‘Ñahaʼarõ pe tekove tapia g̃uarã, Ñandejára ijapuʼỹva arakaʼeve, ymaite guive heʼivaʼekue omeʼẽtaha ñandéve.’ (TITO 1:2, JMP)

ÑANEMANDUʼA HAG̃UA

Mbaʼérepa jaʼekuaa ojevyʼaitereiha yvágape peteĩ unhído iñeʼẽrendúramo omano meve?

Mbaʼérepa jaʼekuaa umi unhído ohupytýramo pe ohaʼarõva, ambue ovechakuéra ohupytytaha avei ohaʼarõva?

Mbaʼérepa tekotevẽ ‘ñanderekomarangatu’ ha jahechauka ‘jahayhuha Ñandejárape’?

1. Mbaʼéichapa pe esperánsa Jehová omeʼẽva ñanepytyvõta jahasa jave umi mbaʼe vai?

 APÓSTOL Pablo ohai: “Pe esperánsa Ñandejára omeʼẽva tapenemyenyhẽ vyʼa ha pyʼaguapýgui pejerovia haguére, ha pene esperánsa tokakuaave ohóvo espíritu sánto puʼaka rupi” (Rom. 15:13, NM). Ñanemanduʼa meméramo umi mbaʼe Jehová oprometévare, javyʼa ha ñandepyʼaguapýta. Avei ikatúta ñambohovái oimeraẽ mbaʼe vai jahasáva. Oiméramo ñande unhído térã nahániri, pe esperánsa hína “peteĩ ánklaicha ñane ángape g̃uarã, mbaʼeve omomyiʼỹvaʼerã” (Heb. 6:18, 19, BNP). Jahasa jave umi mbaʼe ijetuʼuetereíva haʼetéva umi torménta, ñane esperánsa ñanepytyvõta ani hag̃ua ñandepyʼamokõi ha ikangy ñande jerovia (elee Hebreos 2:1 ha 6:11).

2. Mbaʼépa ohaʼarõ umi kristiáno oikóva koʼã ára pahápe, ha mbaʼérepa ojeroviakuaa avei ambue ovechakuéra?

² Mbaʼépa ohaʼarõ umi kristiáno oikóva koʼã ára pahápe? Ohaʼarõ mokõichagua esperánsa. Umi unhído térã “ovechakuéra mbovymi” oikóva gueteri ko yvy ape ári ohaʼarõ oho yvágape. Upépe haʼekuéra nomanomoʼãvéima ha oservíta rréi ha saserdóteramo Cristo ndive Irréinope (Luc. 12:32, NM; Rev. 5:9, 10). Ha pe “aty guasu” oĩhápe “ambue ovechakuéra” ohaʼarõ oiko opa árare ko yvy ape ári peteĩ lugár neporãmba jepévape Jesús goviérno poguýpe (Rev. 7:9, 10; Juan 10:16, NM). Haʼekuéra imanduʼavaʼerã tekotevẽha ombaʼapo kyreʼỹ Cristo ‘ermanokuéra’ ndive ojesalva hag̃ua (Mat. 25:34-40, NM). Umi unhído ningo katuete ohupytýta oñeprometevaʼekue chupekuéra, ha ambue ovechakuéra ojeroviakuaa avei oñemeʼẽtaha chupekuéra pe ohaʼarõva (elee Hebreos 11:39, 40). Ñahesaʼỹijomína ñepyrũrã mbaʼépa ohaʼarõ umi unhído.

 “ESPERÁNSA AÑETEGUÁVA” UMI UNHÍDOPE G̃UARÃ

3, 4. Mbaʼéichapa ‘onase pyahu jey’ umi unhído, ha mbaʼépa pe “esperánsa añeteguáva” ohaʼarõva hikuái?

