1. ¿Mbaʼépa ombovyʼaiterei Páblope?

ÁÑO 55-pe, apóstol Pablo ohendu umi ermáno Corintoygua oiko vaiha oñondive. Haʼe ningo ohayhueterei chupekuéra peteĩ túva ohayhuháicha ifamília, ha upévare ohai peteĩ kárta oñemoñeʼẽ hag̃ua umi kristiáno upepeguápe (1 Cor. 1:11; 4:15). Pablo ojerurékuri avei iñirũ Títope ovisitami hag̃ua koʼã ermánope ha upéi ojotopa hag̃ua hendive Tróaspe. Haʼe oipota Tito omombeʼu chupe mbaʼéichapa oiko hikuái. Tiémpo rire, Pablo ohaʼarõ gueteri chupe upépe. Ojepyʼapyeterei ha oikuaaséma mbaʼéichapa oĩ umi ermáno Corintoygua. Péro Tito nog̃uahẽi. ¿Mbaʼépa ojapo upémarõ Pablo? Ojupi peteĩ várkope ha osẽ oho Macedóniape. Ovyʼaiterei upe riremi ojotopávo Tito ndive upépe. Tito omombeʼu Páblope umi ermáno Corintoygua osegi hague umi konsého omeʼẽvaʼekue chupekuéra ikuatiañeʼẽme. Ha heʼi avei umi ermáno ohechasetereimaha chupe. Pablo ‘koʼýte ovyʼa’ ohendúvo koʼã mbaʼe (2 Cor. 2:12, 13; 7:5-9, NM).

2. a) ¿Mbaʼépa Pablo heʼi umi ermáno Corintoyguápe? b) ¿Mbaʼépa ñambohováita?

² Upe riremi, Pablo ohai umi kristiáno Corintoyguápe ikuatiañeʼẽ mokõiha, ha heʼi: “Che ningo ndaʼéi ore romandaha pende jeroviáre, upéva rangue ore rombaʼapo pende ykére peẽ pevyʼa hag̃ua. Ha pejerovia rupi pejepytaso mbarete hína” (2 Cor. 1:24, NM). ¿Mbaʼépa heʼise raʼe Pablo upérõ guare? ¿Mbaʼépa ikatu oaprende umi ansiáno koʼag̃agua apóstol Pablo heʼivaʼekuégui?

3. a) ¿Mbaʼépa Pablo heʼisevaʼekue ohaírõ guare: “Pejerovia rupi pejepytaso mbarete hína”? b) ¿Mbaʼéichapa osegi Pablo ehémplo umi ansiáno koʼag̃agua?

³ Pablo oñeʼẽvaʼekue mokõi mbaʼe ñaikotevẽvare  ikatu hag̃uáicha jaservi porã Jehovápe: jajerovia ha javyʼa. Haʼe heʼi pe jeroviáre: “Che ningo ndaʼéi ore romandaha pende jeroviáre, [...] pejerovia rupi pejepytaso mbarete hína”. Pablo ohechakuaa umi kristiáno Corintoygua iñeʼẽrenduha ojeroviágui Ñandejárare, ndahaʼéi haʼe térã ótro ermáno oipytyvõ haguérente chupekuéra. Haʼe opensa natekotevẽiha okontrola oimépa umi ermáno ojerovia, ha ndojaposéi voi upéva. Oikuaa porã haʼekuéra ijeheguieténte ojaposeha iporãva (2 Cor. 2:3). Umi ansiáno koʼag̃agua osegi avei Pablo ehémplo. Ndoikói odeskonfia umi ermánogui ha opensa mbaʼérepa oiméne oservi Jehovápe, térã ijerovia kangyha hikuái (2 Tes. 3:4). Oiko rangue omoĩ rrégla ijetuʼúva kongregasiónpe, haʼekuéra ojapo Ñandejára Ñeʼẽ heʼíva ha osegi umi konsého omeʼẽva Jehová organisasión. Amo ipahápe, umi ansiáno koʼag̃agua nomandái umi ermáno jeroviáre (1 Ped. 5:2, 3).

