1, 2. ¿Mbaʼérepa tekotevẽ rejepyʼamongeta porã reikuaa hag̃ua ikatúpa reporoperdona?

 LA Biblia omombeʼu mbaʼéichapa Jehová ohecha pe pekádo ha mbaʼéichapa oñeñandu japeka jave. Avei ohechauka mbaʼéichapa haʼe oporoperdona. Pe artíkulo ohasavaʼekuépe jahechákuri Jehová oiporiahuvereko hague David ha Manaséspe. Haʼekuéra ombyasyeterei ojapovaʼekue ha orrekonose ojavy hague. Avei omboyke hembiapo vaikue ha oñearrepenti ipyʼaite guive. Upéicha rupi Jehová oñemoag̃ui jey hesekuéra.

² Jahechamína koʼág̃a mbaʼéichapa ñande ikatu ñaporoperdona. Epensamína: Manasés ojapovaʼekue heta mbaʼe ivaietereíva, ¿mbaʼéichapa nde reñeñandúne oimérire operhudika peteĩ ne héntepe? ¿Ikatútapa reperdona chupe? Iñimportánte jajepyʼamongeta koʼã porandúre. Koʼág̃a rupi umi hénte iviolénto, opensa ijehénte ha ndorrespetái umi léi. Upéicharõ, ¿mbaʼérepa kristianokuéra oñehaʼãvaʼerã oporoperdona? Oĩramo ojapóva nderehe peteĩ mbaʼe hendapeʼỹ, ¿mbaʼépa nepytyvõta rejejokokuaa, rembohovái hag̃ua pe provléma ha reporoperdona hag̃ua Jehová oipotaháicha?

3-5. a) ¿Mbaʼe ehémplopa omoĩ Jesús ohechauka hag̃ua iñimportanteha ñaporoperdona? b) ¿Mbaʼépa ñanemboʼe Mateo 18:21-35?

³ Ñañehaʼãramo ñaperdona, tahaʼe ñane ermánope téra ambuépe, ikatúta jaiko porã ñande rogayguándi, ñane amigokuéra, entéro ñande rapichándi ha Jehová ndive. Avei la Biblia heʼi opavave kristiáno oporoperdonavaʼerãha katuete, hapichakuéra ofalla meméramo jepe hendive. Jesús omoĩ peteĩ ehémplo ohechauka hag̃ua iñimportanteha ñaporoperdona.  Upérõ haʼe oñeʼẽkuri peteĩ tembiguái odeve hetávare.

⁴ Pe tembiguái odeve ipatrónpe 60 millón de denário. Upe tiémpope ojepaga 1 denário káda día de traváhore. Péro pe karai oheja rei chupe ikuénta. Upéi pe tembiguái ojotopa ótro esklávondi odevéva chupe 100 día repykue. Pe esklávo ojerure asy ipasiensiami hag̃ua hese, péro haʼe oguerahauka chupe kárselpe. Upéva ombopochyeterei ipatrónpe ha oporandu chupe: “¿Ndaikatúi piko nde avei reiporiahuverekomi nde rapichápe, che roiporiahuvereko haguéicha?”. Pe patrón “ipochyeterei hese, ha omeʼẽ umi guárdiape ogueraha hag̃ua chupe kárselpe opagapa peve upe odevéva” (Mat. 18:21-34, NM).

⁵ ¿Mbaʼépa Jesús ñanemboʼese ko ehémplo rupive? Haʼe voi heʼi: “Péicha avei ojapóta penderehe che Ru yvagapegua napeperdonáiramo pende pyʼaite guive pene ermánope” (Mat. 18:35, NM). Hesakã porãiterei ningo pe heʼíva. Ñande ñaneimperfékto ha jajapo heta mbaʼe vai jaikove aja pukukue. Upéva ohechauka ndaikatuiha ñakumpli hekoitépe Ñandejára ojeruréva. Upéicharõ jepe, Jehová ñaneperdona ha ñandeguerohory jey. Upévare, oimeraẽ oikoséva Ñandejára amígoramo, operdonámante vaʼerã hapichakuérape. Jesús heʼivaʼekue pe Sermón del Móntepe: “Peperdonáramo pende rapichápe hembiapo vaikue, pende Ru yvagapegua operdonáta avei peẽme pene rembiapo vaikue. Péro napeperdonáiramo pende rapichápe hembiapo vaikue, pende Ru yvagapegua noperdonamoʼãi avei peẽme pene rembiapo vaikue” (Mat. 6:14, 15, NM).

6. ¿Mbaʼérepa sapyʼánte hasy ñaporoperdona hag̃ua?