³ Pedro ohai mokõi kuatiañeʼẽ umi unhídope ha heʼi Ñandejára “oiporavo” hague chupekuéra (1 Ped. 1:1, 2). Upépe omombeʼu mbaʼe mbaʼépa avei ohaʼarõ umi “ovechakuéra mbovymi”. Pór ehémplo, ikuatiañeʼẽ peteĩhápe ohai: “Toñemombaʼeguasu Ñandejára, Jesucristo Rúpe, haʼe iporiahuvereko rupi ñanase pyahu jey ha omeʼẽ ñandéve peteĩ esperánsa añeteguáva Jesucristo oñemoingove jey rupi omanóva apytégui. Upéicha ikatúta jahupyty pe erénsia ikatuʼỹva oñembyai, oñemongyʼa térã oñehundi. Upéva oñeñongatu yvágape peẽme g̃uarã ha Ñandejára ipuʼaka rupi oñangareko penderehe, pejeroviágui pehupytytaha pe salvasión oĩmava ojehechauka hag̃ua umi ára pahápe. Upéva rehe peẽ pevyʼapeína” (1 Ped. 1:3-6, NM ).

⁴ Jahechaháicha, umi kristiáno Jehová oiporavovaʼekue oisãmbyhy hag̃ua Cristo ndive yvágape, ‘onase pyahu jey’ oiko hag̃ua chuguikuéra Ñandejára raʼy. Chupekuéra ojeporavo espíritu sánto rupive oservi hag̃ua rréi ha saserdóteramo Cristo ndive (Rev. 20:6). Pedro heʼi haʼekuéra ‘onase pyahu jey’ rupi orekoha “peteĩ esperánsa añeteguáva”, pe “erénsia ikatuʼỹva oñembyai, oñemongyʼa térã oñehundi” oĩva chupekuéra g̃uarã “yvágape”. Ndareíri ‘ovyʼaite’ koʼã kristiáno! Péro ohupyty hag̃ua koʼã mbaʼe, akóinte iñeʼẽrenduvaʼerã hikuái.

5, 6. Mbaʼérepa umi unhído oñehaʼãvaʼerã opyta hatã ‘Ñandejára ohenói ha oiporavo haguépe’ chupekuéra?

⁵ Ikuatiañeʼẽ mokõihápe, Pedro oñemoñeʼẽ umi unhídope: “Peñehaʼã pepyta hatãve pehóvo ko teko pyahu [Ñandejára] penerenói ha pendeporavo haguépe” (2 Ped. 1:10, ÑÑB). Upévare, oñehaʼãvaʼerã ohechauka hikuái umi mbaʼe porã, pór ehémplo ojerovia mbarete, oporohayhu, omombaʼeguasu Jehovápe ipyʼaite guive ha oguerohory ermanokuérape. Avei Pedro heʼi: ‘Peẽ pejapo ha penerenyhẽramo koʼã mbaʼégui, napenderekoreimoʼãi ha ndapeikuaareimoʼãi Jesucrístope’ (elee 2 Pedro 1:5-8).

⁶ Cristo oho riréma yvágape, heʼika umi ansiáno unhídope oĩva Filadélfiape, opytáva Asia Menórpe: “Nde rejapo haguére hekoitépe che ñeʼẽ, che añangareko porãta nderehe ou vove pe jehasa asy guasu, ohupytýtava opaite tetãyguakuérape oikóva guive yvy ape ári ojepyʼaraʼã hag̃ua. Péinako che aju pyaʼete, upévare eñangareko porãke pe reguerekóva rehe ani hag̃ua avave oipeʼa ndehegui ne [koróna]” (Rev. 3:10, 11, ÑÑB). Mbaʼépa oikóta peteĩ unhído oúramo naiñeʼẽrenduvéi? Upéicharamo ndohupytymoʼãi pe “koróna ojajaipáva ha oñembyaiʼỹva arakaʼeve”. Ko mbaʼe ijojahaʼỹva haʼekuéra ohupytýta iñeʼẽrendúramo añoite Jehovápe omano meve (1 Ped. 5:4, NM; Rev. 2:10).