4. a) ¿Mbaʼépa Pablo heʼisevaʼekue ohaírõ guare: “Ore rombaʼapo pende ykére peẽ pevyʼa hag̃ua”? b) Ojapo haguéicha Pablo, ¿mbaʼépa ojapose avei umi ansiáno koʼag̃agua?

⁴ Pablo ohai avei: “Rombaʼapo pende ykére peẽ pevyʼa hag̃ua”. Koʼápe katu haʼe imanduʼa umi ombaʼapo memévare hendive. ¿Mbaʼérepa jaʼe upéva? Ko kuatiañeʼẽme Pablo oñeʼẽ mokõi ermáno oipytyvõvare chupe. Haʼe heʼi: “Silvano, Timoteo ha che roikuaauka kuri peẽme [...] Jesúspe” (2 Cor. 1:19, NM). Avei, ohaívo rombaʼapo pende ykére, imanduʼa ambue ermanokuéra oĩ memévare hendive, pór ehémplo, Apolos, Áquila, Prisca, Timoteo térã Títore (Rom. 16:3, 21; 1 Cor. 3:6-9; 2 Cor. 8:23). Pablo heʼírõ guare “rombaʼapo pende ykére peẽ pevyʼa hag̃ua”, oikuaauka umi ermáno Corintoyguápe haʼe ha iñirũnguéra ojaposeha ikatúva guive opavave ermáno kongregasiongua ovyʼave hag̃ua. Umi ansiáno koʼag̃agua avei ojapose opa ikatúva oipytyvõ hag̃ua ermanokuérape ikatu hag̃uáicha “vyʼapópe” oservi Jehovápe (Sal. 100:2; Filip. 1:25, NM).

5. ¿Mbaʼépa ñahesaʼỹijóta ko artíkulope, ha mbaʼe rehépa jajepyʼamongetavaʼerã?

⁵ Ndaʼaréi oñeporandu heta ermáno opredika kyreʼỹvape: “¿Mbaʼéichapa peteĩ ansiáno nepytyvõ umi mbaʼe heʼi térã ojapóva rupive revyʼave hag̃ua?”. Jahechamína mbaʼépa ombohovái hikuái ha ñapensa mbaʼéichapa ñande ñambohovaivaʼerãmoʼã upe porandu. Ikatu avei opavave jajepyʼamongeta jahecha hag̃ua mbaʼépa jajapovaʼerã ikatu hag̃uáicha umi ermáno ñane kongregasiongua ovyʼave. *

6, 7. a) ¿Mbaʼéichapa umi ansiáno ikatu osegi Jesús, Pablo ha ambue Ñandejára siérvo ehémplo? b) ¿Mbaʼérepa ovyʼave umi ermáno ñahenóiramo chupekuéra hérare?

⁶ Heta ermáno heʼi ovyʼaveha umi ansiáno oñeinteresáramo hesekuéra ipyʼaite guive. Ansianokuéra ikatu ohechauka oñeinteresaha umi ermánore osegírõ umi ehémplo omoĩvaʼekue David, Elihú ha Jesús (elee 2 Samuel 9:6; Job 33:1 ha Lucas 19:5). Koʼã mbohapy kuimbaʼe ohenói hapichakuérape hérarupi. Apóstol Páblope g̃uarã iñimportánte vaʼekue avei imanduʼa ha oiporu umi ermáno réra. Omohuʼãvo pe kárta omondovaʼekue umi Romayguápe, haʼe imanduʼa veinticinco rasa ermáno ha ermána rérare. Pór ehémplo heʼi: “Salúdo Pérsidape, ñane ermána jahayhuetéva” (Rom. 16:3-15, NM).

⁷ Oĩ ansiáno ndaikatúiva imanduʼapa  umi ermáno ikongregasiongua rérare. Péro oñehaʼãmbaitéramo ojapo upéva, haʼete ku heʼíva káda únope: “Nde ningo neimportantehína chéve g̃uarã” (Éx. 33:17). Ansianokuéra oipytyvõitereíta umi ermánope ovyʼave hag̃ua oiporúramo héra omeʼẽ jave chupekuéra komentário oñehesaʼỹijo jave Ñemañaha térã oimeraẽ rreuniónpe (embojoja Juan 10:3 rehe).

8. ¿Mbaʼéichapa Pablo osegi Jehová ha Jesús ehémplo?