⁶ Jahecha rire ko ehémplo ikatu ñapensa: “Jaʼénte ningo ndahasýi”. ¿Mbaʼérepa ikatu ñañeñandu upéicha? Sapyʼánte oĩ ofalláva ñanendive ha upéva oguapyeterei ñanderehe. Upéicha rupi ikatu ñandepochy, ñaimoʼã ñañetraisionaha ha jaipota ojejapo hustísia térã pe  ofalláva opaga hembiapo vaikuére. Oĩ voi opensáva arakaʼeve ndaikatumoʼãiha operdona pe ofallavaʼekuépe. Oiméramo reñeñandu upéicha, ¿mbaʼépa ikatu nepytyvõ reporoperdona hag̃ua Jehová oipotaháicha?

7, 8. ¿Mbaʼépa nepytyvõta reporoperdona hag̃ua oĩramo nembopochýva?

⁷ Sapyʼánte oĩ ofalláva ñanendive térã ñandénte jajagarra vai pe ojejapovaʼekue, upéicha jave ikatu ñañeñandu vaieterei japytávo. Peteĩ estúdio ojejapovaʼekuépe, peteĩ mitãkariaʼy omombeʼu mbaʼéichapa oñeñandu ipochy jave: “Peteĩ vuéltape [...] rojodiskuti vai ógape ha asẽ ahapa hese, ha haʼe voi ndajevymoʼãveimaha arakaʼeve. Upéva oiko veránope, peteĩ día neporãvape. Chemanduʼa aha hague aguata peteĩ lugár iporãitereívare, ha mbeguekatúpe chepyʼaguapy. Upe rire ambyasy pe ajapovaʼekue ha trankílo porãnte aha jey ógape”. Ko ehémplo ohechauka jajejokovaʼerãha ha jahecha raẽ mbaʼépa añetehápe oikóraʼe. Péicha ndajajapomoʼãi peteĩ mbaʼe ñambyasýtava upe rire (Sal. 4:4; Prov. 14:29; Sant. 1:19, 20).

⁸ Péro, ¿mbaʼépa ikatu rejapo ndepyʼaróramo gueteri? Rehechavaʼerã mbaʼérepa reñeñandu vai. Epensamína: ¿Ndepochýpa rejetrata vai haguére? ¿Repensápa nemoñeñandu vaise hague voi? ¿Ivaietereípa pe ojejapóva nderehe? Rehechakuaáramo mbaʼérepa ndepochy, reikuaáta mbaʼe konsého oĩva la Bíbliapepa ikatu nepytyvõ anivéma hag̃ua reñeñandu upéicha (elee Proverbios 15:28 ha 17:27). Rejapóramo upéva rehechakuaáta mbaʼépa añetehápe oikókuri ha ndahasymoʼãi ndéve reperdona hag̃ua. Ñepyrũrã ikatu ijetuʼu ndéve, péro reñehaʼãramo, Ñandejára Ñeʼẽ ‘ikatúta ohechauka umi mbaʼe repensáva ha reguerekóva ne korasõme’. Avei nemomýita reporoperdona hag̃ua Jehová ojapoháicha (Heb. 4:12, NM).

9, 10. a) ¿Mbaʼépa ikatu rejapo oĩramo nembopochýva? b) ¿Mbaʼéichapa tuicha nepytyvõta nerepensavaíriramo nde rapicháre ha reporoperdonakuaárõ?

⁹ Enterovéva jahasa jepi heta mbaʼe ñanembopochýva. Pór ehémplo, epensami remanehaha rehóvo nde veíkulo ha peichahágui osẽ ndéve ótro veíkulo ha haimete ochoka nderehe. ¿Mbaʼépa rejapóta? Katuete rehendúmane oĩha chofér ipochyetereíva ha osẽva ojahéi vaipaite hapicháre. Péro jaikuaaháicha, peteĩ kristiáno ndojapomoʼãi upéva.

¹⁰ Oikóramo nderehe upéicha, ikuentave reñetrankilisa porã ha epensa mbaʼépa oikókuri. Ikatu nde voi nereñatendéiraʼe, térã pe ótrogui oñembyai iveíkulo. Ko ehémplo ñanemboʼe iñimportanteha ñantende ñande rapichápe, ñarrekonose ndajaikuaaiha mbaʼérepa oiko umi provléma ha ñaimevaʼerãha ñaporoperdona hag̃uáicha. Péva ñanepytyvõta anive hag̃ua ñandepochy térã ñañeñandu vai. Eclesiastés 7:9 heʼi: “Aníke ndepochy pyaʼeterei; pe pochy ningo oiko umi ivýrova angapýpe” (ÑÑB). Ani rejagarrapa ndejehe ojejapóva guive. Heta vése ñande rapichakuéra ojavy ndahaʼéi katuete ojaposégui, síno iñimperfékto rupi térã ñandénte jajagarra vai. Nemanduʼavaʼerã ndereikuaaiha opa mbaʼe oikóva, upévare ani repensa vai katuete umi mbaʼe ojeʼe térã ojejapóvare. Rehechaukavaʼerã reporohayhuha reperdonávo nde rapichápe, ha upéva nembovyʼaitereíta (elee 1 Pedro 4:8).