MBAʼÉICHAPA OIKE HIKUÁI PE RRÉINOPE

7. Mbaʼeichagua esperánsa rehépa oñeʼẽ Judas?

⁷ Áño 65 rupi, Jesús ermáno hérava Judas ohai peteĩ kuatiañeʼẽ umi kristiáno unhídope, ‘ojeporavovaʼekue oisãmbyhy hag̃ua’ (Jud. 1, NM; embojoja Hebreos 3:1 rehe). Haʼe oñeʼẽsékuri chupekuéra pe esperánsa ijojahaʼỹvare, orekóva opavave ojeporavovaʼekue oisãmbyhy hag̃ua Ñandejára Rréinope yvágape (Jud. 3). Ohaíramo jepe ambue mbaʼe oñekotevẽvare upe tiémpope, omohuʼãvo ikuatiañeʼẽ imanduʼa ko esperánsa iporãitévare: “Ñandejára ikatu oñangareko penderehe  ani hag̃ua peñepysanga. Péicha ikatúta penepotĩ ha peime vyʼapópe heko mimbipa renondépe. Chupe toñemeʼẽ teko mimbipa, puʼaka ha autorida ha toisãmbyhy opa ára g̃uarã, ymaite guive, koʼág̃a ha opa árare. Haʼe hína Ñandejára peteĩete ñandesalváva Jesucristo rupive” (Jud. 24, 25, NM).

8. Jahecha haguéicha Judas 24-pe, mbaʼérepa jaʼekuaa ojevyʼaitereiha yvágape peteĩ unhído iñeʼẽrendúramo omano meve?

⁸ Opavave unhído oñehaʼã iñeʼẽrendu ha oñatende ani hag̃ua ojapo mbaʼeve ikatúva ohundi chupekuéra. La Bíbliape oñeprometeháicha, haʼekuéra ohaʼarõ Jesús omoingove jey chupekuéra espírituicha yvágape, perfékto ha vyʼapópe oñemboja hag̃ua hikuái Ñandejára renondépe. Peteĩ unhído iñeʼẽrendúva omanóramo, oñemoingove jey ‘espírituicha’, ‘hete noñembyaimoʼãi’ ha ‘hekomimbipáta’ (1 Cor. 15:42-44). Mbaʼépa heʼi umi Ñandejára raʼy yvagapegua ohecháramo upéva? Ñapensamíntena: Yvágape ojevyʼajoa jepi ojehechávo peteĩ “hekovaíva oñembyasyha hembiapo vaikuégui”, upéicharõ koʼýte ojevyʼáne peteĩ unhído iñeʼẽrendúramo omano meve (Luc. 15:7, NM). Jehová ha umi ánhel oguerohoryeterei yvágape umi unhídope, ha koʼã unhído ‘ovyʼaiterei’ ohupytývo pe ohaʼarõvaʼekue (elee 1 Juan 3:2).

9. Mbaʼérepa ojeʼe ‘torypápe oñemog̃uahẽtaha’ umi unhídope pe Rréinope, ha mbaʼéichapa oipytyvõ upéva umi oikóvape gueteri ko yvy ape ári?

⁹ Pedro omombeʼu avei mbaʼépa ohupytýta umi unhído iñeʼẽrendúramo omano meve: “Torypápe peñemog̃uahẽta ñande salvadór Jesucristo Rréino opa ára g̃uarãvape” (2 Ped. 1:10, 11, NM). Mbaʼépa heʼise ‘torypápe oñemog̃uahẽtaha’ chupekuéra? Heʼise ojeguerohorytaha chupekuéra yvágape ojekuaágui hesekuéra oiko hague Jehová oipotahaichaite ko yvy ape ári. Ikatu avei Pedro heʼíraʼe upéicha umi unhído ohupytýtagui heta vendisión ijojahaʼỹva. Koʼã tapicha ovyʼaiterei ha oagradeséta opensávo oservi porã hague Jehovápe oikórõ guare koʼápe. Katuete umi unhído oikuaávo koʼã mbaʼe ‘oñembosakoʼíma’ ombaʼapo kyreʼỹ ha omombarete hag̃ua ijerovia oiko aja ko yvy ape ári (1 Ped. 1:13).

 “PETEĨ ESPERÁNSA” AMBUE OVECHAKUÉRAPE G̃UARÃ

10, 11. a) Mbaʼépa ohaʼarõ ambue ovechakuéra? b) Mbaʼépa tekotevẽ oiko oñekumpli hag̃ua ambue ovechakuéra esperánsa?