⁸ Ikatu avei ñaipytyvõ ñane ermanokuérape ovyʼave hag̃ua ñamokyreʼỹramo chupekuéra ñande pyʼaite guive. Apóstol Pablo ojapovaʼekue upéva. Ikuatiañeʼẽ mokõiha ohaivaʼekuépe umi Corintoyguápe heʼi: “Areko heta mbaʼe cheaguara hag̃ua pendereheve” (2 Cor. 7:4, NM). ¡Mbaʼeichaitépa oiméne ovyʼáraʼe umi ermáno ohendúvo Pablo heʼivaʼekue! Haʼe omokyreʼỹ avei upéicha ambue kongregasionkuérape (Rom. 1:8; Filip. 1:3-5; 1 Tes. 1:8). Imanduʼa rire Pérsida rehe pe kárta ohaivaʼekuépe umi Romayguápe, Pablo heʼi hese: “Haʼe heta ombaʼapo ñande Ruvicha rehehápe” (Rom. 16:12, NM). ¡Oiméne ovyʼaitéraʼe ko ermána! Omokyreʼỹvo iñermanokuérape, Pablo osegi Jehová ha Jesús ehémplo (elee Marcos 1:9-11 ha Juan 1:47; Rev. 2:2, 13, 19).

9. ¿Mbaʼérepa javyʼave ñane ermanokuéra apytépe ñaporomokyreʼỹramo térã oĩramo ñanemokyreʼỹva?

⁹ Umi ansiáno koʼag̃agua ohechakuaa iñimportanteha heʼi entéro ermánope mbaʼeichaitépa oguerohory chupekuéra (Prov. 3:27; 15:23). Ojapóvo upéva, haʼete ku heʼíva: “Ahechakuaa upe rejapóva añeinteresa rupi nderehe”. Añetehápe, ñane ermanokuéra oikotevẽ umi ansiáno omokyreʼỹ chupekuéra. Pór ehémplo, peteĩ ermána orekóva 55 áño rupi opensa heta ermáno opensaháicha. Haʼe heʼi: “Ñande travahohápe ningo avave nañanemokyreʼỹi jajapo porã haguére peteĩ mbaʼe. Ndaipóri ojepyʼapýva ñanderehe ha opavavénte oñoganagana. Upévare avyʼaiterei peteĩ ansiáno oguerohorýramo umi mbaʼe ajapóva kongregasiónpe. ¡Chemombareteterei upéva! Péicha jave añandu mbaʼeichaitépa che Ru yvagaygua cherayhu”. Ndaʼareiete, peteĩ ansiáno omokyreʼỹ peteĩ ermáno omongakuaávape haʼeño mokõi ifamíliape. ¿Mbaʼéichapa oñeñandu ko ermáno? Haʼe omombeʼu: “Umi mbaʼe heʼíva chéve haʼete voi chemopuʼã jeýva”. Ansianokuéra heʼíva ikatu tuicha omokyreʼỹ umi ermánope ha oipytyvõ chupekuéra ovyʼave hag̃ua oservívo Jehovápe. Upéicha, haʼekuéra imbareteve osegi hag̃ua kaneʼõʼỹre Ñandejára rapére (Is. 40:31).

10, 11. a) ¿Mbaʼéichapa ansianokuéra ikatu osegi Nehemías ehémplo? b) ¿Mbaʼépa oipytyvõta umi ansiánope omeʼẽ hag̃ua “peteĩ rregálo oúva Ñandejáragui” ojapo jave visíta de pastoréo?

¹⁰ ¿Mbaʼéichapa avei ansianokuéra ikatu ohechauka oñeinteresaha umi ermánore ha oipytyvõ chupekuéra ovyʼave hag̃ua? Haʼekuéra voi oñemotenondevaʼerã omokyreʼỹ hag̃ua umi oikotevẽvape (elee Hechos 20:28). Ojapóvo upéicha, ohaʼanga umi ansiáno yma guarépe. Pór ehémplo, Ñandejára Ñeʼẽ heʼi Nehemías opuʼã ha omokyreʼỹ hague iñermanokuéra hudíope, ohechakuaárõ guare oĩha ikangýva ijapytepekuéra (Neh. 4:14). Umi ansiáno koʼag̃agua ojapo avei upeichaite. Haʼekuéra voi oheka umi ermánope omombarete hag̃ua ijerovia. Upévare, ikatúma guive, ovisita chupekuéra hógape omeʼẽ hag̃ua chupekuéra  “peteĩ rregálo oúva Ñandejáragui” (Rom. 1:11, NM). ¿Mbaʼéichapa ansianokuéra oipytyvõ umi ermánope ojapo jave visíta de pastoréo?