11. ¿Mbaʼépa rejapovaʼerã oĩramo ndetrata vaíva predikasiónpe?

¹¹ ¿Mbaʼéichapa rejejokokuaa oĩrõ ndetrata vaíva predikasiónpe? Jesús omondórõ guare umi 70 hemimboʼe opredika hag̃ua, heʼi: “Oĩramo upépe peteĩ ohayhúva pyʼaguapy, pende pyʼaguapy opytáta hendive. Péro ndaipóriramo, oho jeýta penendive” (Luc. 10:1, 5, 6, NM.) Javyʼa oĩ jave ñanerendu porãva predikasiónpe jaikuaágui pe mensáhe ikatuha oipytyvõ chupe. Péro sapyʼánte oĩ ijarhélva ñandéve. ¿Mbaʼépa rejapóta oikóramo nderehe upéva? Jesús heʼivaʼekue ‘pe pyʼaguapy oho jeytaha ñanendive’. Eñehaʼãkena eñetrankilisa oĩramo jepe ndetrata vaíva. Reñemoĩramo rejediskuti umichagua ndive, katuete ndepochyvéta ha nandepyʼaguapymoʼãi.

12. Heʼi haguéicha Pablo Efesios 4:31, 32-pe, ¿mbaʼépa jajapovaʼerã?

¹² Reñehaʼãvaʼerã reiko porã opavavéndi, tahaʼe predikasiónpe térã oimehápe. Iporã ningo akóinte reime reporoperdona hag̃uáicha, péro upéva ndeʼiséi reheja rei vaʼerãha opa mbaʼe vai ojejapóva, térã repensa vyroreinteha upéva, oporoperhudikaʼimírõ jepe. Reperdonakuaáramo nderepytamoʼãi ndepyʼaro pe ofallavaʼekuéndi ha reñehaʼãmbaitéta ndepyʼaguapy hag̃ua. Oĩ ningo opensa meméva umi mbaʼe vai ojejapóvare hese ha ndovyʼavéi opytávo. Aníkena reheja oiko nderehe upéva. Nemanduʼákena reñeñandu vaivetaha ndepyʼaróramo. Upévare, reñehaʼãmbaitevaʼerã reporoperdonakuaa (elee Efesios 4:31, 32.)

13. a) ¿Mbaʼéichapa peteĩ kristiáno ikatu omoĩ “tatapỹi” ‘iñenemígo’ akã ári? b) ¿Mbaʼépa ikatu oiko retrata porãramo peteĩ ijarhélvape?

¹³ Sapyʼánte peteĩ tapicha ndetrata vai vaʼekue ikatu okambia ha oñepyrũ ohayhu umi mbaʼe omboʼéva Ñandejára Ñeʼẽ. Apóstol Pablo ohai: “‘Ne enemígo iñembyahýiramo, emongaru chupe; ijyʼuhéiramo, emboyʼu. Péicha rejapóvo remoĩta hína tatapỹi iñakã ári’. Ani reheja pe ivaíva ipuʼaka nderehe, síno akóinte ndepuʼakavaʼerã ivaívare iporãvape” (Rom. 12:20, 21, NM). Peteĩ tapicha ijarhélramo jepe ndéve, reñehaʼãvaʼerã nderory chupe, upéicha ikatu okambia ha ohechauka orekoha avei mbaʼe porã ipyʼapýpe. Hiʼarive, reñehaʼãramo rentende ha reiporiahuvereko chupe, ikatu hína haʼe oñemoag̃ui Jehováre. Tahaʼe haʼeháicha, pe tapicha ikatu opensa mbaʼérepa retrata porã chupe, haʼe ijarhelramo jepe ndéve (1 Ped. 2:12; 3:16).

14. ¿Mbaʼérepa ndovaléi ñandepyʼaro avavéndi, tahaʼe haʼéva pe ojejapovaʼekue ñanderehe?