¹⁰ Apóstol Pablo oñeʼẽ pe esperánsa ijojahaʼỹva orekóvare “Ñandejára raʼykuéra” ojeporavovaʼekue espíritu sánto rupive “oisãmbyhy hag̃ua Cristo ndive”. Péro omombeʼu avei Jehová orekoha peteĩ mbaʼe iporãitereíva ambue ovechakuérape g̃uarã: “Ñandejára rembiapokue [yvyporakuéra] ohaʼarõ asy hína Ñandejára raʼykuéra [umi unhído] ojechauka. Ñandejára rembiapokue opyta ndovalevéi, ndahaʼéi haʼekuéra oipotágui, síno Ñandejára rupi, péro omeʼẽ peteĩ esperánsa ko múndo ojeitaha ñehundi poguýgui ha ohupytýta Ñandejára raʼykuéra liverta ijojahaʼỹva” (Rom. 8:14-21, NM).

¹¹ Jehová omeʼẽ “peteĩ esperánsa” yvyporakuérape oprometévo omboutaha peteĩ “ñemoñare” omosãso hag̃ua chupekuéra pe ‘mbói ypykue’ Satanás poguýgui (Gén. 3:15; Rev. 12:9). Jesús hína pe iñimportantevéva oĩva pe “ñemoñarépe” (Gál. 3:16). Haʼe omano ha oñemoingove jey rupi, yvyporakuéra oñemosãsóta pekádo ha ñemano poguýgui. Ko promésa oñekumplíta “Ñandejára raʼykuéra ojechauka” vove. Koʼã unhído oñemoingove jey vaʼekue “ojechauka” ñepyrũta oipytyvõ vove Crístope ohundi hag̃ua ko múndo aña oĩva Satanás poguýpe (Rev. 2:26, 27). Upépe ojesalváta ambue ovechakuéra ha nomanomoʼãi hikuái pe jehasa asy guasúpe (Rev. 7:9, 10, 14).

12. Mbaʼe mbaʼépa ojehupytýta “Ñandejára raʼykuéra ojechauka” vove?

¹² Umi mil áño Cristo oisãmbyhytahápe, “Ñandejára rembiapokue” tuicha ipiroʼýta. Upe tiémpope ‘Ñandejára raʼykuéra ojechaukáta’ avei oservívo Cristo ndive saserdóteramo ha oiporúta hikuái Jesús sakrifísio repykue yvyporakuéra rehehápe. Upe Rréino poguýpe, umi yvypóra iñeʼẽrendúva saʼi saʼípe ‘ojeíta ñehundi poguýgui’ térã pekádo ha ñemanógui. Haʼekuéra ohechaukárõ iñeʼẽrenduha Jehovápe umi mil áño pukukue ha ohasáramo pe pruéva paha, ojehaíta herakuéra pe ‘kuatiañeʼẽ jeikove reheguápe’ ha ohupytýta hikuái “Ñandejára raʼykuéra liverta ijojahaʼỹva” (Rev. 20:7, 8, 11, 12). Ajépa iporãite ko esperánsa!

JAJESAREKO MEMÉKE UMI MBAʼE ÑAHAʼARÕVARE

13. Mbaʼéicha rupípa jareko esperánsa, ha arakaʼépa ‘Jesucristo ojechaukáta’?

¹³ Umi mokõi kuatiañeʼẽ Pedro ohaivaʼekue espíritu sánto rupive, oipytyvõ umi unhído ha ambue ovechakuérape ojesareko meme hag̃ua pe esperánsare. Pedro ohechauka avave ndaikatuiha ohupyty koʼã mbaʼe ijehegui rei, síno Ñandejára imbaʼeporã rupínte. Haʼe ohai: “Peñatende porãke ha pehaʼarõ jeroviapópe pe mbaʼeporãgui oñemeʼẽtava peẽme Jesucristo ojehechaukaha árape” (1 Ped. 1:13, NM). Arakaʼépa ‘Jesucristo ojechaukáta’? Ou vove omyengovia hag̃ua hembiapo porãngue umi iñeʼẽrendúvape ha ohundi umi hénte añáme (elee 2 Tesalonicenses 1:6-10).

14, 15. a) Mbaʼépa jajapovaʼerã jajesareko meme hag̃ua pe esperánsare? b) Mbaʼe konséhopa omeʼẽ Pedro?