¹¹ Ojapo mboyve peteĩ visíta de pastoréo, umi ansiáno tekotevẽ oñemotiémpo opensa hag̃ua upe ermánore ha oprepara umi mbaʼe heʼítava chupe. Pór ehémplo oñeporandukuaa: “¿Mbaʼe provlémapa ohasahína ko ermáno? ¿Mbaʼépa haʼekuaa ikatu hag̃uáicha amokyreʼỹ chupe? ¿Mbaʼe téxtopa oipytyvõta chupe? ¿Oĩpa la Bíbliape peteĩ ehémplo omombeʼúva Ñandejára siérvo ohasa hague avei peichagua situasión rehe?”. Ansianokuéra opensáramo umi ermánore ovisita mboyve chupekuéra, noñeʼẽmoʼãi umi mbaʼe naiñimportanteguasúivare, síno heʼíta heta mbaʼe katuete oipytyvõtava chupekuéra. Koʼã visíta aja, ansianokuéra oheja umi ermáno oñeʼẽ ha ohendu porã chupekuéra (Sant. 1:19). Peteĩ ermána heʼi: “¡Ñañeñandu porãiterei ningo peteĩ ansiáno ojapysaka porãramo ñanderehe!” (Luc. 8:18).

12. ¿Mávapa oikotevẽ avei oñemokyreʼỹ chupe, ha mbaʼérepa?

¹² ¿Máva mávapa oikotevẽ peteĩ visíta de pastoréo? Pablo heʼi ansianokuérape: “Peñatendéke [...] entéro ovecha atýre”. Upéicharõ, opavave ermáno oĩva kongregasiónpe oikotevẽ oñemokyreʼỹ chupe, tahaʼe puvlikadór térã prekursór heta tiémporema opredikáva. ¿Mbaʼérepa koʼã ermáno ijerovia mbaretéva ha iñeʼẽrendúva oikotevẽ umi ansiáno omokyreʼỹ chupekuéra? Sapyʼánte oñandu avei hikuái nomeʼẽveimaha ko múndo aña ojopyeterei rupi chupekuéra. Peteĩ mbaʼe rréi David ohasavaʼekue ohechauka mbaʼérepa umi Ñandejára siérvo iñeʼẽrendúva jepe oikotevẽ jepi ótro oipytyvõ chupe.

13. a) ¿Mbaʼépa oaprovecha Isbí-benob oataka hag̃ua Davídpe? b) ¿Mbaʼéicha rupípa Abisai oipytyvõ Davídpe oikotevẽve jave?

¹³ Ojeporavo riremi Davídpe Israel rreirã, haʼe osẽ oñorairõ hag̃ua Goliat ndive,  peteĩ higánte oúva umi rrefaím ñemoñarégui. David ohechauka ipyʼaguasuha ha ojuka chupe (1 Sam. 17:4, 48-51; 1 Crón. 20:5, 8). Tiémpo rire, umi Israelgua oñorairõramo guare umi filistéo ndive, David ojotopa jey ótro higántendi oúva avei umi rrefaímgui. Ko kuimbaʼe héra Isbí-benob (2 Sam. 21:16; nóta). Péro ko kuimbaʼe haimete ojuka Davídpe. ¿Mbaʼérepa? Ndahaʼéi ndaipyʼaguasuvéi haguére, síno “David ikaneʼõiterei” rupi. La Biblia heʼi Isbí-benob ohechakuaa hague upéva ha oho ojuka hag̃uáicha chupe. Péro upe javete “Abisai, Zeruyá memby, oho oipytyvõ Davídpe, ondyry pe filistéore ha ojuka chupe” (2 Sam. 21:15-17). Abisai oñangareko David rehe ha osalva chupe ojeapeligrárõ guare. ¡Mbaʼeichaitépa oiméne David oagradese chupe! ¿Mbaʼépa ikatu ñaaprende ko ehémplogui?