¹⁴ Oĩ avei umi tapicha ndovaléivare jajeheʼa. Pór ehémplo, oĩ hembiapo vai vaʼekue péro noñearrepentíri ha oñemosẽ kongregasióngui. Oimérire peteĩ upeichagua ofalláraʼe nendive, ikatu nanderesarái upe oikovaʼekuégui ha hasy ndéve reperdona hag̃ua, upéi oñearrepentíramo jepe. Ejerurékena Jehovápe tanepytyvõ reperdona hag̃ua chupe. Amo ipahápe, Jehovámante oikuaa mbaʼépa haʼe oreko ipyʼapýpe. Ñandejára ohesaʼỹijo ñane remiandu ha ipasiénsia umi opekavaʼekuére (Sal. 7:9; Prov. 17:3). Upévare la Biblia heʼi: “Ani pemyengovia ivaíva ivaívape. Peñehaʼã pejapo umi mbaʼe iporãva ha opavave oguerohorýva. Peñehaʼãmbaitékena peiko pyʼaguapýpe enterove pende rapichakuéra ndive. Ani peñevenga che ermanokuéra. Peheja guei Ñandejárape tohechauka ipochyha umi mbaʼe vai ojejapóvare. Ñandejára Ñeʼẽme ojehai voi:  ‘Che añevengáta ha amyengoviáta umi hembiapo vaívape, heʼi Jehová’” (Rom. 12:17-19, NM). Ñande ndaikatúi ñakondena avavépe (Mat. 7:1, 2). Jaikuaa porã ningo Jehová ojapotaha opa mbaʼe hendaitépe.

15. ¿Mbaʼe rehépa ñanemanduʼavaʼerã oĩ jave ofalláva ñanendive?

¹⁵ Oĩramo ojapóva peteĩ mbaʼe ivaíva nderehe ha hasy ndéve reperdona hag̃ua chupe oñearrepentíramo jepe, nemanduʼavaʼerã upe tapicha pekadorha avei ha ohasa asyha iñimperfékto rupi (Rom. 3:23). Jehová ningo ombyasy entéro yvypórape. Upévare iporã ñañemboʼe pe ofallávare, ha oiméramo jajapóma upéva, nañandepochymoʼãvéima hese. Jesús heʼivaʼekue ndovaleiha ñandepyʼaro umi ñandetrata vaíva ndive: “Akóintekena pehayhu umi penderayhuʼỹvape ha peñemboʼe umi pendepersegívare” (Mat. 5:44, NM).

16, 17. ¿Mbaʼépa nde rejapóta umi ansiáno heʼíramo pe ojavyvaʼekue oñearrepentiha, ha mbaʼérepa?

¹⁶ Jehová omeʼẽ umi ansiánope pe rresponsavilida oporohusga hag̃ua kongregasiónpe oĩramo ojapóva peteĩ mbaʼe ivaietereíva. Koʼã ermáno ningo ndaikatúi ohecha opa mbaʼe Jehová ohechaháicha, upéicharõ jepe odesidíta jave, oheja oisãmbyhy chupekuéra Ñandejára Ñeʼẽ ha ijespíritu sánto. Upévare jaʼekuaa Ñandejára oguerohoryha haʼekuéra odesidíva (Mat. 18:18).

¹⁷ Ko situasiónpe jahechaukavaʼerã ñaneñeʼẽrenduha. ¿Mbaʼépa nde rejapóta umi ansiáno heʼíramo pe ojavyvaʼekue oñearrepentiha? ¿Reperdona ha rehechaukátapa rehayhuha chupe? (2 Cor. 2:5-8.) Ikatu ningo hasy ndéve rejapo hag̃ua upéva, koʼýte pe ermáno ojapóramo peteĩ mbaʼe vai nderehe térã peteĩ ne héntere. Péro rejeroviáramo Jehováre ha umi mbaʼe haʼe odesidívare, reperdonáta opavavépe ha upéicha rehechaukáta nearanduha (Prov. 3:5, 6).

18. ¿Mbaʼépa rehupytýta reporoperdonáramo nde pyʼaite guive?

¹⁸ Umi doktór ohechakuaa ojapo porãha ñanderehe ñaporoperdonárõ. Pór ehémplo, ndajapytamoʼãi ñañembyasy térã ñanekangy. Ikatúta jaiko porã opavavéndi ha javyʼa. Péro ñandepyʼaróramo, ñanderasypáta, jaikóta jajepyʼapyháre, ñañemomombyrýta umi jahayhúvagui ha hasýta ñañemongeta hag̃ua ótro ndive. Umi oporoperdonáva katu oñemoag̃uive Jehováre, ha upéva peteĩ mbaʼe ijojahaʼỹva (elee Colosenses 3:12-14).