¹⁴ Ikatu hag̃uáicha jajesareko meme pe esperánsa rehe, tekotevẽ akóinte ñahaʼarõ “Jehová ára”. Upe ‘árape’ oñehundíta “yvága” térã umi goviérno koʼag̃agua, ha avei “yvy” térã ko múndo aña ha “opa mbaʼe oĩva pype”. Ndareíri ningo Pedro heʼi: “Peñehaʼãkena [...] peñembosakoʼi ha pehaʼarõ Jehová ára guasu og̃uahẽ. Upe árape yvága hendy ha ikusuguéta ha opa mbaʼe  oĩva pype, hakuetereígui hykúta” (2 Ped. 3:10-12, NM).

¹⁵ Apóstol Pedro ohechauka umi “yvága” ha “yvy” koʼag̃aguápe omyengoviataha “yvága pyahu” térã Cristo goviérno, ha peteĩ “yvy pyahu” térã umi yvypóra iñeʼẽrendúva oñemoĩtava ko goviérno poguýpe (2 Ped. 3: 13, JMP). Upéi oñeʼẽvo pe múndo pyahu ñahaʼarõvare heʼi: ‘Che ermanokuéra ahayhuetéva, pehaʼarõ aja koʼã mbaʼe, peñehaʼãmbaite ikatu hag̃uáicha Ñandejára pendejuhu pyʼaguapy, tekopotĩ ha jejavyʼỹ rehe’ (2 Ped. 3:14, BNP).

JAHECHAUKÁKENA JAHUPYTYSEHA UMI MBAʼE ÑAHAʼARÕVA

16, 17. a) Mbaʼépa jajapovaʼerã ‘ñanderekomarangatu’ ha jahechauka hag̃ua ‘jahayhuha Ñandejárape’? b) Mbaʼépa tekotevẽ jajapo jahupyty hag̃ua umi mbaʼe ñahaʼarõva?

¹⁶ Jajesareko meme vaʼerã umi mbaʼe ñahaʼarõvare, péro tekotevẽ avei jahechauka opa mbaʼépe jahupytyseha upéva. Pedro heʼi haguéicha jahechavaʼerã mbaʼéichapa ñaime Jehová renondépe. Mbaʼépa heʼise upéva? Ñepyrurã, ojekuaavaʼerã ñanderehe ‘ñanderekomarangatuha’ térã ñanderekoporã ha jaikoha ‘hekoitépe umi ojeroviaʼỹva apytépe’ (2 Ped. 3:11, NM; 1 Ped. 2:12, ÑÑB). Tekotevẽ avei jajoayhu, ha upearã jajapovaʼerã ikatúva guive jaiko hag̃ua peteĩ ñeʼẽme ermanokuéra ndive kongregasiónpe ha ko yvy tuichakuére (Juan 13:35). Pedro heʼi avei ‘jahechaukavaʼerãha jahayhuha Ñandejárape’. Upéva heʼise jajapovaʼerãha umi mbaʼe ñanemoag̃uítava hese, pór ehémplo ñañemboʼe ñande pyʼaite guive, jalee la Biblia káda día, jastudia ñaneañohápe ha ñande rogayguándi, ha kyreʼỹme ñamombeʼu pe “marandu porã oñeʼẽva Ñandejára Rréinore” (Mat. 24:14, NM).

¹⁷ Opavave ningo ñaimese umi tapicha Jehová oguerohorýva ha osalvátava apytépe ág̃a oñehundi vove ko múndo aña. Ñañehaʼãmbaitéramo jahupyty upéva, jahecháta mbaʼéichapa oñekumpli ñane esperánsa. ‘Ñahaʼarõ pe tekove tapia g̃uarã, Ñandejára ijapuʼỹva arakaʼeve, ymaite guive heʼivaʼekue omeʼẽtaha ñandéve’ (Tito 1:2).

[Porandu ñahesaʼỹijóva]

[Nóta oĩva taʼanga ndive páhina 22]

Umi kristiáno unhído ‘onase pyahu jey ha oñemeʼẽ chupekuéra peteĩ esperánsa añeteguáva’

[Nóta oĩva taʼanga ndive páhina 24]

Ñaipytyvõkena ñande rogayguakuérape ojesareko meme hag̃ua umi mbaʼe ñahaʼarõvare