14. a) ¿Mbaʼéichapa ikatu jagueropuʼaka umi provléma tuicháva? b) ¿Mbaʼéichapa umi ansiáno ikatu ñanepytyvõ javyʼa ha ñanembarete jey hag̃ua? Emoĩ peteĩ ehémplo.

¹⁴ Ñande testígo de Jehová japredika meme ko Yvy tuichakuére, jepe Satanás ha umi omoirũva chupe ñandejokose. Katuete oĩ ñande apytépe ohasámava umi provléma tuichaitereíva, David ohasa haguéicha ombohováivo Goliátpe. Péro jajerovia rupi Jehováre ñande pyʼaite guive, jagueropuʼaka opa koʼã mbaʼe. Upéicharamo jepe, ko múndo akóinte ñandejopy ha sapyʼánte ñanekaneʼõ ha jaju ñanekangy. Ñañeñandu jave upéicha, umi provléma jepive ñambohovái porãva jepe ikatu ñandereity. Péro umi ansiáno ñanepytyvõkuaa javyʼa ha ñanembarete jey hag̃ua. Peteĩ prekursóra orekóva 65 áño rupi heʼi: “Ndaʼareguasúi, nachekyreʼỹvéi ha chemokaneʼõiterei pe predikasión. Peteĩ ansiáno ohechakuaa upéva ha oñemboja cherendápe. Roñemongeta peteĩ téxto oĩvare la Bíbliape ha chekyreʼỹ jey apytávo. Asegi umi konsého omeʼẽvaʼekue chéve ha asẽ porã. ¡Aagradesete ningo pe ermáno ohechakuaa haguére mbaʼépa ojehu chéve ha chepytyvõ rupi!”. Ajépa javyʼaite jaikuaávo umi ansiáno oñangarekoha ñanderehe ha oĩha ñanepytyvõ hag̃uáicha, ojapo haguéicha Abisai David rehe.

15, 16. a) ¿Mbaʼérepa ohayhuetereivaʼekue apóstol Páblope umi ermáno? b) ¿Mbaʼérepa ñande jahayhueterei avei ansianokuérape?

¹⁵ Umi ansiáno ombaʼapo jejopy oñangareko hag̃ua Jehová ovechakuérare. Sapyʼánte ndokéi pyharekue ojepyʼapýgui umi ermánore, ha opuʼã jepi oñemboʼe hesekuéra térã oipytyvõ hag̃ua chupekuéra (2 Cor. 11:27, 28). Upéicharõ jepe, vyʼápe ha hekoitépe okumpli irresponsavilida. Apóstol Pablo péicha vaʼekue avei. Haʼe heʼi umi kristiáno Corintoyguápe: “Che ningo vyʼápe [...] añemeʼẽmbaitéta penderehehápe” (2 Cor. 12:15, NM). Haʼe ohayhuetereivaʼekue umi ermánope, upévare oñemeʼẽmbaite hesehapekuéra ikatu hag̃uáicha omokyreʼỹ chupekuéra (elee 2 Corintios 2:4; Filip. 2:17; 1 Tes. 2:8). ¡Ndareíri ningo umi ermáno ohayhuetéraʼe chupe! (Hech. 20:31-38.)

¹⁶ Ñande avei jahayhueterei ansianokuérape, ha ñañemboʼe jave Jehovápe, jaagradese chupe oiporu haguére koʼã kuimbaʼépe ñanepytyvõ hag̃ua. Haʼekuéra ohechauka oñeinteresaha ñanderehe ha upéva koʼýte ñanembovyʼa. Ñandevisita jave hikuái japyta ñanembareteve. Ha ñañandúramo nañameʼẽveimaha jagueropuʼaka hag̃ua umi mbaʼe ijetuʼúva, jaagradeseterei oñangarekógui ñanderehe ha oĩgui hikuái ñanepytyvõ hag̃uáicha. Añetehápe, haʼekuéra ‘ombaʼapo ñande ykére javyʼa hag̃ua’.