro lugárpe? Roald omombeʼu: “Rova rire Bérgengui, rohasave tiémpo che rembireko ha che familiakuérandi. Rojoayhuve ha rovyʼaiterei rohechávo mbaʼéichapa Fabian ha Isabel oñakãrapuʼã Jehová servísiope. Avei ndorojepyʼapyvéima umi mbaʼeretáre, rohechakuaa umíva naiñimportanteguasuiha”.

 Elsebeth ohechakuaa tekotevẽha oaprende ótro idióma. ¿Mbaʼérepa? Ikongregasión territóriope opyta pe puévlo hérava Karasjok ha upépe oiko hetaiterei Sami. Haʼekuéra oiko Noruega, Suecia, Finlandia ha Rúsiape. Ikatu hag̃uáicha opredika chupekuéra, Elsebeth oñehaʼã oaprende umi Sami idióma ha koʼág̃a ikatúma oñemongetaʼimi hendivekuéra iñeʼẽtépe. ¿Mbaʼéichapa oho chupe upe territóriope? Vyʼápe haʼe omombeʼu: “Aguereko seis estúdio vívliko upe idiómape ha ni napensái ahávo ótro lugárpe”.

Fabian avei koʼág̃a prekursór ha siérvo ministeriál ikongregasiónpe. Haʼe ha Isabel oipytyvõ mokõi ermaníto ha peteĩ ermanítape ombaʼapo kyreʼỹ hag̃ua kongregasiónpe, ha koʼág̃a mbohapyvéva osẽ meme opredika. Umíva apytégui mokõi ojevautisa ha ojapo iprekursorádo auxiliár marzo 2012-pe. Pe ermaníta oagradeseterei Isabel ha Fabiánpe oipytyvõ haguére chupe. Fabian heʼi: “Umi mbaʼe heʼíva opokoiterei cherehe ha ahechakuaa mbaʼeichaitépa ñañeñandu porã ñaipytyvõvo ñande rapichakuérape”. Isabel katu omombeʼu: “Ko territóriope ahechakuaa mbaʼéichapa oñekumpli Salmo 34:8 heʼíva: ‘Peñehaʼã ha pehecháta Jehová ipyʼaporãha’. ¡Avyʼaiterei aservi haguére ko lugárpe!”.

Marelius ha Kesia koʼág̃a oreko umi mbaʼe oikotevẽmívante ha oho porã chupekuéra. Pór ehémplo, pe kongregasión ova haguépe Áltape koʼág̃a oĩma 41 maranduhára. Marelius heʼi: “Ropensávo umi mbaʼe rojapovaʼekuére, rovyʼaiterei rohechávo tuichaiterei rokambia hague. Roagradese Jehovápe ikatu haguére roservi de prekursór ko lugárpe. ¡Ndaipóri orembovyʼavéva upévagui!”. Kesia katu heʼi: “Koʼág̃a ajerovia Jehováre che pyʼaite guive, haʼe akóinte mborayhúpe oñangareko orerehe. Ahechakuaa avei aikóvo mombyry che familiakuéragui amombaʼeveha pe tiémpo rohasáva jepi hendivekuéra. ¡Ni michĩmi nambyasýi rodesidi haguére roju roservi ko lugárpe!”.

¿Mbaʼéichapa oñeñandu Knut ha Lisbeth Ugándape? Knut heʼi: “Ñepyrũrã ijetuʼu oréve rojepokuaa upe lugár ha ikostumbrekuérare. Sapyʼánte orerasy orepyʼápe, ndaipóri y térã elektrisida, péro roreko hetaiterei estúdio vívliko.” Lisbeth heʼi: “Ag̃uiete pe roikohágui oĩ umi território neʼĩraha gueteri ojepredika. Rohórõ guare ropredika upe lugárpe, rohechakuaa umi hénte oleeha la Biblia ha ojerure oréve romboʼemi hag̃ua chupekuéra. Ndaikuaái voi mbaʼéichapa amombeʼúta rovyʼaitereiha romboʼévo la Biblia koʼã ore rapicha ipyʼaporãitévape”.

Ñande Ruvicha Jesucristo ovyʼaiterei yvága guive ohechávo mbaʼéichapa koʼág̃a ojejapo opárupi pe tembiapo haʼe voi omoñepyrũvaʼekue. Jehová rembiguaikuéra ovyʼaiterei kyreʼỹme ojapóvo Jesús omandavaʼekue: “Tapeho pemboʼe umi hénte opa tetãyguápe oiko hag̃ua chuguikuéra che remimboʼe” (Mat. 28:19, 20, NM).